KORINTUS GI NIGOM 6 - ALLAH NIHYET MEM TUNGWATU NYA

Yo di mbusyamei nya ipai kep yam ei nikei noho bei

¹ Gino munhyet srou yo di Kresten ibou can ne nggon rino noni pai kep nisut ei nikei di ningon tindur noho bei i? Nggon rino noni ba ningon com yo di mbusyamei nya di idem mem imbus munhyet dima bi i?

² Jikan tut bipia yo di mbusyamei nya migwam nok nikei di mbus tungwatu dihyeisi dini ingonti bi e? Gi nok ne nggon rino jidem mem gima jikos tut munhyet di bon ninyeng bi i?

³ Jikan tut bipia nyeni migwam nok nikei bimbus malaikati nya ingonti bi e? Gi nok ne dem tut gima imbus tungwatu nya ingonti tut munhyet di srou-srou nyen yok bikwop njap.

⁴ Gino munhyet sigi ser jingonti ne mijimbus yam ngonti ei yo di inggre kin mbusyamei nya bi yoho bei e?

⁵ Mei! Ma jimmai sut jenti hak ug! Jigom ningon ki mem gima ya hacan nok nikei bikos tut munhyet bak yo di Kresten di ipai kep yam bi e?

⁶ Noro no di Kresten pai kep nisut no di Kresten ei nikei di ningon jo kep Kristus bi noho bei!

⁷ Jide munhyet di bindei ba, jiya ei nikei di ningon jo kep Kristus bi noho bei ndo brei bipia jicut ei nikineisi tu. Handei kon ba, jiba jibou coi mem yo di igyai mun tunggwei sut je kin yo di ipos jide mun di jimati leu je.

⁸ Noro ningat ne je di jitig mbier tut yam ei Kristusti rino jiba nitok biyam bijipos jide mun di jimati leu yam nya.

⁹ Ma jiyok ngon kep bipia yo di ibit Allah ningon kanti mem yok bi nya minggre kin Allah Ninyeng Tak Kepti bi. Ma jikrau tunggwei jingonti au! Yo di icut tut yam kin yo di ikuk yok bak kwar kin yo di icut tut hi nitnem kin sop di icut tut yam kin pinai di icut tut yam,

¹⁰ kin ninggimang kep mun cig kin yo di idrui bou ngwak kin nidut kep mun di pu yok cig kin yo di ikkin kep hiter ninghapti kin yo di iris mitiei leu tungwatu yahagom inggre kin Allah Ninyeng Tak Kepti bi sren.

¹¹ Nipou ne jibou poi jibon mun tunggwei nok gima. Noro tini bu ne Tuhan Yesus Kristus kin nisindemti di kwei leu ide Allah Ninnei bindei ba, jiyai nipiap leu sisarti ba, Allah dimig je ei mem Nonti leu api jiyai ningon di kwes kin Allah hanyen tu.

Ma jiba jenti njem binggei sut Allah

¹² Ibou poi ipai “Nnaba diyai mun nyeng hagom.” Igbit ri! Noro mun di jiyai dima hagom kei mem je bi. Mbro nok gino dipai “Nnaba diyai mun nyeng hagom lo, disindui sut ba, diyai munti dima ubon da nok awak bi.”

¹³ Ibou poi ipai “Njita mem ninghop ba, ninghop mem njita.” I, noro Allah mibindei ba, njita kin ninghop hacem pror yon. Harin dima jiba jingut bicut tut yam a. Noro ma jiba jenti njem biyai midyai mem Tuhan leu api Noni minyohou je.

¹⁴ Allah win Tuhan Yesus hanyen leu nimai eisi tu. Ba, Noni miwin nyeni cem hanyen leu imai eisi tug hon Nide nisindemti.

¹⁵ Jikan tut bipia jingut dima nggre kin Kristus ninguda. Gima ne bon dikus nimbumbati gom di nggre kin Kristus ningut leu api dibicim tindei sop krar ningut e? Nok gima bi sren!

¹⁶ Jikan tut gini bi e? No di cut tut sop krar ne bindei ba, yahacem inggre kin yam. Bit leu nok gi ipas ei Allah nihyetti “Yahacem inok ninghui gom.”

¹⁷ Noro tungwa tou rino nggre kin Kristus ne Kristus Ninnei kin noni ninnei yahacem inok gom.

¹⁸ Ma jimbres jenti leu sisar nicut tut yamti. Lewo sisar nindigsi nya di srou tungwatu nya ket ei inghuisi bi. Noro sisar nicut tut yamti ket ei inghuisi.

¹⁹ Suar jikan tut bipia jingut nok ig mem Allah Ninnei ba, Allah kes Nonti Ninnei ei jingonti bibong ser jingonti. Jimbun jenti jingut bi noro Allah rino mbun jeni.

²⁰ Noni ba nibok bipek je bijinok Nide bu. Gima rino ma jiba jenti njem binggei sut Noni.