YESAYA 34 - ALLAH NIHYET MEM TUNGWATU NYA

Allah mikes hukum ei nide nitok nya dip

¹ Mben ngkiai jen e, ma jikwei bijidem yam ei leu api jingig jitingou a. Nna ba minu dini titut yam kin yo di igyaijo ei niti nya yahagom ikwei dem yam bimiap kep.

² tuhan gga ngkiai nya yahagom bitut ide nimpung tentara nya cem. Noni mikes hukum ei yok dip ba, bindei sar yahagom.

³ Hi mitig yok bi noro misindui sut yok bijo hak bikroi ei ba, impiei hak ei ijoti. Inggrom di siber mibindei nungug nya bingwoi lewo inggrom misilip kwei leu mbigdip nya.

⁴ Mpia njap kin bed mmun kin ham mpia-bbed him nya hagom mitimek ningwig a. Mpia-bbed him mikijum bidem srat meng di ikijum pimo. Ham nya micut leu mpia-bbed him bidem kep biei meng nya di llet leu biei ninda-nda nya.

⁵ tuhan hit Nide singau simeda ei gwamti tu. Nogindini singau simeda dima micut igkep mben Edom di itug ndei hukum leu api mibindei sar yok.

⁶ Nimbiam nggrom kui tuhan de singau simedati lene singau simeda dima mpung tut immau di kuisi bidem kep mindhe-ndhe di indig ei nimbar hum dokti ninggrom kin nimmau pimo. Lewo tuhan tin ei midut dini ei nimbar hum dokti ei Bozra. Noni miyai nimai bak timiei Edom nya ba, iwer nimbiam nindig bibor.

⁷ Tungwatu nya mikrop noyam kin sapi nehek kin sapi nehen pap. Nimbiam nggrom mibindei minu di ide bingwoi-ngwau ba, mpung tut nimbiam ninggrom kin nimbiam nimmau cem.

⁸ Gima mipek kep mem yok ei njap di tuhan kon pran gau Sion bibuhup Nide siceu ide nibon munti nya hanyen biyok.

⁹ Minyei nya di biam ei minu Edom miluei nitta bidem aspal ngei ba, idihyei wer belerang. Apino minu Edom titut yam njeng bidem aspal ngei di njenga.

¹⁰ Hi dima mu ninjeng dima kan bi ba, jo njap jei mmun jei dimo kikau. Lene nimmup di brou leu mpia dima brou bijo ninno bijo kikau. Mikes dihyei dima bijo ngwak lene bingak-cai leu nintun him yamti di bram yam nya ug ei nintun him yamti di bram yam bu nya cem. Hi dima mbut kak dihyei dima bu bi sren.

¹¹ Ha undan kin migcun mibong ser mpia dima ba, hapug kin miniwou migwam ser. tuhan bindei dihyei dima sinsiou ba, ngwak cem lene bidem kep nok habiei tirigi Noni pai tes bigyo.

¹² Nibou ndig hi di ninyeng tak kep minu dima bi ba, nibou nya yahagom imai bipror ningwig leu su.

¹³ War nggig-nggwen kin mintu-minta mehei ei ig nibou ndig de nya kin minu ndig di bon tentara nibousi di igya coi nya ba, nsien bigbehei nya kin ha unta nya ibong ser cem.

¹⁴ Mindhe-ndhe di niten pos nya mibong sinsiou ei niti. Ninnei rom nya ighyet bong yamti ei niti. Njungwes mmun mikwei nggok mpia di bongti ei sirima.

¹⁵ Wou piet nya cem mitot yaham bibep idinggwei ba, ibong kep idunggwei cem ba, inyohou imien nya ei mpia dima. Ha krubri nya cem igya tut ide nimpung hawek kin hakre sindam bidem yam ei mpia dima.

¹⁶ Ma jinggok ser ba, jikwop ei tuhan de sratti leu api mijingat lo, mindhe ninyeng gom mipror leu mindhe-ndhe pima yok hagom ikieti bi. Niwek mipror leu nikre bi ba, hagom jo hon yam. Lewo tuhan Nonti rino cuk yok lene Nonti rino ba yok bicom yam ei dima.

¹⁷ tuhan rino kwas minu dima tut yok ba, bikwop mindhe-ndhe dima yok igyai ide mpia ttou nsi di igyai bigya niti. Yoni igya ei mpia dima bijo ninno bijo kikau. Ba, dihyei dima nok ide leu nintun him yamti di bram yam nya ug ei nintun him yamti di bram yam nya bu.