KORINTUS GI NICAN 5 - ALLAH NIHYET MEM TUNGWATU NYA

¹ Lewo ikan tut bipia mpe dino ingut di nok ig di ibong ser ei dihyeisi dini nggek lene Allah tin ei ig mem nye ei gwamti. Noni ngot ig dima bou ninda him ba, jo ninno bijo kikau.

² Inso-nso nyen mem nijam di ibong ser ig di ntun dihyeisi dini him lewo ingon ya mem gima yuug bong kep ide ig di jo ei gwamti.

³ Ig dima ne ingut di nijep bu ri.

⁴ Inso-nso nyen mem nijam di ibong ser ig di ntun dihyeisi dini him lewo mun di buhun bibor buhun tak nye. Ijoi sut gima ikes ingut di ntun dihyeisi dini him ei bi. Noro ijoi sut gima iba ingut di ntun gwamti him bijuk ingut di ntun dihyeisi dini him leu binhyepo mun di jo kikau mipinde mun di mipror yon bingwig hak ug.

⁵ Allah tin ei ingonti mem mun di mipek kep mem nye dima bikes Nonti Ninnei ei nyeni ingonti nok bindo di bitak buk kep mun di hagom di mibitimon nye.

⁶ Gima rino nyeni ingon ngkiem kikau. Ikan tut bipia gino ibong ser ingut di nok ig dihyeisi dini ne ingat rin ei minu ting leu ig di nyeni mibong ser bit Tuhan.

⁷ Lewo igyaijoti dini ntun ide niba ningon com Kristusti him noro ntun mun di ingat bou igyai him bi.

⁸ Gima rino ingon nddong. Igyok ingon mem nituti tirigi ikes ingut dini ei leu binhyepo yuug bong bit Tuhan.

⁹ Gima rino ibrim ingkek bipwoi Tuhan ningon mem nijam dino ibong ser ig di ntun dihyeisi dini him kin nijam dino yuug ei ginyo kug cem.

¹⁰ Lewo ikan tut bipia yahagom mikuk nye ei Kristus Noho bei lewo Noni ne Nikei ri. Noni mimbus tungwagom-gom ningonti leu api buhup biyok bit leu nok igyai munti di kei nya kin gi kinei nya di igyai kikep tirigi ingat rin ei dihyeisi dini.

Ningon kwes kin Allahti tug hon Kristus

¹¹ Nyeni ningon dorti tut nittin tut Tuhanti. Gima rino nibrim ningkek kep tungwatu nya leu binhyepo ikan tut bipia ningon gom. Allah kan tut mun di jo ei nyeni ningon bei. Lene diyok dingon mem gima jeni cem jikan tut da bit leu Allah nikan tut dati.

¹² Tut gima ne ninggei sut nyenti binindo ningon di jei bije bi. Noro ninggok biken tirigi jikon nyeni ninyeng. Leu binhyepo jiba ningon di dorti bibuhup yo di yuhuk bram tungwatu nya itta he noro yuhuk bram mun di jo ei ingonti bi.

¹³ Gino hi pai kep da bipia dintin kiek ne diba dintin kiekti dima bahati tut Allah. Gino hi simbot dat bipia dingon tungwatu ne diba dingon tungwatu dima bahati tut je.

¹⁴ Kristus ningon ngakei nyeti ninyeng tak kep niyai munti nya. Ba, nikan tut bipia tungwagom ngat mai biya luei nindigsi nya yahagom. Gini ndo bipia yahagom imai ei ide sisarti tu.

¹⁵ Kristus mai biya luei tungwatu yahagom leu binhyepo yo di igyai niyaijo nijep ibrim ingkek mem ingut kanti nya bu bi noro mem Kristus di mai leu api Allah win Noni hanyen leu nimai eisi mem yok.

¹⁶ Gima rino niyok niyai kep tungwatu nya bit leu tungwatu dihyeisi dini igyai kepti nya bi. Mbro nok gino niyok niyai kep Kristus bit leu tungwatu dihyeisi igyai kepti nya nipou su lo, niyai nok gima bu bi.

¹⁷ Tungwa tou rino nok gom kin Kristus tu lene no dima nok tungwatu di nijep-jau bu. Ba, niyaijoti nitimiei pror leu su leu api niyaijoti di nijep-jau luei bu.

¹⁸ Allah bibon mun dini yok hagom. Nipou ne iba nitok bak Allah noro Kristus yai ingon kwes kin Allah hanyen. Ba, Noni bon nituti mem hiter igyai ingon kwes kin Noni hanyen tug hon midyai di Noni kes ei nyeni dip.

¹⁹ Nitri tut bipia Allah yai tungwatu yahagom ingon kwes kin Noni hanyen tug hon Kristus. Noni kwop kep ide sisar di ibon tunggwei sut Noni bu bi. Leu api Allah kes midyai nitri tut ningon kwes kin Noniti hanyen ei nye dip tu.

²⁰ Nyeni niya luei Kristus di cuk nye nohoti tereu nok Allah Nonti sok nihyet ei nye dip bak tungwatu nya. Nitigtai je tug hon Kristus ninyeng leu binhyepo jisindui sut ba, Allah yai jingon kwes kin Noni hanyen.

²¹ Kristus bon sisar nyeng gom bi sren. Noro Allah bindei ba, Kristus biang ide sisar bitut ide ningon muisi nibuhunti hagom leu api yai ingon di kwes kin Noni hanyen drek dip ide ninok gom kin Kristusti.