KORINTUS GI NIGOM 7 - ALLAH NIHYET MEM TUNGWATU NYA

Ningginausi tut yo di mbusyamei nya di iwak yam

¹ Nogindini dibirop jide srat tut mun di jingon kiowi eisi. Dem tut gima tungwagom wak sop bi sren.

² Noro sisar nicut tut yamti kieng kep jide minu ndig dima. Gima rino gi kei mem bikwop tungwagom-gom wak nitnem lene gi kei mem bikwop sop nya cem iwak ijjep.

³ Suar no di pinai ningon ngakei nitnem ba, ningon nggriu sut gi igyem njita tut yam. Suar no di sop ningon ngakei nijjep ba, ningon nggriu sut gi igyem njita tut yam. Suar ingon nggriu sut gi igyem njita tut yam.

⁴ No di sop mbun nonti ningut bi lewo nijjep rino mbun a. Nok gima cem no di pinai mbun nonti ningut bi lewo nitnem rino mbun a.

⁵ Ma jicuon jenti leu yam tut gima jiyem njita tut yam au. Gino jice tut yam nipou ug e leu binhyepo juhuk nadi mem nituti poi lene nok. Gino juhuk nadi biput tu lene ma jikinyon ei niyem njita tut yamti hanyen. Tug hon nisinati dima lene jibindei bijimbres jenti leu Bilis nibingon jeti lewo joom kep jingut kanti nya kan bi.

⁶ Gi dipai nok gini ne nicukti rin bi noro ditde nipingok jeti he.

⁷ Ningat ne dijoi sut ma tungwatu nya yahagom igyai bram diyai kepti. Noro Allah yai nisindemti hi gom hi gom bak bikwop tungwagom-gom. Hi yai nisindemti dini lene hi yai nisindemti dima lene nok.

⁸ Gini ne ditde nipingokti tut yo di iwak itnem-ijjep bigyo kin kibom nya. Ma bikwop tungwagom-gom ya binonti noyam kin dani.

⁹ Noro gino gimbun joom kep jingut kanti nya kan bi ne nnaba jiwak yam hak ug. Niwak yamti kei dor njiriek nibou buwei kep yamti.

¹⁰ Tut yo di iwak yam tu nya ne ditri tut nicukti dini. (Ningat ne nicukti dini ne ditde bi noro kwei leu Tuhan Nonti.) Harin dima sop di wak nijjep tu didei nijjep a.

¹¹ Gino noni didei nijjep tu ne ma noni om ningon binok kibom kikau. Gi bi ne ma noni ngkwei hanyen ba, nijjep yoni ibong gom binok ninghui gom. Harin dima no di pinai didei nitnema.

¹² Noro ditri tut ditde nipingok jeniti di nindigsi nok gini. Gino no di Kresten hi wak nitnem di ningon jo kep Kristus bigyo lo, nitnem joi sut nijjep yoni ibong bit yam kikau lene ma nijjep didei nitnem au. (Ningat ne nicukti dini ne Tuhan de di Noni pai pijum mem nye bi ri.)

¹³ Gino sop Kresten hi wak nijjep di ningon jo kep Kristus bigyo lo, nijjep joi sut nitnem yoni ibong bit yam kikau lene ma nitnem didei nijjep au.

¹⁴ Lewo Allah bindei nijjep di ningon jo kep bi dima dem mem nggre kin Allah de limwa nya tug hon gi noni bong bit nitnem di Allah ninyeng tak kep. Nok gima cem tut nitnem. Allah bindei nitnem di ningon jo kep bi dima dem mem nggre kin Allah de limwa nya tug hon gi noni bong bit nijjep di Allah ninyeng tak kep tu. Gi bi ne imunggwom bat nya inok munggwom di intun yo di ingon tindur nya him. Noro Allah bindei yoni cem dem mem inggre kin Allah de limwa nya.

¹⁵ Noro gino gi hi di ningon jo kep bi kos tut bipia didei nijjep-nitnem di Kresten tu ne dem. Nicukti hi ngot kep gi hi di Kresten bigyo dima bi. Ma jingon kwes kin yam lewo gini ne Allah ningon kanti mem je ri.

¹⁶ Na di sop Kresten e, nggon rino akan tut bipia ajjep miyai niteu leu sisarti kin niyaijo nijep tug hon na bi i? Na di pinai Kresten e, nggon rino akan tut bipia atnem miyai niteu leu sisarti kin niyaijo nijep tug hon na bi i?

Ma jiyaijo bit leu Allah nibie tut jeti

¹⁷ Ma bikwop tungwagom-gom nyohou dimig niyaijoti bit leu Allah nibie tut noti ba, noyam kin Allah ningon kanti tirigi Allah hig noni ba, ningon jo kep Allah. Ditri tut ditde nipingok jeti dini ei mbusyameisi hagom bidem minu.

¹⁸ Gino hi yai midut sunat nipou tirigi Allah hig no dima bigyo lene ma noni bingon mem dip tut bindo sunat dima au. Gino hi yai midut sunat bigyo leu api Allah hig no dima ne ma noni coi bit midut sunat au.

¹⁹ Nicoi bit midut sunat kin nicoi bit bi hacem bon ninyeng bi. Noro mun di bon ninyeng rino ibit Allah nicukti nya.

²⁰ Ma bikwop tungwagom-gom nyohou dimig niyaijoti bit leu Allah nibie tut noti tirigi Allah hig noni.

²¹ Tirigi Allah hig na ne anok awak e? Dwai, nonnoro. Noro biken tiri bon nikwesti mem ayati kwes lene ma abrim angkek tut gima.

²² Lewo awak di ningon jo kep Tuhan ne no di niyati kwes tug hon Tuhan ri. Nok gima cem no di niyati kwes ba, ningon jo kep Tuhan ne Kristus de awak ri.

²³ Kristus pek je ba, bitun hak tu. Gima rino ma jibon jenti nok awak mem tungwatu nya au.

²⁴ Gima rino disut bat jen, ma jahagom jinyohou dimig jiyaijoti bou Allah niyai him bit leu Nide nibie tut jeti tirigi Noni hig je.

Ningginausi tut yo di iwak yam bi kin kibom nya

²⁵ Nogindini dibuhup mun di jipas tut yo di iwak yam bi nya. Dikan tut Tuhan nicukti tut munhyet dini bi. Noro ditri tut dingon kanti bije. Handei kon ba, jiba jingon com da drek dip Tuhan di ningon nggriu sut da.

²⁶ Diba dingon srip huk mun di buhun mang bibor di cut igkep nye mem nijam dini lene dikan bipia ma bikwop tungwagom-gom nyohou dimig niyaijoti bijo nijoti.

²⁷ Gino awak atnem tu lene ma akes noni au. Gino awak atnem bigyo lene ma anggok sop nok atnem au.

²⁸ Gino aug wak sop nok atnem ne sisar ntun him bi. Gino sop gwam nitta pilei ug wak nijjep ne sisar ntun him cem bi. Noro mun di bindei ba, jibou ngwak sibui cut igkep yo di iwak yam. Ba, dijoi sut gino dinyohou jeni leu mun dima.

²⁹ He disut bat jen, dingon kanti rinok gini. Jei bi ne nijam dini ngwig leu nye ri. Hon kep ammani kui ne ma no di wak nitnem nyohou dimig niyaijoti tereu nok no di wak nitnem bi.

³⁰ Ma yo di ipim inyohou dimig igyaijoti tereu nok yo di ingon ngguk bi. Ma yo di ikwai tiei inyohou dimig igyaijoti tereu nok yo di ingon llei bi. Ma yo di ipek ndigban inyohou dimig igyaijoti tereu nok yo di imbun mun nyeng hi bi.

³¹ Ma yo di ibou ngwak sibui sut mun di mipror yon inyohou dimig igyaijoti tereu nok yo di ibou ngwak sibui eisi bi. Lewo jei bi ne dihyeisi dini bitut mun di joti nya ug hon nohonti ri!

³² Handei kon ba, mun di biyai ningon mbut-mbut nyenti ngot kep je bi. No di wak sop bi kon mun di bitut Tuhan bijo anai ei nibou ngwakti lewo noni pwoi Tuhan ningona.

³³ Noro no di wak nitnem mikon mun di bitut dihyeisi dini bijo anai ei nibou ngwakti lewo noni pwoi nitnem ningon,

³⁴ lene gima bindei ba, no dima pwoi ibou can ingon. Sop di wak pinai bi kin sop gwam nitta pilei nya ikon mun di bitut Tuhan bijo anai ei ibou ngwakti bipwoi Tuhan ningona. Noro sop di wak nijjep tu kon mun di bitut dihyeisi dini bijo anai ei nibou ngwakti bipwoi nijjep ningona.

³⁵ Handei kon ba, mun di dipas kep dini hagom bimpu je lewo dicuon ser mun nyeng dini kin mun nyeng dima bi. Noro dingon llei sut gino jiyai munti nya bicim tindei mun di igbit kin mun di singat leu binhyepo jikon mun di bitut Tuhan dima bijo anai ei jibou ngwakti.

³⁶ Gino tungwagom kan bipia noni bon mun di igbit tut sop di noni yok wab kep tu dima bi ba, om kep ningonti kan bi ba, noni suar wak sop dima lene ma iwak yam hak ug. Sisar ntun niwak yamti him bi.

³⁷ Noro gino tungwagom kos tut bipia wak sop di noni yok wab kep tu bi ba, hiter wit huk noni tut bi ba, noni om ningut kanti nya kan lene nna ba iwak yam au.

³⁸ Gima rino no di wak sop di noni yok wab kep tu bon mun di kei lo, no di wak sop di noni yok wab kep tu dima bi bon mun di kei dor njiriek bu.

³⁹ Sop di wak nijjep nggre kin nijjep kikau bibou nijjep mai leu noni ug e. Tirigi nijjep mai leu lene sop dima nggre kin noni bu bi ba, gino bon nitutti ne wak pinai hiter hak ug lewo kwes mem noni. Noro suar no dima ne no di ningon jo kep Kristus tu.

⁴⁰ Mbro nok gima lo, gino bet ningon biwak nijjep bu bi ne gini cem kei. Gima ne ditde nipingok jeti ri. Lene dikan bipia dibit Allah Ninnei nibie tut dati.