KORINTUS GI NIGOM 13 - ALLAH NIHYET MEM TUNGWATU NYA

Ningon ngakei yamti di mungkun

¹ Mbro nok gino diji nggan tut tungwatu ighyet kin imalaikati nya ighyet kan lo, dingon ngakei tungwatu nya bi lene nihyet di tibim ei duhui him dem kep nugwei di bong di ndo tut mun nyeng hi bi.

² Mbro nok gino ditri tut Allah nihyet cem dingon ki cem dingon dor mimunti kin nimbot kepti nya hagom cem diba dingon com Allah nindig bibor bidibindei ba, nungug ttou son leu niyati cem lo, gino dingon ngakei tungwatu nya bi lene dibon dinyeng bi!

³ Mbro nok gino ditri mun di dimbun nya hagom bingwig leu da bidibipek mitiei lene dikwas tut nuhui mbum nya e, he dibikes dingut ei mem dibiyai nimai ei humti e, noro gino dingon ngakei tungwatu nya bi lene dibitug ndei mun nyeng hi bi.

⁴ No di ningon ngakei hiter ningon jo nyahan ba, ningon nggriu cem. Bou dut bi, ningon jei bi, ningon llei-llau sut nonti bi,

⁵ mbut sin tungwatu nyati bi, drui bou ngwak bi, ningon prinder bi, ningon koi kep tungwatu nya bi.

⁶ No di ningon ngakei hiter ningon llei sut nibon mun kineisi bi noro ningon llei sut ningon kwes kin yamti.

⁷ No di ningon ngakei hiter ningon dahat bi noro ba ningon com nisingatti di ntun tungwatu nya him. Nide niba ningon comti ug hon nohonti bi sren ba, ningon jo nyahan mem mun di pek kep mem noni hagom.

⁸ Nijam mem tungwatu nya ingon ngakei yam ug hon nohonti bi sren. Tut no di tri tut Allah nihyet mem nijam dini mporo jei bi ne noni kes hon bitri tut nihyet bu bi. Tut no di ba nihyet mindur bimbrap mem nijam dini mporo jei bi ne noni mikes hon ba, ba nihyet mindur bimbrap bu bi. Tut yo di ingon dor mun nyeng mang biborti mem nijam dini mporo jei bi ne ingon prion ser mun di ingon dorti tut.

⁹ Lewo ide ningon dorti tut mun nyeng mang biborti kin ide nisindemti mem gima itri tut Allah nihyet mahan ba, kei-kau cem bigyo.

¹⁰ Ei nidipti bu lene tto bou dem mem Allah bindei ba, mun nyeng hagom mahan ba, kei-kau cem. Mpe dima lene mun di mahan bi kin mun di kei-kau bi mipror yon.

¹¹ Mpe di dimien lene dimbrapti kin dikan-kanti nyenti kin dingon dorti tut mun nyeng hiti noyam kin munggwom mien nya. Noro tini bu ne dindig su ba, dikes diyai kepti dima hagom hak leu da tu.

¹² Mun di ingat ei igyai him mem nijam dini noyam kin ingwes di ingat ei kisinati di pimber. Noro ei nidipti bu lene ingat ningat brei bisieng-siau kei. Ei nijam dini lene dingon dorti tut mun nyeng hagom bi. Noro ei nidipti bu lene midingon dorti tut mun nyeng hagom bit leu nok Allah ningon dorti tut dingon bei triti.

¹³ Mem nijam dini ne suar ibrim ingkek mem mun nyeng ningai. Niba ningon com Allahti kin niyok ningon mem Allahti kin ningon ngakei yamti. Noro gi hi di bon ninyeng dor njiriek nindigsi rino ningon ngakei yamti.