YEHEZKIEL 35 - ALLAH NIHYET MEM TUNGWATU NYA

Allah kes hukum ei minu Edom dip

¹ tuhan pai bida,

² “Na di tungwatu di ayaijo kikau bi e, ma asigion minu Edom hak.

³ Ma atri tut mun di Da di tuhan Di Dinyeng Jei Bibor dipai bak timiei minu dima nya, ‘Je di timiei nungug him ei minu Edom e, Da dini ne jide nitok ri. Midibindei jide dihyei ba, mpia mbum-bra bram leu api hi di bong ser bi.

⁴ Midibindei minu ndig ngot di jide nya ba, hagom wer ig kum kroi apino mijikan tut bipia Dani ne tuhan ri.

⁵ Jiba nitok bak Israel habiei kwei su bijisindui sut ba, siceu nya ibui yok nok mikwau ei mpe dino mun di buhun gi ningwigsi cut igkep yok drek dip ide sisar.

⁶ Gima rino dipai tug hon Da di Allah di niyaijo kin tuhan Di Dinyeng Jei Bibor cem dinyeng bipia Allah dimig nimaisi ei mem je. Bit bon jingwes ngun leu nimai dima kan bi. Jibon mun tunggwei lewo jihwen mun apino nihwen munti huk bram je.

⁷ Midibindei minu ndig ngot jide di jo nungug him ei minu Edom ba, mpia mbum-bra bram. Bikwop tungwagom-gom di mbut kak mpia dima mitug ndei nimai.

⁸ Midiba jingut bijun nungug hagom ba, mbigdip kin mbang briep nya mpung tut nimbiam ngut di ikrop ei pranti a.

⁹ Midibindei minu jide binok iggum ndigsi di ha ngunti ba, hi di mibong ser jide minu ndig ngot dima bu bi bijo ninno bijo kikau. Apino mijikan tut bipia Dani ne tuhan ri.

¹⁰ Jipai bipia Yehuda kin Israel bitut ide dihyei ne jidihyei ri. Ba, jibipai bipia mbro nok gino ide Allah rino Da di tuhan lo, mijima ide dihyei bou je nok jidihyei.

¹¹ Gima rino dipai tug hon Da di Allah di niyaijo kin tuhan Di Dinyeng Jei Bibor cem dinyeng bipia midibuhup jiyai munti dima hanyen. Lewo jigga Ditde limwa nya bijibou dut ser yok cem jingon sibui sut yok cem. Mijo nibreisi mem yok bipia dikes hukum ei je dip drek dip jide nibon munti di bitut yoni.

¹² Apino mijikan tut bipia Da di tuhan dimiap tut gi jiba jihyet bicig yok ei mpe di jipai bipia nungug nya ei minu Israel mpia mbum-bra bram tu. Gima rino jicoi bijiya kep yok noyam kin njita di jiyem.

¹³ Mben Edom e, jinsi bbed bijiba jingon di jei bitri tut jihyet biDa. Dimiap gima yok hagom tu.

¹⁴ Da di tuhan Di Dinyeng Jei Bibor dipai bipia tungwatu dihyeisi dini titut yam ingon kei ei mpe dino dibindei jide minu titut yam wer iggum ndigsi di mbum-bra bram,

¹⁵ bit leu nok jide ningon kei kep Ditde limwa di Israelti ei mpe di mpia mbum-bra bram yok. Nungug Seir nya he bi noro minu Edom titut yam mimbum-bra ri. Apino yahagom mikan tut bipia Dani ne tuhan ri.’ ”