YEREMIA 34 - ALLAH NIHYET MEM TUNGWATU NYA

Nisok nihyet mem Zedekiati

¹ Mpe dino Nebukadnezar di nibou ndig minu Babel ya tut nide tentara kin ngkiai nya kin minu nindigsi nya di icut binoni di yahati tut yok ba, injei bihwen minu ndig Yerusalem kin minu ndig ngot di jo ttai nya lene tuhan mbrap bit da.

² Noni cuk da leu api duug ngat Zedekia di nok nibou ndig mem minu Yehuda bidipai nisokti dini bak “Da di tuhan di Allah Israel midikes minu ndig dini ei nibou ndig minu Babel ninda nsi leu api noni mindig bingwig.

³ Bit bon anang ba, allu leu ninda nsi kan bi. Noro siceu mikat na bikes na bak nibou ndig minu Babel lene aum noni ba, ambrap pijum bit noni. Leu api nide limwa nya mibuwak na ug ei minu Babel.

⁴ Ma angig atingou mem dihyet di bitut na di Zedekia dini! Mporo atug ndei nimai tug hon pran bi.

⁵ Noro aba angon di jo nyahan bitug ndei nimai. Limwa nya mindig biei nggrai di ui-gwang kei mem nibiyok ngon kep nati bit leu nok mpe di po itig adigup bat-adigai bat di inyeng tak kep limwa nya nipou nani bigyo pima igyaisi. Yoni ingon ngguk bram na ba, yahara ‘Ayo! Nyende nibou ndig ningat rin bit nye bu bi o!’ Da di tuhan disimbot dat tu.”

⁶ Leu api dipai sut tuhan nisokti dima bak Nibou Ndig Zedekia ei minu ndig Yerusalem,

⁷ mem nijam di nibou ndig minu Babel kon pran bit tentara minu ndig dima bihwen yok. Mpe dima lene ikon pran bit tentara minu ndig Lakhis kin Aseka cem. Lewo minu ndig cin di jo ei minu Yehuda he rino bon tentara nibousi di igya coi di ngkiem tut yok ba, cut bigyo.

Timiei minu ndig Yerusalem iluei ingonti tut ide awak nya

⁸ Nibou Ndig Zedekia kin timiei minu ndig Yerusalem nya ipreu ei mem gima ikwek,

⁹ ide awak di mben Ibrani nok pinai nya kin sop nya leu api yuubon yok nok awak bu bi. Apino mben Ibrani hi muubon nide mben gom nok awak bu bi.

¹⁰ Nibou nya kin limwa nya di ipreu ei nok gima yahagom ikwek ide awak nya leu nuubon yok nok awakti dima bipai jit bipia miyuubon yok nok awak bu bi.

¹¹ Noro niabiati bu lene iluei ingonti ba, ikat awak pima yok biyuubon yok nok awak hanyen.

^12-13 Leu api tuhan di Allah Israel sok nihyet ei da dip mem yo dima bidipai biyok “Tirigi po dibuwak jidigup bat-jidigai bat nya kwei leu minu Mesir bidikwek yok leu nuubon yok nok awakti pima ne dipreu ei mem yok bipia,

¹⁴ awak di mben Ibrani di yai midyai nok awak kikau mem nijam ari bingwam nitindur muhwindagom tu lene suar niceu kwek noni leu nuubon no nok awakti ei ari bingwam gi nimuhwindacan ningwigsi. Noro jidigup bat-jidigai bat nya itug hon nipreu ei mem yokti dima bimiap kep mun di dipai biyok dima bi.

¹⁵ Njap poi pini jug ne jinggek tut jibon mun ngan-nganti ba, jibon kep mun di bipwoi dingon tug hon gi jice tut yam bipia mijikwek je di mben gom leu nuubon yok nok awakti. Jipreu ei nok gima bit Da ei Ditde Ig tu.

¹⁶ Noro niabiati bu jiluei jingonti ba, jibindei map kui dinyeng tug hon gi jikat awak di igyati kwes hanyen ba, jibidip huk yok binok awak mem je hanyen bu.

¹⁷ Gima rino Da di tuhan disimbot dat bipia apo jigimiap kep dihyet ba, jigikwek je di mben Israel gom leu nuubon yok nok awakti bi e? Gima rino nogindini ditri tut gi dikwek je leu nuubon je nok awakti tug hon gi jitug ndei nimai ei pranti kin nsuwer ajar di hwen jeti kin gi jimai ninggumti. Dibibon jeni bit leu nok gi jibibon sapi di jibui nok mikwau. Dibindei ba, ngkiai nya ei dihyeisi dini hagom igyai ttin tirigi ingat Ditde niyai munti di bitut jeni bou igyai him a.

¹⁸ Nibou di inyeng tak kep minu Yehuda kin minu ndig Yerusalem bitut yo di igya kui yok kin imam nya kin yo di igyai kep midyai nya nok mindor dihyei nya yahagom ibon nipreu ei mem Dati tut ide awak nya tug hon midut nipreu eisi. Ibui sapi ningut gom leu api israt hacan binok can leu api imbut ei nisra cin dima nikieti tu. Noro je di timiei minu ndig Yerusalem jiluei jingonti tut nipreu eisi dima kin nipreu eisi di mben Israel ipreu ei bit Da. Gima rino midibibon jeni noyam kin gi jibibon sapi dima.

^19-20 Midikes yo di imbut ei sapi nisra cin dima nikieti ei jide siceu nya inda nsi leu api ibui je bijimai sinsiou ei dihyei njek dip bijinok ha nya kin mindhe-ndhe di iten-pos nya ide mun di igyem.

²¹ Midikes Zedekia di nok nibou ndig mem minu Yehuda kin yo di igya kui noni ei yo di ijoi sut igyai nimai biyok nya indati. Dikes yok bak tentara Babel di sindi ikes inda leu nikon pranti bimbut leu su dima inda nsi.

²² Midiyai bindo biyok leu binhyepo tentara nya ingkwei hanyen kwei ei minu ndig dini. Leu api yoni mihwen minu ndig dini ba, igyai bigyati leu api indig bitimek. Dibindei ba, minu ndig ngot di jo ei minu Yehuda dem kep iggum ndigsi di hi bong ser bu bi. Da di tuhan disimbot dat tu.”