YESAYA 45 - ALLAH NIHYET MEM TUNGWATU NYA

tuhan kon Kores binok nibou ndig

¹ tuhan dimig Kores ei nok nibou ndig biyai nisindem bak leu binhyepo noni hwen ngkiai nya yahagom bitimek bingwig ba, cug nibou ndig nya ide nisindemti bingwig leu yok. tuhan mikau dimbou pmem nya bidem minu ndig nya hagom leu Kores. Dimbou pmem hi ngkiem bi. tuhan pai binoni,

² “Miditin puig mem na ba, didime mbigdip nya kin nungug tou nya hagom bisur yam kei. Midinggek dimbou di iba ngkimom-tembaga bibon bidibindei ba, dimbou ngkimom nitu nibahau yamti hagom dahat.

³ Midiyai ndigban kin mitiei di yo di inyeng nya iku bijo nding bina leu binhyepo jo nibreisi mem na bipia Da di tuhan dinok mben Israel ide Allah. Ba, dihig anyeng tu.

⁴ Mbro nok gino akan tut Da haigtu bi lo, dihig anyeng ba, dikon na nok nibou ndig. Dicuk na leu binhyepo ahati tut Ditde awak di mben Israel di didimig yok ei ba, inok Ditde limwa nya.

⁵ Dani ne tuhan ri. Allah hiter ningat rin bi. Dangkom ngat he rino Allah. Mbro nok gino akan tut Da haigtu bi lo, dibindei ba, akrau ade minggwen nya nok gi dem mem na.

⁶ Diyai nok gima leu binhyepo tungwatu ei dihyei nisurti-nipekti hagom ikan tut bipia Dani ne tuhan rin ba, Dangkom ngat he rino tuhan.

⁷ Dipai tes nipigati kin nidinditi. Dibindei ba, mun di kei pek kep mem tungwatu nya ba, mun di buhun cem cut igkep yok. Da di tuhan diyai midyai dini hagom.

⁸ Tirigi ahwen ade siceu nya bitimek bingwig lene gima noyam kin biget di mbras kwei leu mpia-bbed him lene dihyei dini cigit ba, bindei hei ningon sren-srausi kin nibong kei nigwam keisi bikui mpia tereu nok dihyei ninnumti kin nitou nikiengti. Da di tuhan dibindei ba, mun dini hagom mipek kep.”

tuhan ne Nipai Tes Mun Cig kin Niyok Niyai Kep Nibohon Cig ri

⁹ Buhun bibor mem no di tte tut tuhan di pai tes noni. No dima noyam kin dibijig gom di srep tut no di bibon noni tu. Igtuyap hig ser noni “Aba da bibon mindei i?” Dibijig nso tut noni bipai “Angon mbum ba, abon da kan bi e?”

¹⁰ Buhun bibor mem no di tte tut nicig-nipmem nya bipai biyok “Nggon rino jibindei ba, disrek nok gini i?”

¹¹ tuhan di nok mben Israel ide Allah di kwes-kwau pai “Ma jihig ser Da tut nijam di nidipti bu. Noro dem mem gima jihig ser Da tut dimunggwom bat nya ba, jicuk Da tut mun di suar ma diyai nya bi.

¹² Dani ne tuhan rin ba, dipai tes dihyeisi dini leu api dipai tes tungwatu nya leu binhyepo ibong kei igwam kei eisi. Diba Ditde nisindemti biprion mpia-bbed him ei anai ba, dinyeng tak kep mpia njap kin bed mmun kin ham mpia-bbed him nya hagom nimbutti nya.

¹³ Diyai dibou tut Kores leu binhyepo noni miyai igbit dingon kanti bibindei ba, ningon di kwes-kwausi kieng kep dihyeisi. Midiji kep njuisi bidem nimbutti nya hagom. Leu api noni mipui nihyet tut Ditde minu ndig Yerusalem hanyen bikwek Ditde limwa nya leu ig bui di isima eisi. Hi miyai mitiei binoni bingot kep noni drek dip bi.” tuhan Di Sindem Bibor simbot dat tu.

¹⁴ tuhan pai bak mben Israel “Jinyeng mitak kep mben Mesir kin Sudan nya ide njita kin ndigban kin mitiei hagom. Mben Syeba di intig bou jei minok awak mem je bu. Mijiba lante biteu yok leu api yoni igya abia kep je. Yoni mikuk yok ei jimig him bipai jit ‘tuhan ningat rin bit je ba, Nongkom ngat he rino tuhan. Kwar di ikuk yok bak ne allah nijit rin bi!

¹⁵ Allah di teu mben Israel bingwes ngun ne Allah di ku No nding leu tungwatu nya igyai him ri.

¹⁶ Yo di ibon kep kwar nya mimmai sut yonti drek dip tungwatu nya di inim kep yok.

¹⁷ Noro tuhan miteu je di mben Israel ba, jingwes ngun bijo ninno bijo kikau. Mijimmai sut jenti ba, hi dima nim kep je bi sren bijo ninno bijo kikau.’ ”

¹⁸ tuhan di pai tes mpia-bbed him Nongkom ngat he rino tuhan! Nongkom pai tes dihyeisi dini binddong kei cem jo nijoti cem. Noni pai tes dihyeisi dini kinei binok mpia nintiti bi noro nok nibreisi mem tungwatu nya bibong kei bigwam kei eisi. Noni pai “Dangkom he rino tuhan ba, tuhan hiter ningat rin bi.

¹⁹ Dimbrap ku bidiku mimun tut bi. Dicuk Ditde limwa di mben Israel ba, inggok ser Da mikui-kausi bi. Da di tuhan dihyet buhun biditri tut mun di nijit.”

Ibinai tuhan Di Sindem Bibor kin mben Babel ide kwar nya

²⁰ tuhan pai “Je di timiei ngkiai nya di jingwes ngun e, ma jinduk yam kwei! Yo di ittei yam kui-juk nyen tut ide kwar nya bingat nadi bak ide kwar di bit bon teu yok bingwes ngun kan bi yahagom ingon mbum bibor.

²¹ Ma jikwei ya ei nikei noho bei bijisimbot dat jide munhyet ba, yo di ibicom yam nya isimbot kep biyam tut. Tou ripai nisinati ei nimbie him tut mun di cut igkep je i? Dangkom di Allah rino dipai sut bi e? Lewo kwar di ikuk yok bak ne allah nijit rin bi. Dani ne Allah di kwes-kwau rin ba, diteu Ditde limwa nya bingwes ngun. Dangkom ngat he rino Allah!

²² Je di tungwatu dihyeisi dini e, ma jingkwei hanyen ndam Da leu binhyepo diteu je bijingwes ngun! Dangkom ngat he rino Allah ba, allah hiter ningat rin bi.

²³ Dipreu ei mem tungwatu nya lene bit bon diluei dingonti tut kan bi. Dipai tug hon neheng kin dinyeng cem tungwatu dihyeisi dini hagom miba ibiau bicom mpia ei dimig him ba, iba yonti ighyet bipreu ei mem Da bipia yahagom ingon gom tut Da.

²⁴ Yo dima mipai ‘Ningon kwesti kin nisindemti kwei leu tuhan Nongkom!’ Yo di ingon mpo tut Da mikwei ya ei Doho bei bimmai sut yonti.

²⁵ Da di tuhan miditeu yo di intun Yakub him bingwes ngun leu api yahagom minggei sut Da.