PETRUS GI NIGOM 3 - ALLAH NIHYET MEM TUNGWATU NYA

Ningginausi tut nijjep-nitnem

¹ Nok gima cem tut je di sop nya. Ma jiba jibou coi mem jijjep bat nya ighyet leu binhyepo gino bihi ingon jo kep Allah nihyet bi ba, jahap jiji cem bi lo, jiyai munti di kei bibor nya mibindei ba, jijjep bat nya ingon jo kep Kristus.

² Jiyai munti di kei bibor nya kin jide niba nibou coi mem yokti jo nibreisi mem yok.

³ Ma jiba mun di tungwatu nya inga leu sut nya bimau jenti au. Gima ne jibou di jipri bikei bibor kin mas di nibok kui di jindei kin sinsun di nibok kui di jijuk ri.

⁴ Noro ma jiba mun di ntun jingon him bimau jenti. Gima ne jingon di jo nyahan kin jiyai mun mmuti nya di bon ninyeng ei Allah niyai him ri.

⁵ Lewo sindig timiei pinipou di ingon kwes nya di igyok ingon mem Allah iba ide niba nibou coi mem ijjep bat nyati bimau yonti.

⁶ Sara cem yai nok gima bibit Abraham nihyet bijem noni nok niceu. Gino jiyai munti nya kei bibor ba, jidigit tut mun-mun hi di cut igkep je bi lene je dima ne je di jintun Sara him nok nipmisop bat nya ri.

⁷ Nok gima cem je di pinai nya e, ma jiba jingon bisrip huk bipia jitnem bat nya ne pung di isindem bi nya ri. Ma jibibon yok nok gi igbit lewo jeni kin yoni mijiyai niyaijo nijep di jo kikau tug hon Allah nisingat tut jeti. Ma jibit dicukti dini leu binhyepo tirigi jingat nadi lene mun nyeng hi sigi ser jingonti bi.

Ninghuisi wei cut igkep nye drek dip igyaisi di kei

⁸ Nirop ninda ndigsi rinok gini. Ma jahagom jice tut yam hyet kin jingon kanti cem gom. Ma jingondut yam tereu nok yo di itig mbier tut yam. Ma jingon nggriu sut yam bijiba jibou coi mem yam cem.

⁹ Ma jimbuk tut yo di imbuk tut je au. Ma jimbriom yo di imbriom je au. Noro ma jingat nadi tindei mun di kei mem yok. Lewo Allah dimig je leu binhyepo jiyai mun di kei leu Noni.

¹⁰ Bit leu nok gi ipas ei Allah nihyetti “Tungwa tou rino joi sut ningon di llei bibor bibong kei gwam kei cem lene ma noni pijuk nidweb ser nhyema pai tungwatu nya kinei biris ei yokti au.

¹¹ Suar noni mbres nonti leu sisar biyai kep niyai munti di kei nya lene ba ningon titut yam bibrim ningkek bibindei ba, ningon kwes kin nisut bat yo di ingon jo kep nya.

¹² Lewo Allah nyohou yo di ibit ningon kanti bingig nitingou mem ide nadi. Noro Noni tte tut yo di isibut di ibon mun di mbuk nya.”

¹³ Gino jita jibou ei nibon mun di kei nyati lene tou rimbuk tut je i?

¹⁴ Gino jiyai ninghuisi wei drek dip jiyai munti di kei nya ne ningon nggei-hi-nggei mintun him! Ma jingon digit tut tungwatu nya lene ma jingon bos-bos nyen au.

¹⁵ Noro ma jikuk je bak Kristus bijikon Noni nok Tuhan ei jingonti. Ma jitin ei mem nituti dino hi mihig ser je tut jide niba ningon comti leu binhyepo jibuhup igbit.

¹⁶ Ma jiba jingon di jo nyahan kin jibou di cut biyok cem bibuhup ighyet. Ma jinyohou jingon mien di kwes leu binhyepo gino hi pai je di jibit Kristus kinei drek dip jiyai munti di kei nya lene ighyet dima mibindei ba, immai sut yonti hak ug.

¹⁷ Leu gi kei rino igyai ninghuisi wei drek dip igyai kep mun di kei bit leu Allah ningon kanti mem nye leu gima igyai ninghuisi wei drek dip gi igyai kep mun di sibut.

¹⁸ Lewo Kristus Nonti mai mbigom ngat he bijo kikau mem ide sisar. Noni ne No di ningon sren-srau di ya luei yo di ibon sisar nya yohoti rin leu binhyepo buwak je kwei bijitti kin Allah. Kristus mai bit leu gi mbun ningut tungwatu. Noro tirigi Allah win Noni ba, niyaijo hanyen lene noni mbun ninnei di bit bon mai hanyen kan bi.

¹⁹ Kristus di mbun ninnei dima ug tri tut nihyet bak ninnei di isima ei minu nimai nya ide.

²⁰ Ninnei di isima dima yok ne tungwatu di ibit Allah nihyet bi ei nijam di Nuh bibon kibar ri. Allah om ningon tut yok mem nijam di Nuh bibon kibar dima. Lo, ibou poi di ingat rin ei kibar nsi nok ibou muhwindaningai he ingwes ngun tug hon minyei di su dima.

²¹ Ba, minyei dima ndo tut nitur tungwatu ei minyeiti di biteu je leu sisar biyai niyaijo nijep bije tug hon Yesus Kristus nikiju hanyen leu nimai eisi ri. Nitur tungwatu ei minyeiti dima ne midut nipiap ningut leu map di kuisi rin bi noro mun di nyeni ibipreu ei mem Allah tug hon ingon mien di kwes.

²² Yesus Kristus kui ug ei gwamti biya kui Allah ninda com tu. Ba, ninyeng tak kep malaikati nya kin nibou nya kin nisindemti nindigsi nya ei mpia-bbed him.