YEREMIA 31 - ALLAH NIHYET MEM TUNGWATU NYA

Mben Israel ingkwei hanyen ug ei itimieisi

¹ tuhan pai “Tto bou dem lene midinok tuhan mem mben Israel ide keret nya hagom leu api yoni inok Ditde limwa nya.

² Dindo Ditde ningon nggriu sut yokti bak yo di ingwes ngun leu nimai ei iggum ndigsi. Tirigi po mben Israel inggok mpia di ibong kei igwam kei eisi ne,

³ dindo Danti biyok leu minu ting. Je di mben Israel e, dingon ngakei je habiei ei nimbie him kikau kwei bipek ammani kep. Gima rino midingon ngakei je kikau.

⁴ Mpe dima lene dibindei ba, jinyeng jei nok gi nipou. Mijimpig jide mun di nggileng leu api jiba jingon di llei bibor bipri-pri nyen noyam kin gi nipou.

⁵ Mpe dima lene jiyai miai ba anggur ngat ei nungug him minu Samaria leu api je di jiyai miai dima mijipuk ningat bijiyem nok gi nipou.

⁶ Igbit ri! Ei nidipti bu lene yo di igya ser jide minu ei nungug tou Efraim nya ipai cuk yam ‘Jikwei ba, yahagom ikui ug ei Sion ba, idideu tuhan di nok ide Allah.’ ”

⁷ tuhan pai “Ma jiba doia bikiek Ditde limwa mben Israel lewo inyeng jei bibor njiriek ngkiai nya yahagom. Ma jiba doia binggei sut tuhan bijitri tut bipia Noni teu Nide limwa nindigsi nya bingwes ngun tu.

⁸ Midibuwak yok kwei leu nite bei mpia nijjai bidinduk yok kwei leu minu nohon keti. Yo di igyai tu nya kin yo di ilit nya yahagom mibit yok kwei bitut sop di inghop kin sop di sindi inghim dut tut munggwom nya cem. Imang ndig mikwei hanyen ei itimieisi dini.

⁹ Igyai nggwei kibor kak puig sinon. Midiwin kep ingonti ba, dibuwak yok kwei cem. Midibie tut yok ug ei mpia di bon minyei nggram nya mang bibor bimbut kak puig di sur yam kei di ikinoi kan bi. Dibon Danti bidinok mben Israel icig ba, Efraim ne dipmot mighumbou ri.”

¹⁰ tuhan pai “Je di ngkiai nya e, ma jingig jitingou mem dihyet! Jitri tut dicuk jeti nya kikau ug ei muk nite dima ug. Midinduk Ditde limwa di dibindei ntek gimahap yok ei ingkiaisi hanyen kwei. Midinyohou yok dem kep nok gembala di ya ser nide domba nya.

¹¹ Dikwek limwa mben Israel ba, diteu yok bingwes ngun leu mben gom di sindem bibor nindati.

¹² Iba iimaisi di sieng kei kin ingon di llei bibor bikwei ei Nungug Sion. Iba doia bikiek mun di dinjei bak yoni nok gandum kin mini zaitun kin ba anggur ngei kin sapi kin domba nya. Midibindei ba, inok miai di nnum bibor ei minyei nggram kieti nya apino indwau sut mun nyeng hi bu bi.

¹³ Mpe dima lene sop gwam nitta pilei nya miba ingon di llei bibor bipri-pri nyen ba, pinai pilei nya kin andigpoi nya ingon nggei-hi-nggei. Midipai-hi-pai yokti lene midiba ningon di kei bibor biluei ide ningon di ngguk biborti ba, midiba ningon nggei-hi-nggeisi biluei ide ningon buhun.

¹⁴ Midibindei ba, imam nya igyem kep njita ninyeng hagom bindei yok lene dinjei mun di Ditde limwa nya isuar nya hagom bak yoni. Da di tuhan disimbot dat tu.”

tuhan ngondut mben Israel

¹⁵ tuhan pai “Nibimbiti tibim kwei leu minu mien Rama. Timiei nya ipim bibwos ba, ipim nggruet cem drek dip Rahel di ningon ngguk tut nimunggwom bat nya ba, kou sut gima hi gwam ser ningona lewo nimunggwom bat nya yahagom imai su.

¹⁶ Ma jiyai nggwei kibor bu au! Ma jicon jiyai nggwei leu jiyai a! Jicom jahanggwap mikuisi tut jimunggwom bat nya bi. Mijitug ndei jimuhup dino jimunggwom bat nya mingwes ngun hanyen leu ingkiaisi.

¹⁷ Ide ningwes ngun hanyenti mibiwin jingonti apino yoni mibon ide nintun him yamti di bram yam nya ei nidipti bu.

¹⁸ Dimiap Ditde limwa mben Israel tirigi iba ingon di buhun hara Da ‘tuhan e, nyeni ninoyam kin mindhe di hi pijuk bigyo noro apingok nyeni ningonti ba, nibit ahyet tu. Nogindini nitin ei mem ningkwei hanyen ndam Na. Gima rino nyende tuhan Allah e, ma aya um nye.

¹⁹ Niba ninghim bak Nani noro jei bi ne nittin ser sisar dima. Niabiati akes hukum ei nyeni dip leu su lene nindun bou lewo ningon buhun bibor. Nimmai sut nyenti ba, nisuwok cem drek dip sisar di nibon ei nipilei.’

²⁰ Na di Israel e, anok dipmot di dingondut kin dingon kieti kin dingon him cem. Bikwop mpe dino dikon dihyet kep na lene diyok ngon kep na ba, dingon ya mem na. Midiba ningon nggriu bibon na.

²¹ Ma jita wa nya di bindo puig nahau yamti. Ma jita patok nya kak puig di igbit bijinggok puig di jikak tirigi po jimbut kak nipou pima. Ma jingkwei hanyen kwei ei jitimieisi po jimbut leu pima.

²² Je di jingon gom tut Da bi e, jihig jingon eisi kikau buug ei apig bu i? Dipai tes mun di nijep-jau bu ei dihyeisi dini tu. Mun dima rino no di pinai gwam coi no di sop.”

Allah de limwa nya mibong kei migwam kei ei nidipti bu

²³ tuhan di mben Israel ide Allah Di Sindem Bibor pai “Tirigi dibindei ba, Ditde limwa nya ibong kei igwam kei ei itimieisi hanyen lene timiei minu Yehuda kin minu mien nya ibohom ndat, ‘Nnaba tuhan njei mun di kei bak nungug tou di kwes-kwau ei minu ndig Yerusalem kin Nide nghim nsi di dia-diau kei.’

²⁴ Timiei nya mibong ser minu Yehuda bitut minu mien nya cem. Ba, yo di igyai miai igkei nya kin yo di ighyen kep sapi kin domba nya ingat rin ei sirima bu.

²⁵ Midibindei ba, yo di inghuisi jet nya inghuisi sindem hanyen ba, yo di inghuisi mbris drek dip ninggum di hwen yok migyem njita bigyai nisindemti bu.

²⁶ Mpe dima lene tungwatu nya mipai ‘Dibong mai kep dinghuisi leu api dikiju lo, dinghuisi kwes hanyen.’

²⁷ Da di tuhan dipai bipia ei nidipti bu lene dibindei ba, minu Israel kin Yehuda mpung tut tungwatu nya kin mindhe-ndhe nya.

²⁸ Bit leu nok gi po dinyohou yok leu api disrep tut nibou ndig nya cem dinggek tut ide ninyeng tak kep limwati nya bingwig cem dibindei sar yok cem ei niabiati bu tu pima lene midinyohou ta yok binddong kei bidiwin yok hanyen.

²⁹ Mpe dima lene tungwatu nya mikes hon ba, isimbot dat nihyet nibiti nindati dini bu bi. ‘Andigpoi nya igyem ba anggur ngat di hyenha apino imunggwom bat nya ikwai hyenha drek dip.’

³⁰ Noro bikwop no di yem ba anggur ngat di hyenha nongkom he rino nikwai hyenha drek dip. Bikwop tungwa tou rino bon sisar lene nongkom he rino mitug ndei nimai drek dip.”

³¹ tuhan pai “Ei nidipti bu lene diyai gi preu nijep mem Ditde limwa mben Israel kin timiei Yehuda nya.

³² Gi preu nijep dima noyam kin gi preu nitimiei di dipreu ei mem idigup bat-idigai bat nya tirigi dinyohou cen yok kwei leu minu Mesir bi. Mbro nok gino dibon Danti bidinok ijjep lo, ikou sut mun di dipreu ei mem yok.

³³ Noro tini bu ne dipreu ei mem mben Israel nok gini. Dipwoi Ditde niggai serti nya ei ibou ngwakti bidipas kep dicukti nya ei ingonti. Dinok ide Allah lene yoni inok Ditde limwa nya.

³⁴ Mpe dima lene ingginau isut bat nya bitri tut ighyet bak ide bat nya nok gini bu bi, ‘Suar aba angon bisrip tut tuhan.’ Lewo yo di inyeng jei nya kikau ug bipek kin yo di ibon inyeng bi nya yahagom iba ingon bisrip tut tuhan tu. Midikos ser ide sisar bidiyok ngon kep ide mun di igyai tunggwei nya bu bi. Da di tuhan disimbot dat tu.”

³⁵ tuhan pai tes mpia njap di piga digai njap kin bed mmun kin ham mpia-bbed him nya di ipiga digai mmun. Noni bindei ba, muk ngwa dip roi ug roi kwei ba, nibimbi bong cem. Ninyeng rino tuhan Di Sindem Bibor.

³⁶ Noni preu ei mem nye “Mben Israel mintun yam him nok Ditde limwa nya kikau ug bipek dihyeisi dini ningwig honti.

³⁷ Gino hi sindem mem gima nai mpia-bbed him nijeisi bijuk ug ei dihyei jou biyok niyai kep dihyei nikiou nya nisurti-nipekti apino tuhan micom mben Israel drek dip igyai munti di kinei bibor nya. Da di tuhan disimbot dat tu.”

³⁸ tuhan pai “Ei nidipti bu ne tungwatu nya miwin Ditde minu ndig Yerusalem hanyen ei ig di bon ninggre di jo-jo yam dip di ninyeng Hananeel ei nungug tig dip kikau ug bipek kin Dimbou Pmem Huisi ba,

³⁹ nungug tig dima mbut kikau leu bei mpia nicutti ug bipek kin nungug tou Gareb kikau ug bipek kin Goa.

⁴⁰ Tungwatu nya mipigig sut mbang briep di itig nimai ngut ei ba, icom mumpiang cem eisi mem Dani bitut hanjop nsi nya ei Minyei Kidron nijjai kikau ug bipek kin Dimbou Hui Kuda ei nite bei mpia nipriti. Tungwatu nya minggek minu ndig Yerusalem bibindei timek bingwig bu bi sren.”