YESAYA 51 - ALLAH NIHYET MEM TUNGWATU NYA

Nihyet nibigwam ser timiei minu ndig Yerusalem nya ingon

¹ tuhan pai “Je di jijoi sut gima diteu je bijingwes ngun e, ma jingig jitingou mem Dihyet bijikwei ndam Da. Ma jahara Da bidimpu je. Ma jiyok ngon kep nungug tig di jintun him kin tig mma nghousi di ibei je leu cem.

² Ma jiyok ngon kep jidigup bat-jidigai bat di Abraham kin Sara di isrek tut je. Mpe di po didimig Abraham lene noni bon nimunggwom hi bi. Noro dinjei mun di kei bak noni tug hon nide nintun him yamti di bram yam nya di diyai binoni.

³ Timiei minu ndig Yerusalem e, midigwam ser jeni kin yo di ibong ser ig kum kroisi ei minu ndig dima jahagom jingon a. Mbro nok gino ide dihyei rinok iggum ndigsi lo, midibindei binok miai mitou nghousi bidem kep Ditde miai mitou nghousi di Eden po nnum kei pima. Tungwatu nya mingon nggei-hi-nggei bigyai nillei ei mpia dima bipai sigyo biDa tug hon doia di ipai nya.

⁴ Ditde limwa jen e, ma jiyok jitingou kep dihyet. Diyai Ditde ningginausi bak ngkiai nya ba, Ditde niggai serti nya mipiga digai yok.

⁵ Niteu ningwes ngunti di diyai biyok dideu kwei su. Ditde njap nibindei timek siceu nyati mbigom mitau. Dinyeng mitak kep ngkiai nya yahagom. Minu di ting nya ibet ingon mem Da ba, igyok ingon mem Da kin Ditde nibon munti di bibon ninggap leusi.

⁶ Ma jicap mpia-bbed him bijitou kep dihyeisi. Mpia-bbed him mipror bidem hum mmup di brou lene dihyeisi dini mikinei bidem sinsun timiei. Timiei dihyeisi dini yahagom midem kep amihip di mai. Noro niteu ningwes ngunti di kwei leu Dani jo ninno bijo kikau. Ditde nibindei timek siceusi nya muug hon nohonti bi sren.

⁷ Ditde mben jen e, ma jimiap kep dihyet. Jikan tut mun di igbit ba, dingginausi jo nyahan ei jingonti tu. Gino tungwatu iba ighyet bicig je lene ma jittin tut au. Ma jingon bos-bos nyen drek dip gino ighyet wer mpiahi tut je au.

⁸ Yoni misar bipror yon bidem sinsun di cipo kkin lene bidem minghas di iba domba nta bibon di awam kkin. Noro niteu ningwes ngunti di kwei leu Dani jo ninno bijo kikau. Ditde nibindei timek siceusi nya muug hon nohonti bi sren.”

Mben Israel yahara tuhan kwei bimpu yok

⁹ tuhan e, ma akiju ba, ampu nye. Aba Ade nisindemti biteu nye biningwes ngun hak ug. Ma akiju hanyen dem kep nok gi po akiju ei nijam gi nipou mpe di po abindei naga Rahab bindung ba, adat wou ndig krop di bong muk ndigsi di mai pima.

¹⁰ Nani rino abindei di muk ndigsi di jut pingge hak ug a. Atin puig ei minyei nikieti leu binhyepo dem mem yo di ateu yok di ingwes ngun nya ikak biyuug dihip ei nite hi.

¹¹ Apino yo di tuhan kwek yok tu nya miba nimbos-hi-mbos bingkwei hanyen ba, icoi ug ei minu ndig Yerusalem. Yiimaisi cem piga kei drek dip ide ningon nggei-hi-nggeisi di ug hon nohonti bi sren. Yoni ingon nggei-hi-nggei ba, igyai nillei cem lewo ide ningon nggukti kin ninso-nso nyenti pror hak leu yok tu.

¹² tuhan pai “Dani rino digwam ser jingona. Nggon rino jittin tungwatu di mipror yon ug rin i? Nggon rino jittin tut tungwatu di inoyam kin minta di ijip bicom ei i?

¹³ Mei, jibbwe ser jide tuhan di pai tes je di ba niban bijun mpia ei mpia-bbed him kin gi prion dihyeisi dini nikiou cem tu e? Nggon rino jidigit tut yo di ico kep tungwatu ide nigga biborti di itin ei mem gima icok tut tungwatu mem njap jei i? Ningat ne ide nigga biborti dima mingget je bi.

¹⁴ Jei bi ne midikwek yo di isima nya leu api indwau sut njita bi. Noro ide njap jei bibor.

¹⁵ Lewo Dani ne jide tuhan Allah di bindei di muk roi nindig cem di bindei dino muk tti bibor di nugwei bong cem ri. Dinyeng rino No Di Sindem Bibor.

¹⁶ Dani rino diba Niban bijun mpia ei mpia-bbed him bidiprion dihyeisi dini nikiou cem tu. Dipai bak timiei Sion nya ‘Ditde limwa nya rijeni. Diyai Ditde ningginausi bije bidiba Ditde nisindemti binyohou je.’ ”

Minu ndig Yerusalem ninghuisi wei kes hon

¹⁷ Minu ndig Yerusalem e, akiju! Atug ndei hukum di tuhan pinak di cut igkep na kikau bingwig hon nohonti tu.

¹⁸ Hi di leu timiei ade nya ikieti di krau anda bicen na bi. Yo di ibong ser na hi di krau anda bibie tut na cem ningat rin bi.

¹⁹ Mun nyeng di buhun can cut igkep na. Pran di cut bindei ba, ade minu timek bisar lene limwa ade nya imai inggum cem. Hi di ngondut na bigwam ser angon bi.

²⁰ Ade timiei nya ide nisindemti ngwig leu yok bitti bibong ser bikwop puig nuhuisi hagom. Idem kep rusa di biam bon pimo. tuhan niggati cut bihwen yok ba, itug ndei Allah nikon nihyet kep yokti tu.

²¹ Je di timiei minu ndig Yerusalem di jitug ndei ninghuisi wei ba, jintig kibou-kibou yam dem kep yo di idut pes di pu yok e, ma jimiap kep!

²² Jide tuhan Allah di ya srak ko hagau je pai “Midikon ninghuisi wei di Dikes kep je drek dip Ditde niggati dima hanyen leu je. Ditde nigga jeti micut leu je ba, jinghim koi sut bu bi.

²³ Midiyai ninghuisi wei dima bak yo di ico kep je kin yo di icuk je dino jibong dihyeiti kin yo di ico kep je nyen-nyen bibindei ba, jinok puig di tungwatu nya ico kak nya cem.”