NIBA NINGON SRIP HUKTI 1 - ALLAH NIHYET MEM TUNGWATU NYA

Tungwatu nya itug ndei mindei ngan mem nijam di igyaijo i?

¹ Nisimbot datti nya dini tibim ei Nikan-kan Nyen Tut Mun Cig nuhui him. Noni ne Daud nipmot di ya luei nicig nohoti bikui nok nibou ndig ei minu ndig Yerusalem ri.

² Nikan-kan Nyen Tut Mun Cig pai mun nyeng hagom ne mun di bit bon ingon dorti tut kan bi ri! Mun di pek kep mem nye mem nijam di igyaijo ei dihyeisi dini hagom srep tut ide ningon dortiti.

³ Tirigi igyaijo yo ne igyai kep midyai nya bicom yahanggwap kikau. Noro ningat di itug ndei di ibikon inyeng rigitou i?

⁴ Nintun him yamti di bram yam gom srek kwei lene nintun him yamti di bram yam hiter sar ug. Noro dihyeisi dini jo nijoti.

⁵ Mpia njap no pri kep nyen lene cut kep nyen cem sindam ba, bisau bingkwei hanyen ug ei nijo bou dip leu api pri hanyen bicom nimig sindam.

⁶ Hou kui nite bei mpia nijjai leu api ninnei tti nite bei mpia nibiho. Hou sibui-sibui nyen buug ei nijo bou dip leu api kui hanyen bu.

⁷ Minyei pmem hagom biam bicom muk noro muk gi kui buut bi sren. Ningei ngkwei hanyen ug ei nibrig leu api biam hanyen kwei.

⁸ Mun nyeng hagom nos nye ba, bit bon ibohom ndat ninos nyenti dima kan bi. Iput-put nyen lo, igyai ha ut tut mun di ingat dima bi sren. Itingou cut hon mun di imiap tut nya bi sren.

⁹ Mun di pek kep mem nye nipou su mipek kep mem nye hanyen bu. Mun di ibon nipou su ne mibon hanyen bu. Mun nyeng nijep hi jo ei dihyeisi dini bi.

¹⁰ Ipai “Jingat i, gini ne mun di nijep-jau ri!” Noro bi. Mun dima jo nipou su tirigi ipmem srek tut nye bigyo.

¹¹ Tungwatu nya igiyok ngon kep nintun him yamti di bram yam nya ei nijam gi nipou bi. Ba, nintun him yamti di bram yam nya ei nidipti bu igiyok ngon kep yo di isrek ei nijam dini cem bi.

Mun di Nikan-kan Nyen Tut Mun Cig um ei nide niyaijoti nya

¹² Dani ne Nikan-kan Nyen Tut Mun Cig ri. Dibong ei minu ndig Yerusalem bidinok nibou ndig di ninyeng tak kep mben Israel.

¹³ Dibungwam mem gima diyok diyai kep mun nyeng hagom di pek kep ei dihyeisi dini ba, dipikor eisi leu binhyepo hagom jo nibreisi mem da. Tungwatu nya igyaijoti nggruk bibor drek dip mun di Allah kos tut ei di mipek kep mem yok.

¹⁴ Dingat tungwatu nya ide niyai munti di igyai kep ei dihyei njek dip dini hagom tu. Ma jiyok ngon kep bipia mun dima ne mun di bit bon ingon dorti tut kan bi rin ba, dem kep nok niyon igkep hou nimig.

¹⁵ Bit bon ipu mun di koi-ka bibindei ba, sren hanyen kan bi. Ba, bit bon ikwop mun di jo bi nya nimangti kan bi.

¹⁶ Sikan “Sani lene no di yai ninyeng ba, singon ki cem. Side ningon kiti nindig dor tunggwei yo di inyeng tak kep mben Israel ei minu ndig Yerusalem nipou su nya yahagom. Sibrim singkek mem gima sipikor eisi ba, sintin kimbo tut mun nyeng mang bibor cem.”

¹⁷ Gima rino dibungwam mem gi dikan tut nintin kimboti kin ningon mbumti niter leu yamti ba, ningon kiti kin nibbwe-bwausi niter leu yamti cem. Noro jo nibreisi mem da bipia gima dem kep nok niyon igkep hou nimig.

¹⁸ Leu gino ide ningon kiti kum eisi ne ide ningon bos-bos nyenti cem kum eisi. Gino ide nintin kimboti kum eisi ne ide ningon buhunti cem kum eisi.