KORINTUS GI NIGOM 8 - ALLAH NIHYET MEM TUNGWATU NYA

Ningginausi tut mikwau nipigig ser ei mem kwar nya

¹ Nogindini dibuhup jihyet tut mikwau nipigig sut mem kwar di ikuk yok bakti nya. Ningat ne tungwatu nya ipai “Nyeni yahagom ingon ki tut mikwau nipigig serti” Noro ingon di ki tut mikwau dima biyai ingon di jei sut nyenti lo, ningon ngakei yamti bindei ba, igyai nisindemti.

² No di bisrip tut nonti bipia kan bidem ne ningon ki haigtu bigyo.

³ Noro Allah kan bidem tut no di ningon ngakei Noni jit-jit.

⁴ Tut munhyet niyem mikwau di ipigig ser ei mem ide kwar ne ikan tut bipia kwar bon ninyeng bindo tut mun di ningat rin bi. Ikan tut bipia Allah gom ngat he ba, hiter ningat rin bi sren.

⁵ Tungwatu nya ijem mun nyeng mang bibor di jo ei mpia-bbed him kin gi jo ei dihyeisi dini inyeng allah cem tuhan cem. Noro ningat ne mun dima ne allah kin tuhan nijit nya rin bi.

⁶ Noro mem nyeni ne Allah gom ngat he ba, Noni ne Icig ri. Noni pai tes mun nyeng hagom ba, igyaijo tug hon Noni. Tuhan cem gom ngat ba, Noni ne Yesus Kristus ri. Allah pai tes mun di hagom tug hon Noni. Ba, igyai niyaijo nijep tug hon Noni cem.

⁷ Mbro nok gima lo, yahagom ikan tut mun dini bi. Bihi ikuk yok bak kwar bit leu igyai kepti. Gima rino hon kep ammani kui gino igyem kep mikwau lene iba ingon srip huk bipia mikwau dima ne kwar de mikwau ri. Ikan bipia map kui yokti tug hon mikwau dima ba, gi mbun imig mbus gi kei leu gi kinei nya kan bi.

⁸ Ningat ne njita bikum ei ide ningon kwes kin Allahti bi. Gino igyem njita lene gima bindei ba, itug ndei mun di kei hi bi. Gino igyem njita bi lene gima bindei ba, ikrau tunggwei mun di kei cem bi.

⁹ Mbro nok gima lo, ma jingon sok kep jenti ser leu ma jide nimig mbus gi kei leu gi kinei kanti dima bindei ba, yo di ingon nddong bi nya icut ei sisarti.

¹⁰ Gino na di angon nddong ayem mikwau ei ig kwar nibousi lene buhun mem na bi. Noro notou mem no di ningon nddong bi di tou kep na i? Ayai kepti dima bindei ba, noni brim ningkek biyem mikwau njiriek ningon ttinti bi e?

¹¹ Tug hon nisinati dima lene abindei ba, akinjoi di ningon nddong bi misar drek dip ade ningon nddongti. Noro ningat ne Kristus mai mem noni cem.

¹² Tug hon nisinati dima lene abon sisar tut Kristus ba, abui asut no di Kresten drek dip ningon di nddong bi.

¹³ Gima rino gino mun di coi ug ei duhui bindei ba, dikinjoi cut ei sisarti lene dimbres dati leu niyem mikwau bihigom. Diyai nok gima leu binhyema dibindei ba, dikinjoi cut ei sisarti au.