YESAYA 52 - ALLAH NIHYET MEM TUNGWATU NYA

Allah mibindei ba, mben Yerusalem igyati kwes

¹ Je di mben Yerusalem e, ma jikiju hanyen lene ma jingonti yai nisindem bijijuk jide sinsun di kei-kau hanyen! Je di jinok Allah de limwa di jingon kwes e, ngkiai di irom ndok nya micoi dimbou hui kwei ei jide minu ndig bu bi sren.

² Je di mben Yerusalem e, ma jikiju leu dihyei ndung ba, jimpig jide sinsun tut atriem ntui di rap je leu je. Je di timiei Sion di jisima hukum e, ma jipas lante di ngot jikimam leu je!

³ tuhan pai bak Nide limwa nya “Nipou ne ngkiai nya ikat je bijinok awak mem yok noro iba mitiei bipek je leu jiceu bi. Nok gima cem tirigi dikwek je leu awak midigo gau je bi.

⁴ Tirigi po jinduk yam ba, juug ei jingkiaisi ei minu Mesir ne gima bit leu jenti jingon kanti. Noro mpe dino tentara Asyur ikat je bijinok awak mem yok lene iba mitiei bipek je bi.

⁵ Tini bu ne dimbrap tut mindei ei sirini i? Mben Babel ikat je lo, iba mitiei bipek je leu jiceu bi. Yo di ico kep je inggei sut yonti ba, ighyet wer mpiahi tut Da.

⁶ Gima rino mijipai jit bipia Dani ne Allah ri. Mpe dima lene mijo nibreisi mem je bipia dimbrap bit je.”

⁷ Yo di ingat no di ttau kep yok ei nungug him igyai nillei nindig bibor lewo no dima kwei sut nihyet di kei kin nihyet tut ningon kwes kin yamti kin nihyet tut niteu ningwes ngunti bak Sion bipai “Jide Allah ne Nibou Ndig ri!”

⁸ Yo di igya ser jide minu igyai nillei ba, imbos-hi-mbos lewo ingat tuhan di ngkwei hanyen ei Sion bou igyai him.

⁹ Minu ndig Yerusalem di timek bingwig e, ma ayai nillei lewo tuhan miteu ade limwa nya bingwes ngun leu api gwam ser ingon.

¹⁰ tuhan mindo Nide nisindemti brei bou mben ngkiai di dihyeisi dini hagom igyai him tirigi Noni teu Nide limwa nya bingwes ngun.

¹¹ Je di jittei tuhan De Ig nimbumbati nya bijikwei sut e, ma jikes minu Babel ei ba, jikwei leu! Ma jingget mun di map kuisi au. Lene ma jitin ei jingon di kwes kei nipou tirigi jikwei krau bigyo.

¹² Tirigi sindi jikwei lene ma jiba jibinang ug au. Lewo tuhan mibie tut je ba, Noni minyohou je. Noni miya srak ko hagau je bicuon jiyaisi kikau kak jimbutti.

Awak gom di yai ninghuisi wei

¹³ tuhan pai “Ningat ne Ditde awak miyai nide midyai nya biput apino tungwatu nya minggei sut noni bikon ninyenga.

¹⁴ Nipou ne tungwatu nya imang bibor inga leu mpe dino ingat noni bou igyai him lewo hi bui noni bimos kei ba, niimaisi wer tungwatu bi.

¹⁵ Noro tini bu ne ngkiai nya imang bibor minggap leu tut noni ba, nibou ndig nya minga leu tut noni bikimut yuhuigya. Yoni mingig igyai kep noni leu api ingon dor niti tut mun di nipou ikan tut bi sren a.”