TITUS 1 - ALLAH NIHYET MEM TUNGWATU NYA

Paulus pigo Titus

¹ Srat dini leu da di Paulus. Dinok awak mem Allah bidiyai dinyeng nok no di ya kui Yesus. Allah dimig da leu binhyepo dibiwin kep yo di Noni dimig ei su nya ide niba ningon com Kristusti. Dipingok ingonti leu binhyepo ingon dorti tut nihyet di nijit di bindei ba, igyai munti nya bit leu Allah ningon kanti mem yok.

² Ide niba ningon com Kristusti kin ide ningon dorti tut nihyetti ntun gi igyok ingon mem niyaijo nijep di jo kikausi di Allah preu ei mem nye habiei ei nimbie him. Ba, bit bon Noni ris binye kan bi.

³ Tirigi tto bou dem ne Noni kau leu niyaijo nijep di jo kikau tug hon Nonti nihyet. Allah ba ningon com da tut nihyet dima leu api ditri tut bit leu nicuk dati. Noni ne Nibou Ndig di teu nye leu sisar biyai niyaijo nijep binye ri.

⁴ Dipas kep srat dini mem na di Titus lewo anok dipmot di nijit tug hon side niba ningon com Tuhanti. Handei kon ba, Sicig Allah kin side Tuhan Yesus Kristus isingat tut na ba, ibiyai angon jo nyahan.

Ningginausi tut yo di idem mem ibie tut yo di mbusyamei nya

⁵ Dikes na ei Mios Kreta leu binhyepo aprios kep bram mun di niken bu ba, ata nibou mbusyamei nggi minu di yo di mbusyamei nya ingat rin eisi. Ma ayok ngon kep dipingok nati nya.

⁶ Suar nibou mbusyamei ningon gom ba, wak sop gom ngat he, ba, nimunggwom bat nya ingon jo kep Kristus lene ma ingkek ndok bico kep icig-ipmem nya ighyet au.

⁷ Suar nibou mbusyamei ningon gom lewo ninyeng tak kep Allah de midyai nya. Ma ningon jei cem gga-gga wai cem dut mun di pu noni cem bui tungwatu nya cem ningon pri kep mitiei nindig bibor cem au.

⁸ Suar noni cigit tungwatu nya kui ig cem ta nibou ei mun di kei nyati cem om kep ningon cem ningon sren cem ningon kwes kin Allah cem yai mun di hagom mmuti cem.

⁹ Ba, suar noni krau kep nihyet di Kristus ngginau nye tut di iba ingon com tu. Tug hon nisinati dima ne noni sindem mem gima ba ningginausi di nijit biwin kep yo di mbusyamei ingonti ba, brim ningkek kep yo di isrep tut nihyet ba, ndo mun di igyai tunggwei nya brei biyok.

¹⁰ Lewo yo di isrep tut nihyet imang bibor yo rinaha ba, gi bibor hak rino yo di ibit Puig Yahudi nicukti di iba ighyet minyei biris tungwatu nya.

¹¹ Suar asok kep yo dima ngkiem leu binhyepo ikimut yuhug hak ug. Lewo iba nihyet minyei binggek tut mbusyamei ninsi de nya imang bibor ba, ibipek mitiei nindig bibor leu yok. Igyaisi dima igbit bi!

¹² Ba, nabi di timiei Kreta gom pai sut yok “Mben Kreta ibicum cem inok mindhe di niten-pos cem inghen cem inghop bou cem bijo ninno.”

¹³ Nipaisi dima igbit. Gima rino ma asok kep yok ngkiem leu binhyepo ikrau kep ningginausi di nijit ba,

¹⁴ yuhuk bram mben Yahudi ide mumpui kin ide nidimig sutti nya di kwei leu yo di ingon mpo tut nihyet di nijit bu au.

¹⁵ Mun nyeng hagom kwes mem yo di ingon kwes nya. Noro mem yo di ingon rom nya kin yo di ingon jo kep bi nya ne mun nyeng hi kwes bi. Lewo ikan-kan nyenti kin ingon mien nya rom-rau.

¹⁶ Yo dima ipai sut yonti bipia ikan tut Allah noro igyai munti nya srep tut ipaisi. Allah niyai ngkek ttin igyai munti nya lewo ibit nihyet bi. Dem tut gima igyai kep mun nyeng di kei gom cem bi.