TIMOTIUS GI NIGOM 1 - ALLAH NIHYET MEM TUNGWATU NYA

Paulus pigo Timotius

¹ Srat dini leu da di Paulus ba, diyai dinyeng nok no di ya kui Yesus tug hon Allah di teu nye leu sisar biyai niyaijo nijep binye nicuk dati kin Kristus Yesus di iba ingon com nicuk dati.

² Srat dini mem na di Timotius ba, anok dipmot ningat tug hon side niba ningon com Tuhanti. Handei kon ba, Sicig Allah kin side Tuhan Yesus Kristus isingat tut na bingondut na cem ba, ibiyai angon jo nyahan.

Paulus sok kep Timotius tut nihyet nitrowai nya

³ Akan kep bipia tirigi dijo leu minu ndig Efesus ba, duug ei hanjop Makedonia lene dicuk nani leu binhyema akes minu ndig Efesus hak ba, ambut leu au. Leu binhyepo asok kep ibou poi ei mpia dima ngkiem ser nhyema iba nihyet nitrowai bingginau tungwatu nya bu au.

⁴ Ma yo dima isimbot kep biyam kikau sut mumpui hyet kin nitig pung bijo ninnoti au. Mun dima yok hagom ribindei dino iliriem yam. Nok gima cem mun dima yok ribindei mbut Allah ningon kanti bi. Allah ningon kanti dima ne tungwatu nya ikan tut tug hon ide niba ningon com Noniti.

⁵ Disok dihyet bina leu binhyepo abindei mbut ningon ngakei yamti tug hon ningon di kwes kin Allahti kin ningon mien di pai kep nyeti bi kin niba ningon com Kristus mungkunti.

⁶ Ibou poi ikes mun dini yok hagom ei su ba, iba ighyet minyei bidahat yam bisrawir tu.

⁷ Yo dini indo yonti nok guru di ingon ki tut Puig Yahudi ningginausi noro ingon kiowi niti tut mun di itri tut kin mun di iba ighyet bidahat yam di bindei ba, ingon jei.

⁸ Nyeni ikan tut bipia Puig Yahudi niggai serti kei mem nye gino itri tut Puig dima bit leu Allah ningon kanti mem nye.

⁹ Jo nibreisi bipia nibou ndig nya ipas kep niggai serti nya drek dip yo di ingon kwes nya bi. Noro drek dip yo di ipigau hanjop kin yo di isibut bibor kin yo di ingkek ndok kin nibon kep sisar cig kin yo di Allah ninghim kin yo di isingat bi kin yo diihwen icig bat-ipmem bat nya kin nihwen kep mun cig,

¹⁰ kin yo di icut tut yam kin pinai yonti di icut tut yam kin sop yonti di icut tut yam kin yo di ipos tungwatu bitri yok nok awak ba, ibipek mitiei kin niris kep mun cig kin yo di iris mun ei nikei noho bei bitut yo di igyai mun nindigsi di tte tut ningginausi di ntun Nihyet Di Kei him.

¹¹ Ningginausi dima jo ei Nihyet Di Keiti. Nihyet Di Kei di leu Allah di kei-kau-kei ba, ma ikon ninyenga. Lewo Noni ba ningon com da tut Nihyet Di Kei di ditri tut cem.

Paulus nggei sut Allah di singat tut noni

¹² Dijem sigyo bak ide Tuhan Yesus Kristus di sindem tut da mem midyai di diyai nya. Dijem sigyo bak Noni lewo Noni kan bipia didem mem midyai di Noni ndo bida.

¹³ Mbro nok gino dikucang Noni ba, dihwen bit Noni bidihyet tigut Noni nipou su lo, Noni singat tut da lewo kan bipia dingon tindur ba, dikan tut diyai munti nya dima bi.

¹⁴ Ide Tuhan Yesus Kristus singat tut da nindig bibor bibindei ba, diba dingon com Noni ba, dingon ngakei tungwatu nya cem. Noni yai nisindemti ninyeng can dini bak yo di inok gom kin Kristus yahagom.

¹⁵ Dipaisi dini ne nijit-jau ri. Gima rino ma tungwatu nya ice tut ba, ingon jo kep bipia “Kristus Yesus srek kwei ei dihyeisi dini leu binhyepo teu tungwatu nya leu sisar biyai niyaijo nijep biyok.” Noro tut dani ne dibon sisar nindig bibor dor njiriek nindigsi nya yahagom.

¹⁶ Noro Allah singat tut da drek dip leu binhyepo Kristus Yesus moom ningon tut da di dinok no di bon sisar nindig bibor dor njiriek nindigsi nya yahagom. Lene gini ndo bindo bak yo di ingon jo kep Noni bigyai niyaijo nijep di jo kikau ei nidipti bu.

¹⁷ Dem mem gima inggei sut Allah Nongkom di Nibou Ndig bidem nijam hagom. Niyaijo kikau ba, bit bon tungwatu nya ingat Noni bou igyai him kan bi. Ma ikon ninyeng kikau buug hon nohonti bi! Igbit ri.

¹⁸ Dipmot Timotius ug o! Disok dihyet dini mem na bidibiwin kep angonti tut nihyet di nabi nya itri di bitut na nipou su. Ma aba nihyet di itri tut di bitut nani dima bitindei ser dem kep nok tentara di dem mem pran.

¹⁹ Ma anyohou ade niba ningon com Kristusti kin ade ningon mien kanti leu binhyepo hacem kwes kei. Ibou poi ingkek ndok tut ingon mien kanti apino inok kibar di tug bor bisrawir.

²⁰ Yo dini bihi nok Himeneus kin Aleksander. Dikes yok ei Bilis nindati leu binhyepo itug ndei hukum leu binhyepo hukum dima bindei ba, ikes hon bikucang Allah bu bi.