YEREMIA 30 - ALLAH NIHYET MEM TUNGWATU NYA

tuhan de nipreu ei mem Nide limwa nyati

¹ tuhan di Allah Israel,

² pai bida “Apas mun di dipai bina dini hagom ei srat gomti,

³ lewo tto bou dem leu api midingkwei Ditde limwa mben Israel kin Yehuda hanyen ei ide nibong kei nigwam keiti nok gi nipou bu. Midibuwak yok kwei bidikes yok ei minu di diyai bak idigup bat-idigai bat nya hanyen leu api yoni igyai bigyati hanyen nok ide dihyei ninda rom. Da di tuhan disimbot dat tu.”

⁴ tuhan pai bak Nide limwa di mben Israel kin Yehuda,

⁵ “Dimiap yo di idigit-digoi nya ighyet di yahara tu. Dimiap yo di ingon ttin bibor di ibong kei igwam kei bu bi nya ighyet tu.

⁶ Ma jikan-kan nyen tut ba, jibingig jiyai kep mun nyeng gom. Bon no di pinai srek tut nimunggwom e? Gi bi ne nggon rino dingat bikwop pinai nya iimaisi hai di iba inda bikat kep inghopti dem kep nok sop di srek tut nimunggwom i?

⁷ Tto bou di kwei sut mun di buhun bibor dideu su. Bit bon hi binai sut njap di buhun bibor dima kin njap hiter kan bi. Njap dima ne njap di bindei ningon mbut-mbut nyenti mem Ditde limwa nya rin noro miditeu yok bingwes ngun.”

⁸ tuhan Di Sindem Bibor pai bak Nide limwa nya bu “Gino njap dima dem ne mididahat biei koisi di ibisrou jinggibi dip leu je. Midibindei tun lante di ibiteu je cem leu api jinok awak mem ngkiai nya bu bi.

⁹ Mijikuk je bijinok awak mem jide tuhan Allah di Dani kin no di ntun Daud him di dita nok nibou ndig hanyen cem.

¹⁰ Ditde limwa mben Israel e, ma jingon ttin bibor au! Ditde awak di intun Yakub him e, ma jidigit-digoi tut au. Miditeu jeni kin yo di intun jeni him nya bijingwes ngun leu jingkiaisi di ting bibor di jisima eisi. Jingkwei hanyen bijibong kei jigwam kei ei jitimieisi hanyen leu api mun nyeng hi bindei ba, jittin tut bi.

¹¹ Midihwou teu je bijingwes ngun ba, dibindei sar ngkiai nya di dibindei ntek je ug eisi nya yahagom. Noro dibibon je nok gima bi. Ningat ne mijingwes ngun leu hukum bi. Noro hukum di dikes ei jeni dip dima ne hukum di tug hon Ditde ningon gomti rin ba, dem igbit nikos tutti di jo tu. Da di tuhan disimbot dat tu.”

¹² tuhan pai bak Nide limwa nya “Jide ninggwenti buhun bibor. Obat dem mem jibokti dima bi.

¹³ Tungwa hi dima brim ningkek bibindei ba, jiyai jingkek ngun eisi hanyen bi. Obat hi jo mem jibuhwei nya bi. Bit bon jikei hanyen kan bi.

¹⁴ Jide ningon kieti nya yahagom ibbwe ser je ba, ingon hou ser je tu. Didem kep siceu di cut igkep je bihwen je. Diba Ditde nigga biborti bikes hukum ei jeni dip lewo jide sisar mang bibor ba, jitunggweisi nindig bibor.

¹⁵ Ma jinso tut jibokti nya bu au. Lewo dem tut gima jikei hanyen bi. Gima ne hukum di dikes ei je dip rin lewo jide sisar mang bibor ba, jitunggweisi nindig bibor.

¹⁶ Noro tini bu ne midipinde yo di ipinde je yahagom. Ngkiai nya mikat jide siceu nya yahagom bikri yok ug ei ingkiaisi. Midico kep yo di ico kep je bidipos ndigban leu yo di ipos jide ndigban yahagom.

¹⁷ Mbro nok gino jide siceu nya isimbot dat ‘tuhan com mben Sion tu leu api hi dima nyohou yok bu bi.’ ‘Lo, midibindei ba, jinghuisi kwes bidiba obat bidip jibokti nya hanyen.’ ”

¹⁸ tuhan pai bu “Midingondut Ditde limwa di jeni. Midibindei ba, jibong kei jigwam kei ei jitimieisi hanyen. Mpe dima lene jiwin minu ndig Yerusalem hanyen bu lene jikinding ig nibou ndig nikineisi hanyen.

¹⁹ Timiei minu ndig Yerusalem nya miba doia bikon dinyenga. Yoni iba ingon di kei bimbos-hi-mbos cem. Dibindei ba, ngkiai nya ibou cut biyok. Ighyet kinei sut yok bu bi. Ditde limwa nya imangti mikum eisi kikau.

²⁰ Midibindei ba, mimbri kui jide ninyeng tak kepti nok gi nipou ba, jinok Ditde limwa di igya nddong kei nya hanyen. Midikes hukum ei yo di ico kep tungwatu nya yahagom dip.

^21-22 Nibou ndig di ninyeng tak kep je nimbier mikim je di mben Israel hanyen ba, nibou ndig di ninyeng jei mem je mikiju leu jenti jikieti. Gino dihig noni kwei lene mun nyeng hi mibigen ser noni tut gima son dideu Da bi. Lewo tou rino brim ningkek bikwei ngat Da gino dihig noni kwei bi i? Mpe dima lene jinok Ditde limwa nya bidinok jide Allah. Da di tuhan disimbot dat tu.”

^23-24 tuhan niggati dem kep hou sigau kin hou di nimig ten di ba sigau biyai di hwen yo di isibut nya. Hou dima ntus bi bibou Nide ningon kanti nya hagom pek kep ug e. Nide limwa nya mingon dorti tut gima ei nidipti bu yo.