NIPINGOK NINGONTI 7 - ALLAH NIHYET MEM TUNGWATU NYA

Nipingok pinai nya tut sop di nibou sibui

¹ Dimunggwom na e, ma apwoi ditde ningginausi ei angonti lene ma angon prion ser ditde nipingok angonti au.

² Abit ditde nipingok nati nya leu binhyepo ayaijoti kei bibor kei. Ayok ngon kep ditde ningginau nati ba, anyohou hagom dem kep nok no di nyohou nonti niyai njep.

³ Ma ayok ngon kep ditde ningginau nati nya mungkun kei leu api apwoi hagom biker ei angon bei.

⁴ Abibon ningon kiti noyam kin abibon akwohop ba, abibon ningon di dor niti noyam kin abibon asut ngi-ngat.

⁵ Ningon kiti mimbres na leu sop di nibou buwei kin sop di ba nihyet mmau biris na ug ei nikineisi.

Sop di nibou buwei bibor

⁶ Mpe di gom ne dingat rin ei ig bei bidiya kui kendera mihyeti,

⁷ leu api ditou kep pinai pilei di ingon bou nya imang bibor lo, dingat gom di ningon nddong bi dor njiriek nindigsi nya.

^8-9 No dima ya-ya nyen ei simpak nahau yamti mem mpia jinjuisi biya sur sop hi nide dimbou huigya.

¹⁰ Sop dima juk sinsun sop sundal ba, hei kwei buum noni biyok ningon gom mem gima pai mun bihwen ningonti.

¹¹ Noni ne sop di ningkek ndok di brim ningkek kep pinai igkei cem ba, bit bon niyaisi mmai kan bi.

¹² Noni ya niyati ei puig nahau yamti kin biyati bit leu niyai kepti bitindei ser pinai pilei nya.

¹³ Mpe dima lene noni nggriou pinai pilei di ningon bou pima lene ba nimmai sut nonti bi bimei lene pai bak,

¹⁴ “Njap di ammani ne dibon midut nibiyai ningon kwes kin Allah ba, dibindig mindhe ei humti bidipwoi mikwau niken kwei ei ig bei tu.

¹⁵ Gima rino dikwei tindei ser akweisi leu binhyepo siyem mikwau ei ig bei lo, dittau kep na tu!

¹⁶ Diba ban nillikti di kwei leu minu Mesir bingig kep dibongti ba,

¹⁷ dinden ampou tut mini ibou mur kin cendana kin biei nggrai di ui-gwang kei eisi.

¹⁸ Akwei ba, siyem njita tut yam bisibong gom ba, simpig bou keyam mmun jei dini.

¹⁹ Dijjep gwam ig bei bi. Nimig jo nimbutti bimbut ug ei minu ting bibor tu.

²⁰ Noni pwoi mitiei nindig bibor ba, mikwei hanyen bi mem nijam ari nitindur can ndini.”

²¹ Tug hon nisinati dima lene sop dima ba nihyet di mmau bihwen pinai pilei dima ningon apino icut tut yam.

²² Pinai pilei hig ningon eisi bi noro bram sop dima ug ei ig bei nok sapi di tungwatu nya ijem ug ei mpia di ibui nok mikwau eisi ba, noyam kin rusa di biam bon,

²³ bibou tibor ndei ningon bikus nite hi ba, noyam kin ha di srou jala cem lewo jei bi ne niyaijo ngwig hon nohonti lo, ningon dorti tut bi.

²⁴ Dimunggwom bat jen, ma jingig jitingou mem dihyet bijiyok ngon kep ditde nipingok jeti nya.

²⁵ Ma jisindui sut ba, sop dima ba niyai munti dima bisrou je au. Ma jijop bram noni ninyen cem au.

²⁶ Lewo noni bindei ba, pinai nya imang bibor icut ei nikineisi tu. Bit bon ikwop yo di itug ndei nimai tug hon noni imangti kan bi.

²⁷ Gino jicoi ug ei nide ig lene gima noyam kin nikak puig di bikwam ug ei minu nimai nya ide.