PETRUS GI NIGOM 5 - ALLAH NIHYET MEM TUNGWATU NYA

Ningginausi tut Allah de domba nya

¹ Je di nibou mbusyamei nya e, dani cem nibou mbusyamei. Dingat Kristus bou diyai him tirigi Noni yai ninghuisi wei. Midipriet kin Kristus nikei-kau-keisi tirigi Noni ndo Nonti brei ei tungwatu nya igyai him. Gima rino dipingok jingonti leu binhyepo jiyok ngon kep ditde nipingok jeti nya.

² Ma jinyohou domba nya di Allah kes bije. Ma jiba ningon di llei sut midyai dima binyohou yok bit leu Allah ningon kanti mem je. Ma jiba jikou binyohou yok au. Ma jiba jingon di pri kep mun di ibirop hanyen bije binyohou yok au. Noro ma jiba jijoi sutti binyohou yok.

³ Ma jibon jenti tereu nok nibou ndig nya ba, jinyeng tak kep domba di Allah kes bije au. Noro ma jindo jide niyai munti di kei bibor bak yoni nok bindo.

⁴ Ba, mpe dino Gembala Di Ninyeng Jei ttau hanyen kwei lene Noni mikes munkwas di kei-kau di bit bon pimber hanyen kan bi ei jibou nggram him dip.

⁵ Je di pinai pilei nya e, ma jibou cut bak andigpoi nya. Ma Allah de limwa nya yahagom iba ibou coi mem yam ba, inok awak mem yam. Bit leu nok gi ipas ei Allah nihyetti “Allah hwen bit yo di ingon jei nya noro singat tut yo di iba ibou coi mem yam.”

⁶ Gima rino ma jikuk je nyahan bak Allah ba, ninyeng tak kep je leu api Noni mikon jinyeng dem igbit tto bou.

⁷ Ma jikes mun di jingon bos-bos nyen tut hagom ei Allah ninghat dip lewo Noni nyohou je.

⁸ Ma jehek tut jenti ba, jiyai nggrop nggan lewo jide siceu di Bilis lus-lus nyen nok singa di niten-pos di yau binggok tungwatu tereu nok nide mun di yem.

⁹ Ma jiba jide niba ningon com Yesus Kristusti di nddong kei bihwen bit noni lewo jikan tut bipia jisut bat yo di ingon jo kep nya bidem dihyei nisurti-nipekti hagom igyai ninghuisi di wei noyam kin jeni.

¹⁰ Noro niabiati jiyai ninghuisi wei di jo jei bi leu su lene Allah di singat tut je mipindi je hanyen bu. Noni miyai jingon nddong cem misindem tut je cem mibindei bijiba jingon com Noni kikau cem. Lewo Noni dimig je leu binhyepo jipriet kin Nide nikei-kau-keisi drek dip gi jinok gom kin Kristus.

¹¹ Allah ninyeng tak kep mun nyeng hagom buug hon nohonti bi sren! Igbit ri.

Petrus kes nihyet hon

¹² Disut Silas mpu da bipas kep srat dini. Dikan tut bipia noni ne no di Kresten di ningon gom ri. Dibiwin kep jingonti bidipai jit bipia mun di nipas kep ei srat diniti ndo tut Allah nisingat tut nyeti di nijit. Ma jikrop jinda ei Allah nisingat tut nyeti kikau.

¹³ Jisut bat yo di mbusyamei di Allah dimig yok ei su nya ei minu ndig Babilon ipigo je. Markus cem pigo je. Noni tereu nok dipmot.

¹⁴ Ma jipigo yam dem kep yo di Kresten di ingon ce yam bi. Handei kon ba, Tuhan bindei ba, yo di inok gom kin Kristus yahagom ingon jo nyahan. Nipigo leu dani, Petrus