YESAYA 38 - ALLAH NIHYET MEM TUNGWATU NYA

Hizkia nggwen leu api tuhan bindei ba, kei hanyen

¹ Ei nijam dima ne Hizkia cut ei ninggwenti ba, mbigom kin bu mimai. Lene Nabi Yesaya di Amos nipmot ug ngat bipai bak “tuhan sok kwei mem na leu binhyepo Na Di Anyeng Jei aba ahyet bikwas mun di anyeng tak kep nya hagom lewo Na Di Anyeng Jei ma akei hanyen bi. Jei bi ne amai.”

² Lene Hizkia ba noho rok dring leu api ngat nadi bipai,

³ “tuhan e, ma ayok ngon kep bipia diba dingon gom boom danti nok awak biNa ba, dingon sren cem tu. Dibrim dingkek mem gima dibit angon kanti tu.” Leu api Hizkia ba ningon di ngguk bibor bipim nggruet.

⁴ Tirigi Yesaya ug leu su lene tuhan cuk noni,

⁵ bingkwei hanyen ndam Hizkia bipai tuhan nisokti dini bak “Da di tuhan Allah di ade pung di antun him di Daud kuk no bak rin. Dimiap ade nadi bidingat ayai nggwei di kibor cem tu. Midikum ei ade njapti bidem ari bingwam simnaimuhwidip bu.

⁶ Midikwek nani kin minu ndig Yerusalem dini leu nibou ndig Asyur ninda nsi bidiya srak ko hagau minu ndig dini kikau.”

^21-22 Leu api Yesaya cuk nide awak boho biei ara ningat binem-nnai leu api ba ningei bidip Hizkia nibuhweisi leu binhyepo kei hanyen. Nibou Ndig Hizkia hig ser Yesaya “Mindei rinok bindo mem da leu binhyepo dikan tut bipia tuhan miyai gi kei bida ba, duug coi tuhan De Ig hanyen i?”

⁷ Yesaya buhup hanyen bak “tuhan miyai bindo biNa Di Anyeng Jei gi bindo tut bipia Noni yai mun bipek kep nipreu ei mem nati dima.

⁸ Mun di bindo tut jam mpia yaisi di Ahas bibon pima ningwes mingkwei kep ninghim dip njiriek niciusi simnai.” Pai nok rino ningwes dima ngkwei hanyen kep ninghim dip njiriek niciusi simnai.

⁹ Tirigi Hizkia kei hanyen leu api pas kep doia nibinggei sut tuhan.

¹⁰ Dipai bipia side njap ug ei nahacanti he yo lo, suar suug bisibindei ngwig side njap nikenti ei minu nimai nya ide.

¹¹ Sipai bipia misingat tuhan bu ei dihyeisi dini bu bi ba, misingat tungwatu dihyeisi dini bou siyai him bu bi.

¹² Sinnei pas ba, side njap ningwigsi tau kep sa bidem kep prak meng di gembala nya ilet ba, dem kep mong di ikos leu hat di ibibien sinsun eisi. Sikan bipia Allah yai siyaijo ningwig honti bisa.

¹³ Sahara nidut mem mmun jei dem kep nok gi po singa ningut gom kinam sinjum nya binem-nnai a. Sikan bipia Allah mibindei ba, siyaijo ngwig hon.

¹⁴ Sinnam ba, sihyet mbris bisidem kep hakimoi mbrei ba, siduhug-duhug nyen. Siyai nggrop mbris lewo sitou kep kui mpia-bbed him. tuhan e, akwek da leu mun di buhun dini.

¹⁵ Misipai mindei i? Gini ne tuhan nibon munti ri. Ningon di nggukti tak kep sa ba, sigibong kan bi.

¹⁶ tuhan e, ayai niyaijo bida tug hon ahyet him kin Ade nibon munti. Asindui sut ba, diyaijo mem Nangkom ngat he.

¹⁷ Dingon nggukti minggek binok nibong kei nigwam keisi. Ateu da bidingwes ngun leu mun di buhun di cut igkep da. Akos ser ditde sisar nya hagom tu.

¹⁸ Timiei minu nimai nya ide hi nggei sut Na kan bi. Bit bon no di mai ba ningon com Na tut Ade ningon gomti kan bi.

¹⁹ Yo di igyaijo nya he rino ikon anyeng bit leu nok gi dikon anyeng mem njap di ammani. tuhan e, ndigpoi nya ipui sut Ade ningon gom biborti bak imunggwom bat nya.

²⁰ tuhan e, ayai ninghuisi kwes bida hanyen tu. Apino minipai doia ei Ade Ig ba, nibikek nggong mbrei mem nijam di niyaijo ei dihyeisi dini.