KORINTUS GI NIGOM 16 - ALLAH NIHYET MEM TUNGWATU NYA

Mitiei di ikwas tut isut bat yo di ingon jo kep nya

¹ Nogindini dipai bije tut mitiei di jimbus ei mem jisut bat yo di Kresten nya ei hanjop Yudea. Ma jiyai hagom bit leu nok ditde nipingok mbusyamei nyati ei hanjop Galatia.

² Bikwop njap nigwam kep ninghuisi lene ma tungwagom-gom ba ninda boom mitiei ndrim hi leu mitiei nimangti di noni tug ndei bijo keyam bikum yam ei bipek njap di dihwousi. Leu binhyepo jimbus mitiei hi kin bu tirigi dihwousi bi.

³ Tirigi dihwou ngat jeni ne midicuk ibou poi di jindo yok ei su nya bidiyai srat nibie tut yokti biyok leu binhyepo yuug sut mitiei di jimbus ei su ug ei minu ndig Yerusalem.

⁴ Gino dem mem gima dibit yok ug ei minu ndig Yerusalem ne midiba da bikum yok.

Paulus simbot kep tut nimbutti nya

⁵ Midihwou ttau kep je sindam niabiati diya bidem hanjop Makedonia leu su lewo dikos tut mem diya bidem minu dima.

⁶ Gino bon nikwesti mem da lene midibong bit je mem njap poi bibou bed di biang hou ngwig ug e. Gima ngwig leu api jimpu da tut mun di disuar mem dibinut dimbutti nya kikau ug ei minu hiter bu sindam.

⁷ Nogindini dibon nituti di jei mem dihwou bong bit jeni bi. Gino Tuhan sindui sut lene dibon nituti mem dihwou bong bit je mem nituti di jei.

⁸ Noro digwam ei minu ndig Efesus dini bibou Njap Pentakosta ngwig ug e.

⁹ Mbro nok gino tungwatu nya imang bibor itte tut da ei minu ndig dini lo, diyai nituti kin nikwesti mang bibor mem gima diyai kep Tuhan de midyai di ningat nindig mintun him.

¹⁰ Gino Timotius hwou ngat je lene ma jiba jingon di nggriu biya um noni leu binhyepo gwam bit je kin ningon di kei lewo noni yai kep Tuhan de midyai nya noyam kin da.

¹¹ Ma hi ningwes pri gau noni au. Noro ma jimpu noni leu binhyepo noni ba ningon di jo nyahan bimbut nut bu ba, ngkwei hanyen ndam da lewo diyok dingon mem noni kin nisut bat nindigsi nya ikweisi.

¹² Tut ikindig Apolos ne dibidip huk noni nyen leu binhyepo bit nisut bat nindigsi nya ba, ihwou cem kep je. Noro ningon kiowi tut nikwesti mem gima ug cem kep je mem nijam dini. Mbro nok gima lo, gino bon nikwesti ne mihwou ngat je yo.

Paulus pas srat ningwigsi bikes ninda tut

¹³ Ma jiyai ngkiem bijiba jingon di nddong bingon jo kep Kristus ningginausi nya. Ma jiba jingon di nddong biyai jibou tut yo di itte tut je lene ma jiyai nisindemti.

¹⁴ Ma jiba ningon ngakei yamti biyai jiyai munti nya hagom.

¹⁵ Disut bat jen, jikan tut Stefanus kin nide bat nya di ingon jo kep Tuhan nok mighumbou mem hanjop Akhaia hagom. Yoni ita ibou ei midyai nahati tut yo di mbusyamei yahagomti.

¹⁶ Ditigtai je leu binhyepo jikuk je bak yo dima ide nipingok jeti. Lene tut nindigsi di igyai midyai noyam kin yoni lene ma jikuk je bak yoni bijibit ide nipingok jeti.

¹⁷ Dingon llei sut Stefanus kin Fortunatus kin Akhaikus nya di ikwei ya luei johoti tu.

¹⁸ Ibiyai dingon nggan-triot bit leu nok ibiyai jeni cem jingon nggan-triot. Ma jikuk je bijibit ighyet.

¹⁹ Mbusyamei nya ei hanjop Asia hagom ipigo je. Akwila kin Priskila kin yo di mbusyamei ei ide ig bei cem yahagom ipigo je bibor ei Ninjei Bit Krestenti.

²⁰ Disut bat yo di Kresten ei minu dini yahagom ipigo je. Ma jipigo yam noyam kin yo di Kresten di ingon ce yam bi.

²¹ Diba dinda ceti binut bu, Da di Paulus dipigo jahagom o!

²² Ma Allah sigion no di ningon ngakei Tuhan bi! Maranatha! Tuhan e, ma akwei hanyen!

²³ Handei kon ba, Tuhan Yesus singat tut je.

²⁴ Dingon ngakei je di jinok gom kin Kristus Yesus jahagom. Nipigo leu dani, Paulus