NIPINGOK NINGONTI 8 - ALLAH NIHYET MEM TUNGWATU NYA

Ningon kiti mbrua kep tungwatu nya

¹ Jimiap e, ningon kiti tri tut nihyet ba, nintin kimboti nihyet tibim kwei ei jitingou nsi.

² Noni ya nipieti ei puig ninghas him nya biya ei puig nahau yamti cem.

³ Noni ya kui dimbou pmem ei ngug tig di bikrop ttai minu ndig nya bitri tut nihyet bipai,

⁴ “Je di jingon tungwatu e, ditri tut dihyet bije. Je di jingat rin ei dihyeisi dini e, dibidip huk je.

⁵ Ma je di jimahan bigyo e, jita jibou ei ningon tekti. Je di jingon mbum e, ma jisindui sut ba, jipmem bat nya imiep jingona.

⁶ Jingig jitingou mem dihyet lewo dihyet igbit ba, bon ninyeng cem.

⁷ Mun di tibim ei duhui him nijit ri. Dingon mpo tut nibicumti nya.

⁸ Mun di tibim ei duhui him sren kei ba, nihyet nitrowai kin nihyet dwei srigsi bi.

⁹ Mem no di ningon ki ne mun di tibim ei duhui him igbit. Mem no di kan bidem lene mun di tibim ei duhui him pimbai kei.

¹⁰ Ma jingat jingwes ei ditde nipingok jeti nindig bibor dor njiriek gi jingat jingwes ei perakti. Ma jingat jingwes ei ningon kiti nindig bibor dor njiriek gi jingat jingwes ei masti.

¹¹ Dani ne Ningon Kiti ri. Dinyeng jei dor njiriek tig permata niboga. Bit bon jiba da binai mun di jingat jingwes eisi nindigsi nya kan bi.

¹² Dani ne Ningon Kiti ri. Dingon dorti ba, dingon ki cem ba, dintin kimbo cem.

¹³ Nikon tuhan ninyengti noyam kin ningon mpo tut mun di kinei. Dingon mpo tut yo di ingon jei nya kin yo di illei-lau sut yonti kin yo di igyai kep mun di sibut kin yo di iris mun igkei yahagom.

¹⁴ Dikos dat dingon kanti nya bidibindei mbut mun dima cem. Dingon dor niti ba, disindem bibor cem.

¹⁵ Dimpu nibou ndig nya leu binhyepo ibindei mbut ide ninyeng tak kep limwa nyati. Dahati tut yo di inyeng jei nya di isimbot kep biyam tut nikos tutti di dem kei nya.

¹⁶ Nibou ndig nya kin yo di inyeng jei nya yahagom inyeng tak kep limwa nya nok gi igbit tug hon nisindemti di kwei leu dani.

¹⁷ Dingon ngakei yo di ingon ngakei da. Yo di inggok ser da mingat da bou igyai him.

¹⁸ Dipwoi ninyeng tut ndigbanti kin ninyeng di jeisi kin nibong kei nigwam keisi bidibitri tungwatu nya.

¹⁹ Mun di jiyai leu da kei bibor dor njiriek mas di pimbai kei kin perak di dia kei.

²⁰ Dikak puig ningon gom bidinut ningon sren nohoti.

²¹ Dibindei ba, yo di ingon ngakei da inyeng bibor ba, ide ig mpung tut ndigban di nibok kak.

²² tuhan pai tes da bibie ba, dinok ningat di ntun him Nide nipai testi nya habiei ei nimbie him.

²³ Noni pai tes da habiei ei nimbie him nipou tirigi Noni pai tes dihyeisi dini bigyo.

²⁴ Disrek nipou tirigi muk ngei kin minyei bousi nya jo bigyo.

²⁵ Disrek nipou tirigi nungug nya kin nungug tou nya jo nijoti ba,

²⁶ nipou tirigi Noni pai tes dihyeisi bitut susti kin dihyei ndung ninggop gom bigyo.

²⁷ Dingat rin bit Noni tirigi Noni kes mpia-bbed him bijo nijoti bikes niban ei nai muk ngwa dip cem,

²⁸ tirigi Noni pai tes bumbuhui ei mpia-bbed him bibindei ba, minyei bousi nya biam ei muk jou cem,

²⁹ tirigi Noni cuon ser gima muk ngwa dip biam bipias hagau ei dihyei ninjek dip cem. Dingat rin bit tuhan tirigi Noni pai tes dihyei nikiou bijo ei cou nipmem dip.

³⁰ Dindun ninda him dem kep nok nimunggwom ngi-ngat. Noni joi sut da bikwop njap ngwa hagom leu api dikek-kek nyen ei Noho bei.

³¹ Dingon llei sut dihyeisi di Noni pai tes bidijoi sut tungwatu nya cem.

³² Gima rino pinjoi pilei jen, ma jingig jitingou mem dihyet. Jibit ditde nipingok jeti apino jingon nggei-hi-nggei.

³³ Ma jimiap kep ningginausi nya leu binhyepo jibiyai ningon kiti. Ma jingkek ndok tut au.

³⁴ No di ngig nitingou mem dihyet bikwei ya kui dimbou hui ei ditde ig bibet ningon mem Da cem biniyai ngkiem ser Da ei ditde dimbou hui bikwop njap cem ningon nggei-hi-nggei.

³⁵ Tungwa tou rino tau kep dani mporo yai niyaijo ba, tuhan mijoi sut noni.

³⁶ Tungwa tou rino tau kep da bi mibimangkrei nonti niyaijoti. No di ningon mpo tut da ningon ngakei nimai.”