TESALONIKA GI NIGOM 4 - ALLAH NIHYET MEM TUNGWATU NYA

Ningginausi tut niyaijoti di bindei di Allah joi sut nye

¹ Disut bat jen, ningat ne nindo bindo di kei bije tut notou jide niyaijoti bindei ba, Allah joi sut je. Jo nibreisi bipia jiyaijo nok gima tu. Nogindini nitigtai je binipingok jingonti tug hon nisindemti di kwei leu Tuhan Yesus leu binhyepo jibikum nut bu.

² Lewo jikan tut nipingok jeti di nikes bije tug hon nisindemti di kwei leu Tuhan Yesus tu.

³ Allah ningon kanti mem je rinok gini. Suar jingon kwes-kwau bijimbres jenti leu sisar nicut tut yamti.

⁴ Suar bikwop pinai di ingat rin ei jikieti suar kan tut gi ba ningon di kwes di bindei ba, Allah kin tungwatu nya ijoi sut noni bibong bit nitnem.

⁵ Lene ma ba niyai can noyam kin yo di ingon tindur di ikan tut Allah bi nya di ikrar kep yam bibong bit nitnem au.

⁶ Tut gima ne ma hi bon mun tunggwei sut nisut hi biris noni au. Nisok kep je ngkiem ser nipou su bipia Tuhan mikes hukum ei yo di ibon mun tunggwei nok gima dip.

⁷ Lewo Allah hig nye bidimig nye mem gi ibon kep sisar nicut tut yamti bi noro mem gima iba ide niyai munti nya bibon ba, Allah joi sut nye.

⁸ Gima rino tungwa tou rino rok ningginausi dini lene rok tungwatu nya ighyet bi noro rok Allah di kes Ninnei nyahan ei jingonti nihyet tu.

⁹ Suar dipas mun nyeng hi ei srat diniti tut jingon ngakei yamti bi. Lewo Allah Nonti pingok ei jingonti tut jingon ngakei yamti tu.

¹⁰ Ningat ne jingon ngakei jisut bat yo di ingon jo kep nya bidem hanjop Makedonia nisurti-nipekti tu. Gima rino nitigtai je leu binhyepo jikum ei jide niyaijoti di kei biborti dor njiriek bu.

¹¹ Ma jita jibou ei ningon di jo nyahanti kin nibiang jenti jide minaisi ba, jibitug ndei mun di jisuar nya tug hon gi jinda jo kep jide midyai nya. Gima hagom bit leu nok gi nicuk je tut nipou su.

¹² Gino jahagom jiyaijo nok gima lene jitindei kep yo di hiter indati tut mun di bahati tut je bi. Gi nok ne yo di ingon jo kep Kristus bi nya mikon jinyenga.

Ningginausi tut Tuhan Yesus nikwei hanyenti

¹³ Disut bat jen, gi kei mem jiyok ngon kep ningginausi di nijit-jau tut yo di imai su nya leu binhyepo jingon ngguk bram yok noyam kin yo di igyok ingon mem gima igyai niyaijo kikau bi nya au.

¹⁴ Nyeni ingon jo kep bipia Yesus mai leu api kiju hanyen leu nimai eisi. Gima rino ingon jo kep bipia Allah miwin yo di ingon jo kep Yesus di imai su nya hanyen leu imai eisi leu binhyepo igyaijo kikau bit Noni.

¹⁵ Tut gima ne gi kei mem nitri tut Tuhan ningginausi dini bije. Njap dino Tuhan Yesus ttau hanyen kwei ne nye di igyaijo mikui biyuum Noni dor njiriek yo di imai su nya bi.

¹⁶ Mpe dima lene Allah nihyet sra tut nicukti lene malaikati nibou ndig nihyet kin Allah de pun mbrei hacem mitibim leu api Tuhan Yesus Nonti mijuk kwei leu gwamti. Lene yo di imai su di iba ingon com Kristus nya mikiju hanyen leu imai eisi bibie ug e.

¹⁷ Leu api Allah mibuwak nye di igyaijo nya ba, yuum yo di ikiju bibie nya ei bumbuhuiti lene yahagom mikui biyuum Tuhan ei mpia-bbed him ba, yahagom migwam bit Noni bijo ninno bijo kikau.

¹⁸ Gima rino ma jiba ningginausi dini biwin kep yam ngonti.