MAZMUR 49 - ALLAH NIHYET MEM TUNGWATU NYA

No di ba ningon com ndigban ningon mbum yo

¹ Nimpung Korah ide doia mem no di bie tut doia nimpung.

² Je di ngkiai nya jahagom e, ma jintu kep dihyet. Je di jingat rin ei dihyei nisurti-nipekti e, ma jingig jitingou mem dihyet.

³ Ba, gini mem yo di ibon inyeng bi nya kin yo di inyeng jei nya cem. Mem yo di yuhui mbum nya kin yo di inyeng bibor cem.

⁴ Miditri tut mun di kwei leu dingon kiti. Midiba dibou ngwakti di kwes bikan-kan nyen.

⁵ Midiyok ngon kep nihyet nibiti nindati ba, dipai nisinati tut tirigi dikek nggong mbrei.

⁶ Mpe dino mun di buhun cut igkep da ba, ditde siceu nya igyon ttai da bitindei ser da lene dittin tut bi.

⁷ Yo dima isibut ba, iba ingon com ide mun di inyeng tut nya binggei-nggwang tut ide ndigban di nindig bibor cem.

⁸ Ningat ne bit bon hi ba nide mun di ninda rom nya bigo Allah tut nisut de niyaijoti cem ba mitiei bingot kep Noni kan bi.

⁹ Mun di noni mibipek nisut niyaijoti dima nimangti dem bi sren.

¹⁰ Lewo niyaijo nijep di jo kikau kin ningwes ngun leu nimai eisi nibok kak bibor.

¹¹ Tungwatu nya yahagom ikan tut bipia yo di ingon ki nya kin yo di ingon mbum nya kin yo di ingkek ndok nya yahagom mimai leu ide mun di inyeng tut nya apino ide nintun him yamti di bram yam nya miba yokep ndigban dima yok hagom sindam.

¹² Mbro nok gino yo dima inyeng tak kep dihyei hanjop nsi mang bibor nipou su lo, tirigi imai leu su lene ibong ser jui dip nya bijo ninno bijo kikau ug bipek ningwig honti.

¹³ Bit bon tungwagom de mun di nyeng tut nya cuon niyaisi leu nimai kan bi. Suar noni kin mindhe-ndhe nya hagom cem itug ndei nimai.

¹⁴ Gima ne mun di micut igkep yo di iba ingon com yonti kin yo di ingon ngakei ide mun di inyeng tut nya ri.

¹⁵ Yoni mitug ndei nimai dem kep nok domba nya ba, yahagom minut puig di bie ndam jui nsi dem kep nok gembala hi bie tut yok ug ei siri. Yo di ingon sren nya mibindei timek yok mem njap bigyoti leu api ingut mikroi srig yo di imai nya ikieti ei minu ting leu itimieisi di kei-kau pima.

¹⁶ Noro Allah miteu da bidingwes ngun leu jui nimai nisindemti.

¹⁷ Ma jingon kinei sut hiter di nyeng tut mitiei kin ndigban nindig bibor au.

¹⁸ Lewo bit bon no dima pwoi nide mitiei buug sut bi tirigi noni mai lene biang nide mun di nyeng tut nya ug ei jui nsi kan bi.

¹⁹ Mbro nok gino tungwagom bong kei gwam kei ba, joi sut niyai munti nya ba, tungwatu nya inggei sut niyai munti di mipbor ngat nya cem kikau ug bipek niyaijo ningwig honti lo,

²⁰ noni mibram nidigup bat-nidigai bat nya ug ei nimai nya ikieti ei mpia nidinditi bijo ninno bijo kikau.

²¹ Bit bon tungwagom ninyeng di jei cuon niyaisi leu nimai kan bi. Suar noni kin mindhe-ndhe nya hagom cem itug ndei nimai.