PETRUS GI NIGOM 1 - ALLAH NIHYET MEM TUNGWATU NYA

Petrus pigo Allah de limwa nya

¹ Srat dini leu da di Petrus di diya kui Yesus Kristus. Srat dini mem Allah de limwa nya di intek gimahap bibong bidem ingkiaisi ei hanjop Pontus kin Galatia kin Kapadokia kin Asia kin Bitinia.

² Icig Allah dimig je ei bit leu nikos tutti leu binhyepo jinok Nide limwa di ingon kwes nya tug hon Allah Ninnei ba, jibit Yesus Kristus nihyet cem bijiyai ningon kwes kin Noniti tug hon nimai ei biei salibti. Handei kon ba, Allah singat tut je bibor ba, biyai jingon di jo nyahan kei bikum eisi bu.

Niyok ningon memti di ngkiem kei

³ Jikwei ba, ipai sigyo bak Allah dino ide Tuhan Yesus Kristus Nicigya! Ningon ngakei nye nindig bibor biyai niyaijo nijep binye tug hon Yesus Kristus nikiju hanyen leu nimai eisi. Noni bindei ba, igyok ingon memti nddong kei.

⁴ Gima rino igyok ingon mem nijam di igyai mun di kei bibor di Allah bet ei mem Nide limwa nya. Noni bet mun dima yok ei gwamti mem je. Bit bon mun dima yok sar cem mpiei cem pimber cem ei gwamti kan bi.

⁵ Mun dima yok hagom jo ei mem je lewo jingon jo kep Allah tu. Ba, Allah de nisindemti nyohou je kikau leu binhyepo jiyai niyaijo nijep di jo kikau di Noni ndo brei mem njap ningwig honti.

⁶ Mbro nok gino jingon buhun drek dip yo di ibingon je tug hon nisinati mang-mang ba, ihwen bit je mem nijam di jei bi dini lo, ma jingon kei bibor.

⁷ Ide nibingon jeti ndo bindo tut gino jiba jingon com Allah haigtu e, he bi e? Bit leu nok mas di nok mun di pror yon di tungwatu nya ikwen ei humti. Jide niba ningon comti bon ninyeng dor njiriek mas. Mun di buhun bingon jide niba ningon comti bindei ba, jiba jingon com Yesus Kristus mungkun kei. Gino jingon nddong kikau lene Allah nggei sut je bikon jinyeng cem leu api jiyai jinyeng jei ei njap dino Yesus Kristus ttau hanyen kwei.

⁸ Mbro nok gino jingat Noni bou jiyai him kwei bipek ammani kep bigyo lo, jingon ngakei Noni. Mbro nok gino jingat Noni bou jiyai him mem nijam dini bi lo, jingon jo kep Noni. Gima rino jingon llei lewo jingon nggei-hi-nngei bibor ba, bit bon jipai sut ei juhui him bi.

⁹ Lewo jide niba ningon com Yesus Kristusti ribindei dino jiyai niteu leu sisarti kin niyaijo nijepti.

¹⁰ Nabi nitimiei nya inyohou pigot bram bigyok igyai kep niteu leu sisarti kin niyaijo nijepti leu api itri tut munkwas di kei dini di Allah tin ei mem je.

¹¹ Yoni inyohou pigot bram nimbot kepti kin tto bou mem nipek kepti tug hon Kristus Ninnei di ningat rin ei ingonti ningon kanti. Lewo Kristus Ninnei nyohou pingok ingonti tut nijam dino Kristus miyai ninghuisi wei kin nikei-kau-keisi ei niabiati bu.

¹² Allah mbot kep tut bak nabi dima yok bipia mun di itri tut dima mem yonti bi noro mem jeni. Mun di itri tut habiei dima tibim kwei leu yo di itri tut Nihyet Di Kei yuhui him. Ba, yo dini itri tut Nihyet Di Kei bije tug hon Allah Ninnei di Allah pinak kwei leu gwamti nisindemti. Gino malaikati nya ingon dorti tut mun di yo dima itri tut nipek kepti ne ingon llei bibor.

Ningginausi tut yo di ingon jo kep nya ide ningon kwes-kwausi

¹³ Gima rino ma jitin ei jibou ngwakti mem mun di mipek kep mem je nya hagom. Ma jiyai ngkiem cem leu api jiyok jingon mem mun di kei di Allah miyai bije ei mpe dino Yesus Kristus ttau hanyen kwei.

¹⁴ Ma jibit Allah ningon kanti mem je. Ma jingkwei kep jingon kanti kin jingut kanti timiei nya di jiyai tirigi jingon tindur yo pima au.

¹⁵ Noro ma jiyai munti nya hagom kwes-kwau bit leu nok Allah di hig je ningon kwes-kwau.

¹⁶ Bit leu nok gi ipas ei Allah nihyetti “Ma jingon kwes-kwau bit leu nok Da di Allah dingon kwes-kwau.”

¹⁷ Tirigi jingat nadi bak Allah lene jindat kep ninyeng Arigya. Noni mbus nggok tungwatu nya bibit leu nok yonti njem di Noni ngat bou niyai him bi. Noro buhup biyok bit leu nok igyai munti nya. Gima rino ma jiba jiyaijoti ei dihyeisi dini bikon Allah ninyeng.

¹⁸ Lewo jikan tut bipia Allah ba mitiei kin mas di mipror yon bipek je hanyen leu jiyai munti di kinei di jiyai leu jidigup bat-jidigai bat nya bi.

¹⁹ Noro Noni ba Kristus ninggrom di tereu nok midut nibikos ser sisarti bipek je hanyen lewo Kristus ne domba di bon nimuhweisi ba, nirom kuisi rin bi.

²⁰ Allah dimig Kristus ei nipou tirigi Noni pai tes dihyeisi dini bigyo leu api kes Noni brei ei tungwatu nya igyai him mem nijam ningwig honti dini leu binhyepo biteu je leu sisar biyai niyaijo nijep bije.

²¹ Noni ribindei dino jiba jingon com Allah di win Noni hanyen leu nimai eisi biyai nikei-kau-keisi biNoni. Gima rino jiba jingon com Allah bijiyok jingon mem mun di Noni preu ei mem je.

²² Jibit Nihyet Di Kei nicuk jeti tu. Gima rino Allah kos ser jide sisar bijingon kwes tu. Jiba ningon di gom bingon ngakei jisut bat yo di ingon jo kep nya. Ma jiba jingon titut yam bikum ei jide ningon ngakei yamti.

²³ Jiyai niyaijo nijep leu Allah di nok Jicigya. Noni ne tungwatu di mai hak rin bi noro niyaijo kikau buug hon nohonti bi. Allah ribindei dino jiyai niyaijo tug hon Nonti nihyet di niyaijo ba, bit bon sar kan bi cem.

²⁴ Bit leu nok gi ipas ei Allah nihyetti “Tungwatu dihyeisi dini hagom inok mintu-minta ba, inyeng di jei nya noyam kin mitou. Mintu-minta mui hak ba, mitou cem millet.

²⁵ Noro Allah nihyet jo gingga ba, bit bon ug hon nohonti kan bi.” Nihyet dima ne Nihyet Di Kei di Allah de awak nya itri tut bije ri.