MARKUS 1 - ALLAH NIHYET MEM TUNGWATU NYA

Yohanes di tur tungwatu nya ei minyeiti tri nihyet

¹ Gini ne Nihyet Di Kei tut Yesus Kristus di Allah Nipmot ri.

² Nihyet Di Kei nitriti bit leu nok Nabi Yesaya pas ei nipou su. “Allah pai ‘Midicuk tungwagom di tri tut dihyet bibie mem Na leu binhyepo noni mitin puig mem Nani yo.

³ Tungwagom nihyet tibim kwei leu mpia nintiti bipai bipia ma jitin puig di sren kei mem Tuhan nimbutti lene ma jiji kep ninjuisi sur yam kei.’ ”

⁴ Gima rino Yohanes tau kwei ei mpia nintiti. Noni tur tungwatu nya ei minyeiti bisok kep yok “Suar jittin ser jide sisar ba, jikiek ndam Allah leu api jiyai nitur je ei minyeiti leu binhyepo Allah mikos ser jide sisar.”

⁵ Tungwatu nya leu hanjop Yudea kin minu ndig Yerusalem imang bibor induk yam kwei kep Yohanes bipai jit ide sisar leu api noni tur yok ei Minyei Yordanti.

⁶ Yohanes juk sinsun di iba unta nta bibien lene tti mindhe ningkek nok bang. Noni yem hai ceng kin ahwei lon nok njita.

⁷ Yohanes tri tut biyok “No di ya abia kep da ma kwei ninyeng jei bibor dor njiriek da. Dani ne dem mem gima dikuk da bidikwek Nide srop leu nimig jou bi.

⁸ Ditur je ei minyeiti noro Noni tur je ei Ninnei Gi Kwesti bu.”

Yohanes tur Yesus ei minyeiti

⁹ Mpe dima ne Yesus jo leu minu ndig Nazaret ei hanjop Galilea kwei leu api Yohanes tur Noni ei Minyei Yordanti.

¹⁰ Tirigi Yesus kiju kui leu minyeisi rino Noni ngat lo, mpia-bbed him kau lene Ninnei Gi Kwes nok hakimoi di duop juk bigwam ei Noni dip ba,

¹¹ nihyet gom tibim kwei leu mpia-bbed him bipai “Nani ne Dipmot rin ba, dingon ngakei Na bidingon kei sut Na cem.”

Bilis bingon Yesus

¹² Haninyai Ninnei Gi Kwes bie tut Yesus ug ei iggum ndigsi.

¹³ Noni bong ei mpia dima kikau mem mmun-njap ningot bitai ba, Bilis bingon kikep Noni. Mindhe-ndhe di niten-pos nya ingat rin ei sirima cem noro malaikati nya inyohou Noni.

Yesus hig pinai nya ibou bitai di ipos wau kan kwei bibit Noni

¹⁴ Niabiati Yohanes sima tu lene Yesus ug ei hanjop Galilea bitri tut Allah Nihyet Di Kei bak tungwatu nya ei sirima.

¹⁵ Bipai “Tto bou dem tu. Allah Ninyeng Tak Kepti dideu su. Ma jittin ser jide sisar bijikiek ndam Allah. Ma jiba jingon com Nihyet Di Kei di kwei leu Noni!”

¹⁶ Tirigi Yesus mbut nimig ug ei Igpong Galilea nintig dip lene Noni ngat Simon kin Andreas di nikindig-nikinjoi nya di ipos wau kan iba jala bipos wau ei igpongti.

¹⁷ Yesus hig yok “Jikwei bit Da leu api dingginau je leu binhyepo jipos tungwatu nya kan.”

¹⁸ Hammi tirigi Noni hig yok nok rino yahacem ikes ide jala bihigom ei leu lene ibit Noni.

¹⁹ Yesus mbut mbigom kin bu bingat Zebedeus nipmot bat cin di Yakobus kin Yohanes di nikindig-nikinjoi nya. Yoni ibri ut bit icig bilit kep ide jala.

²⁰ Hammi tirigi Yesus hig yok rino ikes icig Zebedeus kin nide awak nya bihigom ei ut nsi leu lene ibit Noni.

Yesus jji ninnei rom leu tungwagom

²¹ Yesus nya yuug kikau ug ei minu ndig Kapernaum. Njap Nigwam Kep Ninghuisi gi dip bu dem lene Noni coi ug ei mben Yahudi ide ig mbusyameisi ba, sindi ngginau tungwatu nya.

²² Yo di idem yam dima inga leu tut mun di Noni ngginau yok tut lewo ba niji di ngkiem bingginau yok sindem. Nihyet noyam kin ide guru Puig Yahudi nicukti nya ighyet bi.

²³ Mpe dima lene tungwagom di ninnei rom ya ningonti coi kwei ei ig mbusyameisi bahara,

²⁴ “Na di Yesus di atimieisi leu minu ndig Nazaret e, anggon ndei nye i? Akwei hwen nyeni e? Dikan tut anyeng ba, Nani ne No di kwes-kwau dino Allah cuk kwei ri!”

²⁵ Noro Yesus mbrua ser ninnei rom bipai “Akes ahyet ba, ahei leu ningonti hak ug!”

²⁶ Ninnei rom dahat kukwei noni ninyen leu api hara mbigom kin bu lene hei leu ningonti bihigom.

²⁷ Tungwatu dima yok yahagom inga leu tut nindig bibor leu api ihig yam “Mbenjen! Mindei rini? Ningginausi di mindur e? No dini sindem mem gima jji ninnei rom nya leu api ibit nihyet!”

²⁸ Gima rino Yesus ninghapti tibim bidem hanjop Galilea nisurti-nipekti.

Yesus bindei ba, yo di inggwen imang bibor ikei hanyen

²⁹ Yesus nya yehei leu ig mbusyameisi biyuug ei Simon Andreas nya ide ig. Yakobus Yohanes nya cem ibit yok.

³⁰ Mpe dima lene Simon nignyot ningkek dut bibong nibongti leu api ipai sut bak Yesus.

³¹ Yesus ug ngat noni bikrau ninda bibrim leu api noni kiju bigwam pijum. Nok rino ningkek di dut pren hak leu noni leu api noni kiju bingei njita tut Yesus nya.

³² Mmun tu rino tungwatu nya ibuwak yo di inggwen kin yo di ninnei rom ya ingonti nya yahagom kwei bingwig ttai Yesus.

³³ Ba, timiei minu dima yahagom induk yam kwei bigyem mpia ei biyati.

³⁴ Lene Yesus bindei ba, yo di inggwen imang bibor ikei hanyen ba, Noni jji ninnei rom imang bibor leu ingonti. Lo, Noni ggai ser ninnei rom nya leu binhyepo imbrap au. Lewo ikan tut Noni ninyeng tu.

Yesus tri tut nihyet ei hanjop Galilea

³⁵ Njap di hyep bu lene Yesus kiju mem hayausi leu api hei leu ig bei buug ndam mpia nintiti leu binhyepo ngat nadi biNongkom.

³⁶ Lene Simon nya yehei leu ig bei binggok ser Noni.

³⁷ Tirigi yoni ingat Noni tu lene ipai bak “Tungwatu nya yahagom inggok ser Na.”

³⁸ Lene Yesus buhup “Ma nyeni yuug ei minu ndig nindigsi di gahai dini kou leu binhyepo ditri tut dihyet ei sirima cem lewo dikos tut dingon kanti ei ba, dikwei ei sirini mem midyai dima.”

³⁹ Lene Noni mbut nimig bidem Galilea nisurti-nipekti bitri tut Nihyet Di Kei ei mben Yahudi ide ig mbusyameisi ba, jji ninnei rom nya leu tungwatu nya ingonti.

Yesus bindei ba, no di bras yem kei hanyen

⁴⁰ Mpe dima ne tungwagom di bras yem kwei ba nibiau bicom mpia ei Yesus nimig him bahara Noni “Andigpoi e, gino ajoi sut ne dikan tut bipia asindem mem gima abindei ba, dikei hanyen.”

⁴¹ Yesus ngondut noni bisu ninda bingget leu api pai “I, dijoi sut angon kanti dima. Dibindei ba, akei hanyen.”

⁴² Hammi tirigi pai bak nok rino bras llet hak leu noni.

⁴³ Lene Yesus cuk noni bingkwei hanyen bisok kep,

⁴⁴ “Amiap e, aug ba, ambot kep tut bras dima bak nindigsi nya au. Noro aug ndo nanti bak no di imam leu binhyepo noni bimian angkek dip. Leu api ayai mun bit leu nok Puig Yahudi nicukti pai binye nok bindo bak tungwatu nya yahagom bipia akei hanyen tu.”

⁴⁵ Noro no dima ug lene ba niji di nggan bisimbot kep mun di pek kep mem noni ei tirima-tirima ser ba, bit bon Yesus coi ug ei minu ttou nsi dima yok brei bu bi. Noro bong ei ngoi dumti leu api tungwatu nya ikwei leu minu dima nisurti-nipekti ndam Noni.