YESAYA 50 - ALLAH NIHYET MEM TUNGWATU NYA

¹ tuhan pai bak mben Israel “Ditde limwa jen, jikan bipia dikou sut je noyam kin pinai di kou sut nitnem e? Gi nok lene ma jindo srat di bindo tut gi dikou sut ditnem biDa. Jikan bipia ditri je noyam kin no di ba nimunggwom bat nya bibirop ningwam di noni bon bak hiter e? E bi. Jide siceu nya ikat je bibuwak je ug ei jingkiaisi drek dip jide sisar kin jingon di mbuk biborti!

² Nggon rino Ditde limwa hi buhup dihyet tirigi po dikwei hig yok pima bi i? Nggon rino inghek Da ba, ikan bipia disindem mem gima dikwek yok biditeu yok ba, ingwes ngun bi i? Ningat ne disindem mem gima diba dicukti bindei ba, muk ndigsi sri bipingge bingwig ba, minyei nya cem pingge bingwig dem kep nok iggum ndigsi ba, wau di joti nya hagom mai bimpiei bibor.

³ Mpia-bbed him dindi-kai dem kep nok no di juk sinsun nimmun drek dip ningon di ngguk bram nimai.”

tuhan de awak di bit nihyet

⁴ tuhan Di Ninyeng Jei Bibor ngginau da lene bindei ba, diji ngkiem leu binhyepo dihyet mibiwin kep yo di inghuisi wei nya ingonti. Noni bindei ba, dingon bisau sut Nide nipingok dati nya bikwop njap bigyoti.

⁵ tuhan yai ningon di dorti bida. Ditte tut Noni bidiba dingha bak bi.

⁶ Dikes dinghim bak yo di ibui da bidikiek dingyoi bak yo di itiba duhui nta. Dikiek doho ter leu yo di inim kep da di itrai sut da bi.

⁷ Mbro nok gino ighyet wer mpiahi tut da lo, midimmai sut danti bi lewo tuhan Allah mpu da. Midibindei ba, dingon nddong lewo dikan tut bipia ighyet ngwig kep da,

⁸ lewo Allah simiak da ba, Noni ndo brei bipia dibon mun tunggwei bi. Tou ripai kep da i? Ma no dima kin dani niya ei nikei noho bei! Tou ritte tut da i? Ma jicuk noni kwei ya simiak da.

⁹ Igbit ri! tuhan Di Ninyeng Jei Bibor mbrap gau da. Tou ribrim ningkek bipai bipia dingon mui i? Yo di ipai kep da yahagom misar bingwig dem kep nok minyahas di cipo kkin bikinei su.

¹⁰ Je di jibou cut bak tuhan di jimiap kep Nide awak nihyet e, mpaba puig di jimbut kak dima dindi ba, nipigati hi di piga digai puig mem je bi. Noro ma jiba jingon com tuhan bijirok kui jide Allah.

¹¹ Je di jaham jimbuk kep nindigsi nya e, jingon kanti di jitin ei su mibindei sar jenti hanyen. tuhan Nonti ribindei di mun dima cut igkep je ba, mijitug ndei ninghuisi wei di buhun bibor.