KORINTUS GI NIGOM 10 - ALLAH NIHYET MEM TUNGWATU NYA

Suar jimbres jenti leu kwar nya

¹ Disut bat jen, ma jiyok ngon kep mun di pek kep mem idigup bat-idigai bat nya di ibit Musa. Bumbuhui ttou nyohou yok ba, yahagom isigon Muk Ngwoi bikwei dihip ei nite dini kwei.

² Mun di pek kep mem yok tereu nok dimigyam di igyai tug hon bumbuhui ttou kin Muk Ngwoi ba, inok gom kin Musa.

³ Yahagom igyem kep njita di mindur

⁴ lene idut kep ndia ngei di mindur di Allah pai tes mem yok cem noyam. Idut leu minyei bousi di hei kwei leu tig mindur di abia kep yok ba, tig dima ne Kristus Nonti ri.

⁵ Mbro nok gima lo, idigup bat-idigai bat nya nimang ndig ipwoi Allah ningon bi. Gima rino Noni bindei ba, imai sinsiou ei iggum ndigsi.

⁶ Mun di cut igkep yok bisok kep nye leu binhyepo iba yoho rok mun di kinei noyam kin yoni au.

⁷ Ma ikuk nye bak kwar cem noyam kin yoni au. Bit leu nok gi ipas ei Allah nihyetti “Ikuk yok bigyem njita bidut mun di pu yok leu api ikiju bigya ba, iba ingon di llei bikuk yok bak kwar nya.”

⁸ Harin dima icut tut yam noyam kin yo ngot ndig dima di icut tut yam. Lewo ibou sribu nyatungwagom ba, ningai itug ndei nimai drek dip ide nicut tut yamti mem njap gom ndia.

⁹ Harin dima iba ide sisar di yoni ibon nya bibingon Allah nisingat tut nyeti noyam kin yo ngot ndig dima. Lewo wou piet nya yaham yok bimai drek dip.

¹⁰ Harin dima ilua sok nok gi yoni ilua sok a. Lewo Malaikati di ninyeng tak kep Nimai bindei ba, imai drek dip.

¹¹ Mun di cut igkep yo dima hagom ndo bindo bak yo di hiter. Ba, tungwatu nya ipas kep hagom nok nihyet di bisok kep nye. Lewo nyeni igyaijo mem nijam di son dideu njap ningwig honti.

¹² Ma no di kan bipia ningon nddong kei ningon sok kep nonti leu binhyepo cut ei sisarti au.

¹³ Mun nyeng hagom di bingon kep jingonti dima bingon kikep tungwatu nindigsi nya cem ingonti bikwop njap ngwa hagom. Noro bit bon Allah ngkwei hanyen leu Nide nipreu ei mem nyeti kan bi. Noni misindui sut Bilis bingon kikep jingonti dor njiriek leu jide nisindemti bi. Tirigi Bilis bingon je lene Allah mitin puig mem je leu binhyepo jingwes ngun tug hon nisindemti di Noni yai bije.

¹⁴ Gima rino disut bat di dingon kieti jen e, ma jimbres jenti leu nikuk je bak kwarti nya.

¹⁵ Dimbrap bit jeni tereu nok jiba jingon di ki bisrip huk dihyet.

¹⁶ Idut ei gi mokti di biei ngat ningei joti ba, ipai sigyo kep ne igyai munti dima ndo bipia ipriet kin Yesus ninggrom. Igyem roti di iki kukiau lene igyai munti dima ndo bipia inok gom kin Yesus ningut.

¹⁷ Mbro nok gino nyeni imang bibor lo, inok ningut gom ngat tug hon roti nindak gom ngat di iki tut yam dima.

¹⁸ Ma jiba jingon bisrip huk tut mben Israel ug e. Yo dima igyem mikwau ndrim hi leu mindhe di ibui bibam ei nimbar hum dokti nya lene gima bindei ba, inok gom kin nimbar hum dok.

¹⁹ Dibiyai hamem dingon nok mindei i? Kwar kin mun di ibikuk yok bak kwar bon ninyeng bi e?

²⁰ E bi! Mun di ibui bibam ei nimbar hum dokti bak ide kwar ne mun di ibikuk yok bak Allah rin bi noro mun di ibikuk yok bak ninnei rom nya. Lene dikou sut gi jinok gom kin ninnei rom nya.

²¹ Bit bon jidut ei Tuhan de gi mokti kin ninnei rom nya ide gi mokti hacem nggre gom kan bi. Bit bon jiyem njita kui Tuhan de meja kin ninnei rom nya ide meja hacem nggre gom kan bi.

²² He ma ijoi sut Tuhan ningon kinei sut nye e, he isindem njiriek Noni e?

²³ Nihyet nibiti nindati pai “Nna ba igyai mun di niggai serti nya srep bi nya hagom hak ug.” Igbit ri! Noro igyaisi dima hagom kei mem nye bi. Mbro nok gino ipai “Nnaba igyai mun di niggai serti srep tut bi nya hagom” lo, ma isindui sut ba, igyai munti dima ubon nye nok awak au.

²⁴ Harin dima tungwagom ta nibou ei mun di bon ninyeng mem nontiti he a. Noro ma noni ta nibou ei mun di bon ninyeng mem yo di hiterti.

²⁵ Tut mikwau di tungwatu nya itri ei biyati ne ma jipek bijiyem hak ug. Nok gino jingon bei huk niti tut lo, jinggok tut gima au.

²⁶ Bit leu nok gi ipas ei Allah nihyetti “Tuhan nyeng tut dihyeisi dini bitut mun di joti nya hagom.”

²⁷ Gino no di ningon tindur ngei njita hi bina ba, ajoi sut gima ayem njita bit noni lene ma ayem njita di noni ngei bina hak ug. Ma ahig ser noni tut njita nikwei leusi au. Leu binhyepo angon bei huk niti tut njita dima bi.

²⁸ Lene gino hiter mbot kep tut bina bipai “Tungwatu nya ipigig ser njita dini mem ide kwar nya.” Gino pai bina nok lene ma ayem njita dima au drek dip no di pai sut gima binani ba, drek dip ningon bei di huk niti cem.

²⁹ Gi dipai dini tut jide ningon bei di huk niti bi noro tut no dima ningon bei di huk niti. Lo, jigom buhup “Mbenjen! Nggon rino hiter ningon bei huk niti dima ngot kep da ser leu ba diyai mun bit leu dingon kanti bi i?

³⁰ Gino dipai sigyo bak Allah kep njita di diyem lene nggon rino hiter ba nihyet biyai da tut i? Lewo dipai sigyo kep njita dima tu.”

³¹ Nnaba tut njita di jiyem kin ndia ngei di jidut ne ma jiba jiyai munti dima yok hagom binggei sut Allah.

³² Ma jiyaijoti nya bindei ba, mben Yahudi kin mben Yunani kin jisut bat di Allah de mbusyamei nya icut ei sisarti au.

³³ Ma jiyai bram diyaisi. Dibrim dingkek leu binhyepo dipwoi tungwatu nya ingon drek dip diyai munti nya hagom. Dibrim dingkek mem mun di bon ninyeng mem danti bi noro mem mun di bon ninyeng mem tungwatu yahagom leu binhyepo bon nituti mem igyai niteu leu sisarti kin niyaijo nijep.