KORINTUS GI NICAN 8 - ALLAH NIHYET MEM TUNGWATU NYA

Ningginausi tut yo di Kresten di iba munkwas bingondut yam

¹ Disut bat jen e, handei kon ba, jingon dorti tut Allah nisingat tut tungwatuti di yai bak yo di mbusyamei ei hanjop Makedonia.

² Mun di buhun bibor cut igkep yok bibingon kikep yok. Mbro nok gima lo, ingon llei bibor kikau. Mbro nok gino yuhui mbum bibor lo, iba ide munkwas bingondut yo di hiter.

³ Dikan mungkun tut bipia yoni ikwas munkwas dima bit leu isindemti lene igyai bidor tunggwei bu. Hi pingok ingonti tut bi,

⁴ noro yahara mem nye leu binhyepo gino bon nikwesti ne yoni cem iba munkwas bingondut Allah de limwa nya ei hanjop Yudea.

⁵ Lene ikwas munkwas bidor tunggwei niba ningon com yok tutti. Nimbie him ne idimig yonti njem ei mem Allah leu api ice tut bibit nipingok yokti bit leu Allah ningon kanti mem yok.

⁶ Titus kinyon ei midyai nimbus munkwas keyam leu je nipou su. Gima rino nahara mem noni leu binhyepo yai kep gima kikau biput kep ug e.

⁷ Jide niba ningon com Kristusti kin niji ngkiemti kin ningon ki tut nijit-jausi kin ningondut yamti kin ningon ngakei nyeti hagom bindei ba, jinyeng bibor. Gima rino gi kei mem jiya bibie mem nindigsi nya tug hon munkwas nibingondut yamti dini cem.

⁸ Gi dipai dini ne nicukti rin bi. Noro yo di hiter ita ibou ei ningondut yamti. Gima rino diba ide ningondut yamti binai jide ningondut yamti.

⁹ Jikan tut ide Tuhan Yesus Kristus nisingat tut nyeti di nindig bibor. Mbro nok gino Noni nyeng tut mun nyeng hagom lo, kes mun dima yok hagom ei leu bibibon Nonti nuhui mbum drek dip je leu binhyepo ba nuhui mbumti dima bibindei bijinyeng bibor.

¹⁰ Bit leu dingon kanti ne handei kon ba, jiyai mun di jikinyon eisi ari bingwam gi pini jug biput kep ug e. Lewo jikos tut midyai dima bijikinyon eisi cem bibie leu nindigsi nya.

¹¹ Gima rino ma jibinut midyai dima kikau bit leu jide nisindemti. Ma jita jibou ei midyai dimati biput noyam kin gi jikos tut bijibrim jingkek mem nipou su.

¹² Gino jitin ei bijikwas munkwas tut yo di hiter kin jingon di gom lene Allah mijoi sut jide munkwas di jiyai bit leu jimati. Gino jima mun hi bi lene Noni yok ningon mem munkwas leu je bi.

¹³ Dem tut gima dikwek yo di hiter leu mun di suar ibuhup tut nya bidikes gima hanyen ei jinghat dip bibuhun tak je bi. Noro dem tut gima,

¹⁴ jiba jide mun di jimati di dem bidor njiriek mem je bahati tut nuhui mbum nya. Gino juhui mbum ei nidipti bu ne dem tut gima yoni iba ide mun di imati di dem bidor njiriek mem yok bahati tut jeni bu. Tug hon nisinati dima yahagom ingondut yam.

¹⁵ Lewo Allah nihyet pai, “Yo di ikam njita nindig bibor ne nikenti jo bi ba, yo di ikam nimien ne ide dem mem yok. Gima rino yahagom ikam njita dem igbit nimangti di isuar.”

Titus kin nisut bat nya ittei yam bit leu Paulus nicuk yokti

¹⁶ Nipai sigyo bak Allah lewo Noni ribindei di Titus cem ta nibou ei midyai nimpu jeti noyam kin nyeni!

¹⁷ Noni ce tut bibit nyende nipingok noti bita nibou ei nimpu jeti he bi noro kos tut bipia hwou ngat je bit leu nijoi sutti.

¹⁸ Nipinak isut gom bibit noni. Mbusyamei nya yahagom inggei sut no dini lewo ta nibou ei midyai nitri tut Nihyet Di Keiti.

¹⁹ Gima cem mbusyamei nya icom ighyet tut noni bidimig noni ei leu binhyepo ba no bikum nye kak nimbutti. Lewo jei bi ne nimbut tut munkwas mem nuhui mbum nya ri. Tug hon nisinati dima ne nibinggei sut Tuhan binindo brei bije bipia ninggok biken tiri ningondut yam cem.

²⁰ Ninyohou yai sut midyai dini leu binhyepo bon nituti mem hi pai kep nye drek dip munkwas di nindig bibor di nipwoi di nuug sut dini bi.

²¹ Nikos tut bipia niba ningon di sren biyai midyai dini ei Tuhan niyai him he bi noro ei tungwatu nya cem igyai him.

²² Gima rino nicuk isut gom kin bu bit Titus kin gi hi di nipai sut nipou su. Nimbus isut gom dini ningonti bidem tu ba, jo nibreisi bipia noni joi sut mpu nyen tungwatu nya. Nogindini noni ta nibou ei nimpu jeti dor njiriek lewo ba ningon com je nindig bibor.

²³ Titus ne ditom ri. Noni ya kui da ba, nyeni niba niyai munti nya bahati tut je. Yo di mbusyamei nya idimig yo cin di ibit noni ei bicuk yok drek dip ide midyai di igyai kikep nya di binggei sut Kristus.

²⁴ Ma jingon ngakei yok leu api jinghapti mitibim ug ei mbusyamei nya di icuk yok hwou itingou nsi. Mbusyamei nya hagom migyok ngon kep bipia dem tut gima ninggei sut je.