YEHEZKIEL 29 - ALLAH NIHYET MEM TUNGWATU NYA

Nimbot kepti tut hukum di micut igkep mben Mesir

¹ Nijam di nibong ei ningkiaisi dima ug ei njap gi nisimnaibrimigcan mem bed gi nisimnai ei ari bingwam gi nisimnai ne tuhan pai bida,

² “Na di tungwatu di ayaijo kikau bi e, ma asigion nibou ndig minu Mesir. Apai bak bipia midikes hukum ei noni dip bitut nide limwa nya yahagom.”

³ tuhan Di Ninyeng Jei Bibor cuk da biditri tut nisokti dini bak nibou ndig minu Mesir. “Na di unggor ndig bibor di abong ei minyei nggimau yon e, Dani ne ade nitok ri. Asuglai mun bipia ajem Minyei Pmem Nil bou na nok ade lewo nani rino apai tes a.

⁴ Midiba nikoisi bisrou aji bidibindei ba, wau nya mirap annan leu api midibrim na leu Minyei Pmem Nil bitut wau ngot di rap annan dima cem.

⁵ Leu api midicom na tut wau ngot dima hagom ug ei iggum ndigsi leu api acut ug ei dihyeisi ba, angut bong njiti ei sirima. Hi di mitig na bi. Dikes angut bijo hak ei binok ha nya kin mindhe nindigsi nya ide mun di igyem.

⁶ Leu api mben Mesir yahagom mikan tut bipia Dani ne tuhan ri.” tuhan pai “Je di mben Mesir e! Mben Israel igyok ingon mem gima jimpu yok lo, jidem kep tom di jet-jop he.

⁷ Tirigi irok kui na lene adahat ba, abiam ingousi apino inghim dahat a.

⁸ Gima rino Da di tuhan Di Dinyeng Jei Bibor dipai bina bipia midipinak tentara di iba singau simeda bihwen na ba, ibiyai nimai bak timiei nya bitut mindhe-ndhe ade nya cem.

⁹ Minu Mesir miwer minu prenti di mpia mbum-bra bram apino akan tut bipia Dani ne tuhan ri.” tuhan pai “Nibou ndig minu Mesir e! Ajem Minyei Pmem Nil bou na nok ade lewo nani rino apai tes e?

¹⁰ Dani ne ade nitok rin ba, dinok nitok mem Minyei Pmem Nil cem. Midibindei ba, minu Mesir titut yam wer dihyei di mpia mbum-bra bram ei minu ndig Migdol ei nite bei mpia nijjai kikau ug bipek kin minu ndig Aswan ei nite bei mpia nibiho kikau ug bipek kin mben Sudan ide minu niya kwas yamti.

¹¹ Ba, tungwatu kin mindhe-ndhe nya mimbut kak bibong eisi bi kikau mem nijam ari bingwam nyatungwacan.

¹² Midibindei minu Mesir ba, mpia mbum-bra bram. Minu Mesir nimbum-brati dor tunggwei bibor leu minu hiter ide nimbum-brati a. Minu ndig ngot ei minu Mesir miwer ig kum kroi bibor dor njiriek minu ndig nindigsi nya ide niwer ig kum kroisi nya. Midibindei ba, mben Mesir inok yo di ipri-pri nyen bintek bidem minu hagom bibong ngkiai ei yo di hiter nya ikieti he.”

¹³ tuhan Di Ninyeng Jei Bibor pai “Mben Mesir e, ari bingwam nyatungwacan dima ngwig leu lene midibuwak je hanyen kwei leu minu di jintek gimahap ug eisi nya.

¹⁴ Midibindei ba, jibong kei jigwam kei nok gi nipou pima hanyen. Midisindui sut ba, jibong ei minu Mesir ei nite bei mpia nibiho. Lewo gima ne jide dihyei di jimbut leu pima ri. Jide ninyeng tak kep limwa nyati mijet-jop bibor,

¹⁵ dor njiriek minu hiter ei dihyei njek dip hagom. Midibindei ba, jijet-jop bibor apino bit bon jinyeng tak kep mben hiter nya bijikon jinyeng bijei kan bi.

¹⁶ Mben Israel yahara jeni mem gima jimpu yok bu bi. Mben Mesir e, mun di cut igkep je dima mibipingok mben Israel ingonti bipia ikiowi bibor tut gi iba ingon com je di mben Mesir. Leu api mben Israel mikan tut bipia Dani ne tuhan Di Dinyeng Jei Bibor ri.”

Nibou Ndig Nebukadnezar mibindei timek minu Mesir

¹⁷ Nijam di nibong ei ningkiaisi dima ug ei njap gi nigom mem bed gi nigom ei ari bingwam gi ningot bitai ba, muhwindacan ne tuhan pai bida,

¹⁸ “Na di tungwatu di ayaijo kikau bi e, Nibou Ndig Nebukadnezar leu minu Babel cuk nide tentara nya ba, injei bihwen minu ndig Tirus sindem tu. Noni cuk yok ba, ikon ndigban di buhun bibor apino ibou le drek dip ba, inghat bok bibor cem. Noro nibou ndig kin nide tentara nya igitug ndei ningat bipek kep yahanggwap di icom dima bi.

¹⁹ Gima rino Da di tuhan Di Dinyeng Jei Bibor dipai bipia midiyai minu Mesir bak Nibou Ndig Nebukadnezar. Noni miba nisibut bicat ide ndigban bikikam hagom bingwig ba, pian ide mun di inyeng tut nya hagom buug sut bikwas tut nide tentara nya nok imuhup.

²⁰ Diba ndigban minu Mesir bibuhup bak nibou ndig pima tut mun di bon mem Da tug hon nide tentara nya lewo ningat ne igyai midyai mem Da. Da di tuhan Di Dinyeng Jei Bibor disimbot dat tu.

²¹ Tirigi mun dima pek kep mem yok lene midibindei Israel nok mben di isindem bibor. Ba, gima mibon nituti mem na di Yehezkiel ba, atri tut nihyet bak limwa nya apino yahagom mimiap kep ahyet a. Leu api yoni mikan tut bipia Dani ne tuhan ri.”