MALEAKHI 2 - ALLAH NIHYET MEM TUNGWATU NYA

¹ tuhan Di Sindem Bibor pai bak imam nya “Gini ne Ditde nicuk jeti ri.

² Ma jiba jiyai munti nya hagom bikon dinyenga. Gino jikou sut dicuk jeti nya ne midisigion je. Disigion mun di jide limwa nya ikwas tut Da di ibahati tut je cem. Nijit ne disigion mun di ikwas tut je pima hagom tu lewo jipwoi dingon tut dicuk jeti nya bi.

³ Midikes hukum ei jimunggwom bat nya dip lene midiba jiimaisi bitoi mindhe di jibui mem midut nya yooi leu api midikri je bidikes je ei mindhe yooi di ut eiti.

⁴ Mpe dima lene mijikan tut bipia diyai nicuk jeti dini bije leu binhyepo gi preu di dipreu ei mem imam di intun Lewi him jo kikau.

⁵ Dipreu kep yok tut ningon jo nyahan tut yamti kin nibong kei nigwam keisi cem tug hon Ditde nipreu ei mem yokti. Dibindei ba, mun dima pek kep mem yok tu leu binhyepo ibikon dinyenga. Ningat ne ibikon dinyeng ba, ittin tut Da mem nijam dima.

⁶ Mpe dima lene yoni ingginau mun di igbit bak tungwatu nya lene imbres yo leu mun di igbit bi. Ingon kwes kin Da lene iba ingon di kwes kei bibit leu dingon kanti nya. Impu yo di hiter cem leu binhyepo yo dima igyai munti nya kinei bibor bu bi.

⁷ Suar imam nya ingginau ide limwa nya leu binhyepo ingon jo kep Da di tuhan Di Dinyeng Jei Bibor. Suar yo dima ihig ser imam nya tut dingon kanti lewo imam nya igya hacan mem Da.

⁸ Noro tini bu ne je di imam jikriek leu puig di igbit tu. Jide nipingok tungwatu nyati bindei ba, imang bibor ibon mun tunggwei. Jibindei ba, gi preu di dipreu ei mem Lewi bitut je di jintun noni him kinei su.

⁹ Gima rino midibirop bije. Midibindei ba, mben Israel ingwes pri gau je lewo tirigi jingginau Ditde limwa nya ne jiyai igbit dingon kanti bi. Tirigi jingginau Ditde limwa nya ne jimbus nggok yok.”

Allah de limwa nya ingon gom tut Noni bi

¹⁰ Nyeni yahagom intun Abraham di nok icig gom him noyam bi e? Allah gom ngat pai tes nyeni yahagom bi e? Nggon rino ingon gom tut yam bi i? Tug hon nisinati dima ne ingwes pri gau gi preu di Allah preu ei mem idigup bat idigai bat nya.

¹¹ Timiei minu Yehuda ipigau gi preu di Allah preu ei mem yok tug hon gi ibon mun di bindei ba, timiei minu ndig Yerusalem kin minu Yehuda yahagom igyai ngkek ttin. Pinai Yehuda ibindei ba, map kui tuhan De Ig di Noni ningon ngakei tug hon gi iwak sop di ikuk yok bak ngkiai nya ide kwar nya.

¹² Handei kon ba, tuhan kes hukum bibikwop ei pinai di ibon sisar dima gom-gom dip tug hon gi com yo di imbier kim noni nya leu mben Israel ikieti bikuk yok leu ba, ibon midut nindig mindhe ei nimbar hum dokti bak tuhan Di Sindem Bibor bu bi.

¹³ Lene jiyai kepti di kinei gom kin bu no jo. Jibindei ba, jide niyai nggwei di kibor silip tuhan de nimbar hum dokti. Jipim nggruet lewo tuhan kou sut jide mun di jibikuk je bak Noni lene cigit je tut bi.

¹⁴ Jigom hig-hig nyen ser bipia nggon rino Noni kou sut mun di dibikuk da bak Noni i? Gima hagom nok lewo Noni ngat bou niyai him bipia apigau gi preu di apreu ei mem atnem di awak tirigi apilei yo pima. Mbro nok gino apreu ei mem atnem di ya kui na di nggre kin Allah de limwa nya lo, apigau noni.

¹⁵ Noro abuhup Ide pung Abraham di intun him yai nok gima ba, ningat ne ningon gom tut Allah bi e? Noro jide pung gom dima yok ningon mem mindei i? Noni yok ningon mem nide nintun him nya di inggre kin Allah de limwa nya. Gima rino ma jisok kep jenti leu binhyepo jingon gom tut jitnem di jiwak tirigi jipilei yo pima.

¹⁶ Noro jibuhup “tuhan di mben Israel ide Allah pai ‘Nnaba jisindui sut ba, no di ningon mpo tut nitnem rok noni hak ug.’ Allah Di Sindem Bibor pai bipia no dima ningon mui drek dip nimbuk tut nitnemti! Gima rino ma jisok kep jenti leu binhyepo jingon gom tut jitnem lene ma jipigau yok au.”

Tto bou mem igya ei Nikei Noho bei dideu su

¹⁷ Allah ningon ngehen tut jide nisuglai kwopti. Noro jihig ser da “Nibindei ba, tuhan ningon ngehen notou i?” Lewo jipai “tuhan ningon ngakei yo di ibon mun dimbuk yahagom ba, ningon kwes kin yok.” Ba, jihig ser da bu “Allah di tungwatu nya ikan bipia ningon kwes-kwau No ritou i?”