NIPINGOK NINGONTI 9 - ALLAH NIHYET MEM TUNGWATU NYA

Ningginausi tut ningon kiti kin ningon mbumti

¹ Ningon kiti ngot ig lene kon cou nidihim muhwindacan cem bitas.

² Noni bui mindhe nimuhup tu bikimut ba anggur ngei ba, ngei njita mem pesta cem.

³ Noni cuk sop awak nya biyuug ei nipieti di jo nai bijem bidem minu ndig dima,

⁴ “Tou rino kan tut mun nyeng hi bigyo i? Ma akwei o!” Ba, ningon di ki pai bak no di nipmem miep ningon bigyo,

⁵ “Jikwei yem njita di dingei ei su bijidut ba anggur ngei di dikimut ei su.

⁶ Ma jikes hon jide ningon mbumti leu binhyepo jiyai ningon nggei-hi-nggeisi. Ma jibit yo di ingon ki nya ide puig di imbut a.”

⁷ Gino asok kep no di llei-lau drek dip nide nitunggweisi ne nihyet mitigut na. Gino akon ahyet kep yo di isibut nya lene yoni mikucang nani.

⁸ Ma asok kep no di llei-lau au. Lewo miningon mpo tut na. Ne gino ando no di ningon ki nitunggweisi bak lene ningon mikei sut na.

⁹ Gino apingok no di ningon ki ningonti lene nide ningon kiti mikum eisi bibor. Gino angginau no di bit Allah nihyet lene nide nintin kimboti mikum eisi bu.

¹⁰ Gi nimbie him ngat mem gima ibiyai ningon kiti rino suar ikuk nye bak tuhan ba, ittin tut Noni. tuhan ningon kwes-kwau ba, ningon sren cem. Gino anggok tut ningon di huk niti ne suar aba angon com Noni.

¹¹ Ningon kiti mibindei ba, ade njap jei bibor.

¹² Gino anyeng tut ningon kiti lene gima mibindei ba, ningat di kei mintun nani him. Ne gino arok ningon kiti ei lene gima mibindei ba, atug ndei mun di buhun bibor.

¹³ Ningon mbumti dem kep sop nggei di gikan tut mun nyeng hi bimmai sut nonti cem bi.

¹⁴ Nide mpia di gwam kepti rino nide dimbou hui kin dimbou pmem ei minu ndig dima nuhui a.

¹⁵ Leu api su nihyet bak yo di injiriek kep no nya ba, hwen yo di ingon sren ingonti bipai,

¹⁶ “Je di jikan tut mun nyeng hi bigyo e, ma jikriek ndam da kwei.” Leu api hwen no di nipmem miep ningon bigyo ningonti bipai,

¹⁷ “Minyei ninggimang nyop kei ba, njita niyem ku mmau kei.”

¹⁸ Yo di ibit nide nibidip hukti igikan tut bipia gino icem kep noni ne itug ndei niyaijo ningwig honti ei mpia dima tu bi. Yo di icoi ug ei nide ig nya idor ug ei minu nimai nya ide tu.