YESAYA 33 - ALLAH NIHYET MEM TUNGWATU NYA

Ingat nadi leu binhyepo Allah mimpu yok

¹ Nyeni ide siceu nya mitimek bingwig! Mbro nok gino hi pos ide ndigban leu yok bi lo, ipos nyende ndigban tu. Mbro nok gino hi bakilak yo bi lo, ibakilak nye tu. Noro mpe dino nituti di ipos ndigban ba, ibakilak tungwatu nya ngwig hon nohonti tu lene hiter mipos ide ndigban ba, ibakilak yok.

² tuhan e, ma angondut nye. Niyok ningon mem Na. Ma acuon nyeni niyaisi bikwop njap ngwa hagom. Ma ateu nye biningwes ngun tirigi mun di buhun cut igkep nye.

³ Mpe dino akiju ba, abindei hei ahyet di dem kep kru di cut lene ngkiai nya mporo inang bintek gimahap.

⁴ Ide siceu nya inoyam kin hai ceng di ngwig kep yok bipos ide ndigban bingwig leu yok.

⁵ tuhan kei-kau-kei. Ninyeng tak kep mun nyeng hagom. Noni mibindei ba, minu ndig Yerusalem mpung tut ningon gomti kin ningon sren-srausi.

⁶ Noni bindei ba, Nide limwa nya igya nddong kei. Ide ningon kiti kin nintin kimboti kin nikuk yok biNoniti miteu yok bingwes ngun.

⁷ Tentara di mimbri kui ingkek yahara tungwatu nya mem gima impu yok. Niya hacan mem munhyet cig di nibou ndig cuk yok kwei mem gima igwam tungwatu ikieti ba, ikwam minggwen bit yam ser nya iba ingon di ngguk bibor bipim.

⁸ Mun di buhun bibor jo ser simpak nindig nya bibindei ba, hi kak simpak nya bu bi. Yo di ikwam minggwen bit yam ser tu nya injiriek ighyet nghwak him ba, hi di nibou cut bak yo di igyai igbit mun di ipreu ei mem yamti pima bi.

⁹ Minu dima hagom nok iggum ndigsi kin ha ngunti. Baham tindurti ei Libanon hagom ngoi-nga tu. Tini bu ne mbang briep Saron di bon ninnumti nipou su rinok iggum ndigsi. Biei nya ei minu Basan kin Nungug Karmel hagom nimeng llet bingwig.

tuhan nisokti mem Nide siceu nya

¹⁰ tuhan sok kep ngkiai nya “Nogindini midiyai dibou tut je bidindo Ditde nisindemti bije.

¹¹ Jikos dat jingon kanti mikui-kausi ba, jiyai munti nya hagom bon ninyeng bi. Jide nigga biborti noyam kin hum di miyem jenti bijitimek bijingwig.

¹² Jinok bor di tungwatu nya indig kep hum binok kapur kin mun di tigot-tigau di tungwatu nya ilen ba, indig kep huma.

¹³ Nnaba tungwatu di ibong dideu cem gi ibong ting cem imiap kep diyai munti nya ba, ipai jit bipia disindem bibor.”

¹⁴ Mben Sion di ibon sisar nya inghuisi mpig sut ba, ittin bibor. Ipai “Allah nikos tutti nya noyam kin hum di cig-cai bijo ninno bijo kikau. Bit bon ingwes ngun leu hum di cig-cai nok gima kan bi.”

¹⁵ Noro bon jingwes ngun gino jitri tut mun di nijit ba, jiyai munti nya hagom igbit. Ma jiris mitiei leu yo di yuhui mbum nya au. Ma jice tut hiter ngot kep je au. Ma jiyok jingon gom bit nihwen kep mun cig nya kin yo di ibon mun di sibut nya au.

¹⁶ Tug hon nisinati dima lene mijingwes ngun leu api jingon jo nyahan noyam kin yo di igwam coi tentara nibousi di sindem bibor. Njita kin ndia ngei minok gi dem mem je.

Nijam di kei bibor kei ei nidipti bu

¹⁷ Ei nidipti bu lene mijingat nibou ndig di ba Nide nikei-kau-keisi bininyeng tak kep je bou jiyai him. Ninyeng di tak kep mikieng kep dihyei nisurti-nipekti hagom.

¹⁸ Gi po jittin tut ngkiai di igya tindei belasten bigyem jimuhup kin yo di imbris nyahan bigyok itta kep jide minu yahagom pima ne ningat rin bi noro nimbai he.

¹⁹ Mpe dima lene mijingat ngkiai di illei-lau di imbrap nihyet ngkiai di jimiap bi nya ei jiyai him bu bi.

²⁰ Ma jimian huk minu ndig Sion di bon nibousi mem nyeni ibon midut nya eisi. Ma jimian huk minu ndig Yerusalem! Mpe dima lene timiei nya yahagom ibong kei igwam kei. Yoni inok prak meng di jo nijoti kikau. Hi dima krop prak meng dima ba, hi dima tiba patok cem hi dima bindei ba, nikuk tun cem bi.

²¹ Mpe dima lene tuhan mindo Nide nikei-kau-keisi binye. Yahagom mingot ide ig ei mam bei simiak minyei nda nya di nyan bibor bibong eisi. Noro bit bon ide siceu nya ikrau kibar minyei bipiar-piar nyen ei minyei ngwa dip dima kan bi.

²² tuhan nok ide nibou ndig ba, ninyeng mitak kep nye. Noni ne nikei di tri tut nicukti nya ri. Leu api Noni miteu nye ba, ingwes ngun leu ide siceu nya.

²³ Noro tut kibar minyei pima ne nimbumbati nya bon ninyeng ba, bit bon timiei kibar nsi nya itas sriwir nya kan bi! Nyeni mipos ndigban hagom bingwig leu ide siceu tentara ngkiai nya leu api mikwas tut yam. Ba, yo di imig lit nya cem ima ndrim hi mem yonti lewo ndigban dima ne ndigban di nindig bibor ri.

²⁴ Mpe dima lene tungwa hi minso tut ninggwen di hwen noni bu bi. Ba, tuhan mikos ser sisar hagom.