PETRUS GI NICAN 2 - ALLAH NIHYET MEM TUNGWATU NYA

Nisok kepti tut guru nitrowai nya

¹ Nipou ne nabi nitrowai nya ittau hak srig Allah de limwa nya ikieti. Gima rino guru nitrowai nya misrig jikieti bu. Yoni ibiti ninda bitri tut nihyet di nijit bi di bindei srawir je leu api ibikep ser Iceu di kwek yok leu mun di kat yok. Tug hon nisinati dima lene ibindei sar yonti ba, gini micut igkep yok kros.

² Mbro nok gima lo, yo di ingon jo kep nya imang bibor mitti kin guru nitrowai nya bigyai bram igyai kepti di ntun yonti ingut kanti di kinei him nya bisrou yok. Igyai kepti dima bindei ba, tungwatu nya irom ighyet kui Puig Di Nijit.

³ Guru dini yok ingon pri kep mitiei nindig bibor. Ibrim mitiei leu je tug hon mumpui di itri tut bije bit leu yonti ingon kanti nya. Noro Nikei di mikes hukum ei yok dip tin ei mem yok mimbrek tu. Ba, No di mibindei cut yok niyai nggrop nggan.

⁴ Allah sindui sut malaikati di ibon sisar nya bingwes ngun leu hukum bi. Noro com yok kikau ug ei hum njengti lene ba lante biteu yok ei mpia ttou nsi di dindi-kai bibet yok ei bibou Njap di Noni mikes hukum ei yok dip midem ug e.

⁵ Allah sindui sut tungwatu nya ei dihyei timieiti bingwes ngun cem bi. Noro bindei ba, minyei su nindig bibor bikot yo di isibut nya yahagom. Nuh nongkom kin ibou muhwindacan hi kin bu ingwes ngun. Noni tri nihyet bak tungwatu nya leu binhyepo igyai munti bindei ba Allah joi sut yok.

⁶ Nok gima cem tut Sodom kin Gomora. Allah ba hum bidip tut minu cin dima nok bindo di bindo tut mun di micut igkep yo di isibut nya.

⁷ Noro Noni teu Lot di ningon sren bibindei ba, ningwes ngun lewo ningon buhun tut yo di isibut dima yok ingut kanti di kinei di srou yok.

⁸ Lot di ningon sren dima bong bit yok lo, ngat igyai munti di kinei bibor bou niyai him bimiap ighyet di kinei bibor cem bikwop njap-njap apino gima hagom hwen bit ningon srenti biyai ningon buhun bibor.

⁹ Gima rino Allah kan tut nisinati mem gima teu yo di ingon sren nya ba, ingwes ngun leu mun di buhun tak yok. Ba, Noni kan tut nisinati mem gima om kep yo di isibut nya bibou Njap di Noni kes hukum ei yok dip midem ug e.

¹⁰ Ba, gini bitut yo di ibit ingut kanti di mpiei bibor di srou yok kin yo di ingwes pri gau Allah de nisindemti cem bibie ug e. Guru nitrowai nya ingon jei bibor ba, illei-lau cem. Ba, ikucang Allah De nipai testi di dia-diau nya ei ginyo kug bingwes mien tut bi!

¹¹ Mbro nok gino malaikati nya isindem bibor dor njiriek guru nitrowai nya lo, irom ighyet kui bikucang Allah De nipai testi di dia-diau nya ei ginyo kug ei Allah Noho bei bi.

¹² Mbenjen! Guru dima yok inok mindhe-ndhe di niten-pos nya di tungwatu nya yuhuk bibui nok mikwau. Ikan-kan nyen kan bi ba, irom ighyet kui mun nyeng hagom di ingon dorti tut bi. Yoni mitug ndei nimai noyam kin mindhe-ndhe di tungwatu nya ipijuk kan bi di ibui hak.

¹³ Yoni mitug ndei ninghuisi wei drek dip ninghuisi wei di ibindei dino cut igkep yo di hiter. Ingon llei sut gi ibon mun bit leu ingut kanti di kinei di srou yok bou tungwatu nya igyai him. Yo dini ibinim kep je bibindei ba, jiyai ngkek ttin yok ei mpe dino iba inyeng can biyem njita bit je.

¹⁴ Ingon nghen leu nibon kep sisarti bi. Igyai bong kep sop sundal nya lene iba ighyet di mmau biris yo di ingon nddong bi nya ba, idrui bou ngwak cem. Allah mbriom yok tu!

¹⁵ Ikrau tunggwei puig di sren kei apino israwir. Ico kak Bileam di Beor nipmot di ningon pri kep mitiei di noni tug ndei leu niyai munti di kinei nya nohoti.

¹⁶ Nide keledai ba nihyet tungwatu bisok kep noni ngkiem ser nhyema kes hon niyai munti di kinei di noyam kin no di nintin kiek niyai munti.

¹⁷ Guru nitrowai nya dima inok minyei bousi di pingge leu su kin bumbuhui di hou sigau di nimig ten bibor ttem-ttem nyen. Allah tin ei mpia ttou nsi gom di dindi-kai ei mem yok tu.

¹⁸ Mun di tibim ei yuhui him ndo brei bipia ingon jei ba, ingon mbum cem. Iba ingut kanti di kinei bibor bisrou yo di sindi ingwes ngun leu yo di isibut nya indati.

¹⁹ Guru nitrowai nya itto ei mem yok bipia ikwek yok leu mun di kat yok noro yonti inok awak mem igyai kepti di kinei di kat yok. Gino mun nyeng hi bindei cut tungwatu ne no dima nok awak mem mun di bindei cut noni dima.

²⁰ Gino tungwatu nya ingwes ngun leu mun di kinei di srou yok ei dihyeisi dini tug hon gi ingon dorti tut ide Tuhan Yesus Kristus di teu nye leu sisar biyai niyaijo nijep binye ningon kanti lo, ingkwei kep mun di kinei di srou yok dima hanyen bu lene puig di ikak ei niabiati kinei bibor dor njiriek puig di ikak ei nibieti.

²¹ Gino ikan tut puig di bie ndam ningon srenti habiei bi sren lene gima kei bibor leu gino ikan tut tu leu api ikou sut gi ibit Allah De nicuk yokti di kwes-kwau.

²² Mun di pek kep mem yok dem igbit leu nok srat Amsal nipas kepti “Nsien ngkwei biyem kep ninjim hanyen.” Lene nok gi ipas bu “Na di tungwatu nya ipiap ei minyeiti bipwoi kei nya ingkwei bitoi igtui hanyen.”