YESAYA 39 - ALLAH NIHYET MEM TUNGWATU NYA

Nibou ndig Babel cuk yo di igya kui noni kwei leu minu Babel

¹ Ei nijam dima lene Merodakh Baladan di nok nibou ndig mem Babel di nicig ninyeng Baladan miap tut bipia Nibou Ndig Hizkia sindi kei hanyen tu. Apino noni cuk yo di igya kui noni ibou poi kwei ba, ipwoi srat gom kin munkwas di kei bibor bigyai bak Hizkia.

² Hizkia ba ningon di kei bicigit yo dima kui ig nibou ndig lene bindo nide mun di nyeng tut nya hagom titut yam biyok. Gima ne mas kin perak kin biei ngat di ui-gwang kei kin mini ibou di ui-gwang kei kin nide nimbumbati di mem nibikon pranti nya hagom ri. Noni ndo mun nyeng di nju ei ig nibou ndig di nyeng tut nya hagom biyok.

³ Leu api Nabi Yesaya ug ngat Hizkia bihig ser “Yo dima ikwei leu hantou bipai mindei bina i?” Hizkia buhup “Ikwei leu minu Babel di jo ting bibor.”

⁴ Yesaya hig ser bu “Ingat mindei ei ig nibou ndig dini i?” Hizkia buhup “Ingat mun nyeng hagom. Dindo mun nyeng hagom ei ditde ninsi di ninju ndigban eisi nya titut yam biyok.”

⁵ Leu api Yesaya sok kep nibou ndig “tuhan Di Ninyeng Jei Bibor pai bipia,

⁶ Tto bou midem leu api yo dima mipian mun nyeng hagom di anyeng tut ei ig nibou ndig dini kin gi hi di adigup bat-adigai bat nya inju keyam ei su habiei leu nipou yo kikau kwei bipek njap di ammani kep ba, ipos hagom biyuug sut ei minu Babel. Ndigban dima yok hi di mijo bi.

⁷ Yoni mikat yo di intun nani him bu nya ba, yuuyai yok nok awak ei nibou ndig Babel de ig leu api yoni igyai midyai mem noni.”

⁸ Lene Nibou Ndig Hizkia buhup “tuhan nisokti di apai sut bida dima kei.” Hizkia buhup nok gima lewo kan “Gino side ninyeng tak kepti jo nyahan ba, side nibong kei nigwam keisi mbut kikau mem nijam di siyaijo ei dihyeisi dini yo lene gima dem.”