KORINTUS GI NICAN 4 - ALLAH NIHYET MEM TUNGWATU NYA

Allah Ninnei nisindemti jo ei dibijigti

¹ Niyai kep midyai dini tug hon Allah nisingat tut nyeti lene ningon cut leu bi.

² Niba nisinati di ntun nidinditi him di bindei biniba nimmai sut nyenti biyai kep midyai dini bi. Ningon mang ba, nikiek-kiek nyen Allah nihyet bi. Niba ningon di gom biyai kep Allah de midyai nya bit leu ningon kanti mem nye. Gima rino niba ningon com bipia tungwatu yahagom ibibon nye nok gi kei ei ingon mienti.

³ Leu gino tungwatu nya ingon dor Nihyet Di Kei di nitri tut dimati bi ne gima tut yo di israwir di ingon dorti tut Nihyet Di Kei dima bi nya he.

⁴ Ingon jo kep bi lewo Bilis sibut bibor ba, ninyeng tak kep tungwatu dihyeisi dini. Noni rino biyai ingon di dor mun di bitut ninneiti bi. Apino bit bon ingat igbit nikei-kau-keisi di piga kwei leu Nihyet Di Kei dima kan bi. Ba, Kristus dima ningat ndo Allah ningwes brei binye.

⁵ Lewo nihyet di nitri tut ne nihyet tut nyenti bi noro nitri tut Yesus Kristus ba, Noni ne Tuhan ri. Lene nuubon nyenti nok awak mem je leu binhyepo nibinggei sut Noni.

⁶ Allah di pai “Ma nipigati piga kwei leu nidinditi” noyam kin Allah di piga digai nyeni ingonti leu binhyepo ingon dorti tut Allah nikei-kau-keisi di piga kwei leu Yesus Kristus niimaisi.

⁷ Noro mun di bitut ninnei di kei-kau-kei dima jo nyahan ei ingonti noyam kin mun di jo ei dibijigsi. Tug hon nisinati dima ne jo nibreisi bipia nyeni imbun nisindemti di sindem bibor nya bi noro Allah Nongkom rininyeng tak kep.

⁸ Nimpung nindigsi nya ihwen bit nye ninyen noro nicut biyok bi. Mpe hi ne ningon kiowi eisi noro ningon cut leu bi sren.

⁹ Tungwatu nya imang bibor iba nitok binye noro Allah kes nye ei bi sren. Mbro nok gino ibui nye kinei-kinau lo, igyai nimai binye bi.

¹⁰ Nahanok ma nibiang hukum nimai bikwop njap ngwa hagom noyam kin Yesus di biang Nide biei salib leu binhyepo Nide niyaijo jo nibreisi sindam tug hon ide niyaijo di mipror yon.

¹¹ Niya hon niyaijo ningwig honti bikwop njap ngwa hagom kikau drek dip Yesus leu binhyepo Yesus niyaijoti jo brei bou tungwatu nya igyai him tug hon ningut di mipror yon dini.

¹² Nimbot kepti rinok gini. Nimai yai nibou tut ningon kanti mem nyeni noro niyaijo nijep yai nibou tut jingon mienti.

¹³ Bit leu nok gi ipas kep ei Allah nihyetti “Dingon jo kep Allah. Gima rino dimbrap a.” Nyende niba ningon com Allahti di noyam kin nihyet dima bindei ba, ningon jo kep. Gima rino nimbrap a.

¹⁴ Ningon ngkiem tut bipia Allah di win Yesus hanyen leu nimai eisi miwin nyeni cem hanyen noyam kin Yesus leu api mibuwak nyeni bitut jeni cem yahagom ug ei Yesus Noho bei.

¹⁵ Mun dini yok hagom bindei ba, mun di kei pek kep mem je. Leu gino Allah nisingat tut tungwatu nyati kieng kep dihyei nisurti-nipekti sindam ne tungwatu mipai sigyo bak Noni. Tug hon nisinati dima ne ikon Allah ninyeng sindam.

Ningginausi tut igyaijo tug hon ide niba ningon comti

¹⁶ Gima rino ingon cut leu bi sren. Mbro nok gino ingut nggek sindam bikwop njap lo, ingonti di bitut innei kum ei nide nisindemti sindam bu bikwop njap.

¹⁷ Mun di buhun tak nye di jo kikau di bon ninyeng bi dini bie tut nye ug ei ningon llei sutti di mindur di jo kikau. Gino ibinai hacem kin yam ne ningon llei sutti dima nindig bibor dor njiriek mun di buhun tak nye.

¹⁸ Lewo ibisau sut mun di ingat bou igyai him bi. Noro ibisau sut mun di bit bon ingat bou igyai him kan bi. Mun di ingat bou igyai him mipror yon. Noro mun di bit bon ingat bou igyai him kan bi jo kikau.