TESALONIKA GI NIGOM 2 - ALLAH NIHYET MEM TUNGWATU NYA

Paulus de midyai nya ei minu ndig Tesalonika

¹ Disut bat jen, jikan tut bipia tirigi ningat rin ei jikieti ne niyai midyai mikui-kausi he bi.

² Ba, jikan tut bipia nipou tirigi nihwou ngat je ei minu ndig Tesalonika bigyo ne timiei minu ndig Filipi ihwen bit nye bikucang nye cem. Mbro nok gino tungwatu nya itte tut nye nindig bibor lo, ide Allah bindei ba, nibrim ningkek kep je binitri tut Nihyet Di Kei di kwei leu Nonti bije.

³ Tirigi nitri tut Nihyet Di Kei bije lene ningon kiowi eisi ba, ningon can biniris bak tungwatu nya bi.

⁴ Noro nitri tut Nihyet Di Kei bikwop njap-njap bit leu Allah ningon kanti mem nye. Lewo Noni ba ningon com nye tut midyai dima bisok Nihyet Di Kei ei nyeni dip mem gima nibibrim tungwatu nya ingonti leu binhyepo inggei sut nye bi noro leu binhyepo Allah joi sut nye lewo Noni binai ningon kanti hagom.

⁵ Jikan tut mungkun bipia niba ninsi di mmau biris bije ba, nibiti ninda binitindei kep jindati tut mun nyeng hi bi. Allah ngat gima brei bou niyai him.

⁶ Nibrim ningkek leu binhyepo tungwatu nya kin jeni cem jinggei sut nye bi.

⁷ Mbro nok gino niya kui Yesus ba, dem mem gima nahara je tut mun di bahati tut nye lo, nibidip huk je tut mun nyeng hi bi. Noro niba gi nem-nnai biyai midyai ei jikieti bit leu nok sindig di nyohou nimunggwom bat ninti de nya.

⁸ Nitin ei mem gima nitri tut Nihyet Di Kei di kwei leu Allah bije he bi noro ninggok nimai eisi mem je cem lewo ningon ngakei je nindig bibor ba, ningon kieti rijeni.

⁹ Disut bat jen, jo nibreisi mem da bipia jiyok ngon kep bipia ninda jo kep midyai nitu tirigi ningat rin ei jikieti ba, nigruap-gruap nyen tut midyai dima. Niyai midyai dima bikwop mmun-njap leu binhyepo nibindin je tut mun di bahati nye tirigi nitri tut Nihyet Di Kei bije bi.

¹⁰ Jingat bou jiyai him bipia tirigi ningat rin ei je di jingon jo kep nya jikieti lene nyende niyaijoti kwes-kwau cem ningon sren cem niyai mun tunggwei hi bi cem ba, Allah cem ngat gima bou niyai him.

¹¹ Jo nibreisi mem je bipia ninyohou je dem kep nok andigpoi di nyohou nimunggwom bat ninti de nya.

¹² Nibiwin kep jingonti ba, nigwam ser jingonti binibidip huk je leu binhyepo jide niyaijoti bindei ba, Allah joi sut je. Lewo Noni hig je leu binhyepo jinggre kin Ninyeng Tak Kepti kin Nide nikei-kau-keisi cem.

¹³ Mun nyeng gom kin bu di bindei dino nijem sigyo bak Allah rinok gini. Tirigi nitri tut Nihyet Di Kei leu Allah bije lene jimiap ba, jice tut nihyet dima tereu nok mun di tibim leu tungwatu nya yuhui him bi noro nok mun di nijit-jau di kwei leu Allah Nonti. Noni yai midyai ei je di jingon jo kep Kristus jingonti.

¹⁴ Disut bat jen, mun di cut igkep je dem kep nok mun di cut igkep Allah de mbusyamei di Kristus Yesus de limwa nya ei hanjop Yudea. Jiyai ninghuisi wei leu jenti jide mben nya dem kep nok yo dima igyai ninghuisi wei leu mben Yahudi di ihwen bit yok.

¹⁵ Yo dima ripo igyai nimai bak Tuhan Yesus kin nabi nya ba, ihwen bit nye cem. Yo dima ibindei Allah ningon sibui sut yok lene iba nitok bak tungwatu nya yahagom cem.

¹⁶ Gima he bi noro itte tut gi nitri tut nihyet di biyai niyaijo nijepti bak ngkiai nya. Tug hon nisinati dima lene igyai kep igyai kepti ba, ibikum ei ide sisarti apino ingon mpung-piet tut sisar. Ningwigsi rino Allah de nigga biborti hatap yok tu!

Paulus joi sut gima ug ngat timiei minu ndig Tesalonika mbigom kin bu

¹⁷ Noro disut bat jen, tirigi tungwatu nya ijji nye ei minu ting leu je lene gima bindei ba, ningon ngguk tut je. Mpe dima lene ibong minu ting leu yam lo, dinnei ningat rin bit je. Ba, nigruap-gruap nyen mem gima nihwou ngat je mbigom kin bu!

¹⁸ Nipi binihwou ngat je ba, da di Paulus dipi bidihwou mbigom-mbican noro Bilis bikkin ser nye.

¹⁹ Ningat ne jibindei ba, niba ningon com je ba, ningon llei sut je bininggei-nggwang tut je mpe dino Tuhan Yesus kwei hanyen ba, yahagom igya ei Noho bei!

²⁰ Jit jit, jibindei ba, ninggei ngwig sut je ba, nillei ngwig sut je cem!