MAZMUR 44 - ALLAH NIHYET MEM TUNGWATU NYA

Nadi nahara mem gima tuhan nyohou yok

¹ Nimpung Korah ide doia ningginausi mem no di bie tut doia nimpung.

² Allah e, nimiap tut ayai munti di mindur nya di ayai kep ei nijam gi nipou pima di nidigup bat-nidigai bat nya ipui sut binye ei nitingou nsi tu.

³ Nanti rino ajji ngkiai nya leu itimieisi leu api ayai ide dihyei di inda rom dima bak Ade limwa nya apino ibong ser minu dima. Abindei ba, mben ngkiai hiter nya yuum mun di buhun noro asindui sut Ade limwa nya ba, idigek kep mpia.

⁴ Ade limwa nya inda rom dihyei dima bigyati tug hon ide singau simeda bi. Iba yonti ide nisindemti cem boom kep ide siceu nya bi. Noro igyai bigyati tug hon Na di tuhan Ade nisindemti kin Ade nipigati di bindo tut gima Angat rin bit yok lewo ajoi sut Ade limwa nya.

⁵ Nani ne ditde Nibou Ndig kin ditde Allah ri. Abindei ba, Ade limwa nya ibindei timek ide siceu nya.

⁶ Nibindei timek nyende siceu dima yok tug hon Ade nisindemti. Nibindei ba, siceu di icut igkep nye ikuk yok ei nyeni nimig him.

⁷ Lewo diba dingon com ditde hampiap ba, ditde singau simeda teu da bidingwes ngun cem bi.

⁸ Noro Nanti rino ateu nye di ningwes ngun leu nyende siceu inda nsi ba, abindei timek yo di ingon mpo tut nye cem.

⁹ Gima rino minikon anyeng binipai sigyo biNa bijo ninno bijo kikau.

¹⁰ Noro tini bu ne akes nye ei ba, asindui sut siceu pima yok ibindei timek nye cem. Agikiju ba, anjei bit nye tirigi nittei yam kak nipuig nikon pranti bi.

¹¹ Asindui sut ba, ninang leu siceu yoho bei leu api ipos ndigban hagom bingwig leu nye.

¹² Asindui sut ba, ibui nye binimai sinsiou noyam kin domba di ikos ikimam di icom ingut sinsiou nya. Abindei ba, nintek gimahap binibong ningkiaisi.

¹³ Aba nibok di laide bitri Ade limwa nya leu api abipek mun nyeng hi bi.

¹⁴ Ngkiai nya di ibong ttai nye iba nye bikek ba, ipa ndip nye cem drek dip abibon nyeti dima.

¹⁵ Abindei ba, ninok mun di ngkiai nya isimbot kep nyen di ibiba lor yam. Ikit ibou leu nye ba, ighyet wer mpiahi tut nye cem.

¹⁶ Ipai da kinei ei njap jei bibindei ba, digwam nimmaiti bidiyaisi cem mmai,

¹⁷ drek dip nihyet di kinei kin nihyet di wer mpiahi di tibim ei siceu nya kin nitok cig nya yuhui him.

¹⁸ Mbro nok gino nibbwe ser Nani ba, ninjiriek Ade nipreu ei bit nyeti bi lo, gima yok hagom cut igkep nye.

¹⁹ Naham nimbuk kep Na ba, nigimbres Ade nicuk nyeti nya ei nyeni nitta cem bi.

²⁰ Noro akes nye binitoi ei nidinditi. Nyeni ninda ngwak tirigi nicut ug ei mindhe-ndhe di niten-pos ikieti.

²¹ Gino nikuk nye bak Allah bu bi biningat nadi bak kwar nya,

²² lene jo nibreisi bipia Na di Allah akan tut. Lewo akan bidem mimun di niku ei ningonti hagom.

²³ Nigruap nimaisi drek dip Na ba, yo dima ibibon nye nok domba di ibui bikos kukiau drek dip niba ningon com Nati.

²⁴ tuhan e, akiju! Nggon rino abong mai i? Akiju lene ma arok nye ei bijo ninno bijo kikau au.

²⁵ Nggon rino aku Na nyahan leu nye ba, abbwe ser ninghuisi wei kin mun di buhun tak nye i?

²⁶ Ibindei timek nye tu. Gima rino nicut di ninem-nnai ei dihyeisi ba, nitti binitoi dihyei ndung ug a.

²⁷ Akiju ba, akwei mpu nye. Ateu nye biningwes ngun drek dip angon ngakei nyeti di jo ninno bijo kikau.