MAZMUR 111 - ALLAH NIHYET MEM TUNGWATU NYA

Jinggei sut tuhan tut Nide midyai nya

¹ Ma jinggei sut tuhan! Midiba dingon titut bipai sigyo bak tuhan ei Nide limwa di idem yam ei ig mbusyamei gom nya ikieti.

² tuhan de midyai nya mindur bibor. Dem mem gima tungwatu nya di ijoi sut Nide midyai nya hagom ingon dorti tut.

³ tuhan de midyai nya hagom mindur bibor ba, ikon ninyeng tut. Ningon srenti ug hon nohonti bi sren.

⁴ tuhan ngondut nye ba, ningon ngakei nye cem. Niyai munti nya bibon ninggap leusi leu binhyepo igyok ngon kep kikau.

⁵ Noni kwas niyemti tut yo di ibit nihyet ba, yok ngon kep Nide nipreu ei mem yokti kikau.

⁶ Noni ndo Nide nisindemti bak Nide limwa nya tug hon gi kwas dihyei ninda rom di ngkiai nya ide nya tut yok.

⁷ tuhan ba ningon gom kin ningon sren-srausi biyai nibou tut mun nyeng hagom. Nide nicukti nya hagom dem mem gima iba ingon com.

⁸ Nide nikos tutti nya jo nijam jei ba, Noni ba nihyet di igbit kin ningon di sren bitri tut nikos tutti bak Nide limwa nya.

⁹ Noni kwek Nide limwa nya leu awak lene ba nipreu ninghig-niker bipreu ei mem yok. Noni ne tuhan di kwes-kwau ba, sindem bibor cem ri!

¹⁰ Suar no di kinyon ei niyai ningon kiti ttin tut tuhan bibie. Noni yai ningon di huk niti bak yo di ibit nihyet yahagom. Ma jinggei sut tuhan bijo nijam jei!