MAZMUR 70 - ALLAH NIHYET MEM TUNGWATU NYA

Nadi nahara mem Allah mpu no (Mazmur Kin Doia 40:13-17)

¹ Doia Daud mem no di bie tut doia nimpung ba, bikiek midut nibiyok ngon kepti.

² Allah e, ateu da bidingwes ngun. tuhan e, abipbur ba, ampu da.

³ Handei kon ba, yo di itin ei mem igyai nimai bida dima icut bingwig binang-nang wai hak ug. Handei kon ba, yo di ingon kei kep da bimbos-hi-mbos tut mun di kinei di cut igkep da isujou kep inghim dip ba, nimmai kui yokti cem.

⁴ Handei kon ba, no di pa ndip da gwam nidigitti ba, nimmai kui noti cem.

⁵ Ma yo di ikuk yok biNa yahagom igyai nillei ba, ingon nggei-hi-nggei. Ma yo di ingon ngakei Nani drek dip gi ateu yok di ingwes ngun tu yahagom ighyet jo kep kikau bipai “Mbenjen! Allah ninyeng jei bibor!”

⁶ Duhui mbum ba, dinguhuisi jet. Allah e, abipbur ba, akwei haninyai. Nani ne No di mpu da ba, teu da bidingwes ngun ri. tuhan e, ma abinyen au.