MAZMUR 67 - ALLAH NIHYET MEM TUNGWATU NYA

Doia nibipai sigyo bak Allahti

¹ Doia mem no di ba nikek nggong mbreisi bibie tut doia nimpung.

² Allah e, ma angon nggriu sut nye ba, anjei mun di kei binye cem. Ma aba angon di nem bitou kep nye,

³ leu binhyepo tungwatu dihyeisi dini hagom mikan tut angon kanti mem yok bikan tut bipia asindem mem gima ateu yok leu sisar ba, ayai niyaijo nijep biyok.

⁴ Dijoi sut gima tungwatu dihyeisi dini inggei sut Na di Allah ba, yahagom inggei sut Na.

⁵ Dijoi sut gima ngkiai nya yahagom ingon llei bibor ba, iba ingon di nggei-hi-nggei bipai doia lewo aba angon di sren-srau bigwam nok nikei mem tungwatu nya ba, abie tut bibikwop mben di ingat rin ei dihyeisi dini hagom.

⁶ Dijoi sut gima tungwatu dihyeisi dini inggei sut Na di tuhan ba, yahagom inggei sut Na.

⁷ Njita ngat ningat bidem ide miaisi nya hagom tu. Nyende Allah njei mun di kei binye tu.

⁸ Allah njei mun di kei binye tu. Dijoi sut gima tungwatu dihyeisi dini hagom ikon ninyenga.