MAZMUR 106 - ALLAH NIHYET MEM TUNGWATU NYA

tuhan nisingat tut Nide limwa nyati

¹ Ma jinggei sut tuhana! Ma jipai sigyo bak tuhan lewo Noni singat kei. Nide ningon ngakeisi jo kikau buug hon nohonti bi.

² Tou rino dem mem gima tri tut tuhan niyai munti di nindig bibor i? Tou rikon ninyeng nok gi dem i? Hi bi!

³ Yo di ibit Nide nicukti nya ba, igyai munti nya hagom igbit ne ingon nggei-hi-nggei.

⁴ tuhan e, ayok ngon kep da tirigi ando Ade nisingatti bak Ade limwa nya. Ampu dani cem ei mpe di ateu yok bingwes ngun.

⁵ Asindui sut ba, dingat yo di adimig ei su nya ide nibong kei nigwam keisi bou diyai him ba, dingon llei bit Ade limwa nya. Asindui sut ba, dinggei ngwig sut Ade limwa di anyeng tak kep nya bidingon nggei-hi-nggei bit yok.

⁶ Niyai kep nidigup bat-nidigai bat nya igyai kepti ba, nibon sisar. Nyeni nisibut ba, nitunggwei sut ahyet cem tu.

⁷ Nidigup bat-nidigai bat nya di ibong ei minu Mesir ingon kiowi niti. Ingon gidor niti tut Ade midyai mindur nya bi. Ingon prion ser angon ngakeisi di nindig bibor ba, yaham imbuk kep Na di Allah Di Anyeng Jei tirigi yuug krau Muk Lipig.

⁸ Noro tuhan teu yoni bingwes ngun tug hon Nonti njem leu binhyepo ndo Nide nisindem biborti brei biyok.

⁹ Muk Lipig pingge lai de bit leu Nide nicukti leu api Noni buwak Nide limwa nya bimbut ninggati ei muk ninggimau yon dem kep nok imbut ei iggum ndigsi.

¹⁰ Tug hon nisinati dima lene Noni teu yok bingwes ngun leu yo di ihwen bit yok inda nsi. Noni kwek yok leu siceu inda nsi.

¹¹ Noro minyei biam bihwen siceu nya yahagom bisar muk jou ug. Tungwa hi di ningwes ngun di niyaijo cem bi.

¹² Leu api Nide limwa nya ingon jo kep Nide nipreu ei mem yokti nya bipai doia ba, ibikon ninyenga.

¹³ Noro ibbwe ser tuhan nibon munti dima haninyai leu ba, igyai igbit yonti ingon kanti nipou tirigi tuhan bie tut yok bigyo.

¹⁴ Ikimam njita ei iggum ndigsi bitig dino ibingon Allah ningonti.

¹⁵ Gima rino Noni yai mun di yahara Noni tut biyok lo, nsuwer ajar cem hwen yok.

¹⁶ Lene ingon kinei sut Nide awak di Musa kin Harun di ingon kwes nya ei iggum ndigsi.

¹⁷ Mpe dima lene dihyei kimbo bipinde Datan kin Abiram kin ide ig bei nsi nya yahagom leu api dihyei sur yam ser yok hanyen.

¹⁸ Hum cut kwei biyem nimpung di itti kin yok bitunggwei nihyet yahagom bingkiong bijjem.

¹⁹ Iba mas bibon kwar sapi nikre di nehen pap ei Nungug Sinai bikuk yok bak kwar mas di iba mas di jet bibon dima.

²⁰ Iba kwar sapi di yem kep minta biluei Allah di ninyeng jei.

²¹ Ibbwe ser ide Allah di teu yok di ingwes ngun di bon mindur nindig bibor ei minu Mesir.

²² Nide nibon munti nya ei minu dima bibon ninggap leusi bibor. Niyai munti nya ei Muk Lipig bindei ba, inga leu.

²³ Allah pi bibou bindei sar Nide limwa nya noro Musa di Allah dimig ei pima ngkiem ser yok bicuon igyaisi apino Allah niggati cut leu yok ug a.

²⁴ Niabiati bu ne icoi ug ei minu di kei bibor dima bi lewo igiba ingon com Allah De nipreu ei mem yokti bi.

²⁵ Ilua kwop ei ide prak meng yati ba, ikou sut nimiap tuhan nihyet cem.

²⁶ Leu api Allah ba neheng bipreu ei mem yok bipia miyai nimai bak yahagom ei iggum ndigsi.

²⁷ Noni micom ide nintun him yamti di bram yam nya ug ei ngkiai nya ikieti lene bindei ntek yok bintek gimahap ug ei ingkiaisi.

²⁸ Niabiati bu lene Allah de limwa nya ikuk yok bak kwar Baal-Peor bigyem mikwau di ibikuk yok bak kwar nya cem.

²⁹ Igyai munti dima bibon tuhan niggati apino nsuwer ajar di buhun bibor hwen yok ug a.

³⁰ Noro Pinehas kiju bikes hukum ei yo di igyai mun tunggwei pima dip leu api nsuwer ajar di hwen yok dima kes hon.

³¹ Ingat Pinehas nibon munti dima nok nibon munti di kei mem nonti ba, tungwatu nya migyok ngon kep kikau buug hon nohonti bi sren.

³² Tirigi ingat rin ei minyei bousi ngot Meriba lene ibindei ba, Allah ningon sibui sut yok apino Musa biam bon drek dip ide mun di igyai tunggwei dima.

³³ Ibindei ba, Musa wok yok apino bisrip huk nipaisi bi dino pai mun tunggwei ug a.

³⁴ Yo dima icok tut ngkiai nya bihigom leu minu dima bit leu tuhan nicuk yokti bi.

³⁵ Noro iwak sop ngkiai nya nok itnem bat nya bigyai bram yo di ikan tut Allah bi nya igyai kepti nya.

³⁶ Leu api ikuk yok bak kwar nya ba, gima ribindei di icut bisar ug a.

³⁷ Ibui imunggwom bat nya bindig yok ei nimbar hum dokti bak kwar di mben Kanaan nya ide.

³⁸ Isiber imunggwom bat nya di ibon mun tunggwei bi nya inggrom bindig yok kep hum ei nimbar hum dokti bak kwar nya. Igyaisi dima ribindei di map kui minu dimati a.

³⁹ Ibon munti dima yok bindei ba, map kui yoti. Ingon gom tut Allah bi.

⁴⁰ Gima rino tuhan niggati cig-cai kep yok ba, ningon him wei sut Nide limwa di ninyeng tak kep yok nya.

⁴¹ Apino kes yok ei ngkiai nya inda nsi bisindui sut ba, siceu nya inyeng tak kep yok.

⁴² Siceu di ihwen bit yok nya ico kep yok ba, yoom yok bicut ei inda behei.

⁴³ tuhan kwei teu yok mbirimang lo, ijoi sut yaham imbuk kep Noni bibit nihyet bi. Apino isar ei ide sisar nyati.

⁴⁴ Noro tuhan miap ighyet di yahara bak Noniti ba, yok niyai kep yok tut ide mun di buhun tak yok.

⁴⁵ Allah yok ngon kep Nide nipreu ei mem yokti mem gima bimpu yok ba, ngondut yok lewo Nide ningon ngakei yokti nindig bibor.

⁴⁶ Noni bindei ba, yo di ikat yok bihwen bit yok nya yahagom ingondut yok.

⁴⁷ Nyende tuhan Allah e, ateu nye biningwes ngun. Anduk nye kwei leu ngkiai nya ikieti leu binhyepo nipai sigyo ba, nikon anyeng di kwes-kwau cem.

⁴⁸ Jikwei ba, ikon Israel de tuhan Allah ninyeng nogindini bijo ninno bijo kikau cem. Jikwei ba, nye di tungwatu yahagom ipai “Igbit ri!” Ma jinggei sut tuhan!