KORINTUS GI NICAN 2 - ALLAH NIHYET MEM TUNGWATU NYA

¹ Gima rino dikos tut bipia dihwou ngat je bu bi nhyema dibiyai jingon di buhun bi.

² Leu gino dihwou yai jingon buhun lene tou rima biwin kep dingonti bu i? Hi bi. Lewo jingon buhun drek dip da.

³ Gima rino dipas srat dima bije. Dingon kou sut gima dihwou ngat je mem nijam dima leu ma jibindei bidingon buhun lewo suar jeni rino jibiyai dingon llei bibor. Dikan tut bipia gino dingon llei bibor ne jeni cem jahagom jingon llei bibor bit da.

⁴ Diba dingon di ngguk kin dingon di buhun kin diyai nggwei di kibor bipas kep srat dima bije. Leu binhyepo dibiyai jingon buhun e? E bi! Noro dipas kep srat dima leu binhyepo jibikan tut bipia dingon ngakei jahagom nindig bibor.

Nikos ser niyai mun tunggwei sut yamti

⁵ Gino hi yai mun di biyai hiter ningon kinei ne niyaisi dima biyai dingon kinei bi noro biyai jahagom jingon kinei. Gino jahagom bi ne jibou poi he. Dipai nok leu binhyepo dingon dindi bibor tut no dima bi.

⁶ Gino no dima tug ndei hukum tug hon je di mbusyamei nindigsi nya lene dem.

⁷ Noro tini bu ne ma jikos ser no dima niyai mun tunggweisi bijipingok kep ningonti leu binhyepo ningon buhun kikau biningon cut leu bi.

⁸ Ditigtai je leu binhyepo jindo brei sut mun di bindo binoni hanyen bipia jingon ngakei noni.

⁹ Dipas kep srat dima bije leu binhyepo dibingon je ba, dinggok tut gino jitin ei mem jibit ditde nipingok jeti nya kikau.

¹⁰ Gino jikos ser hi nide mun di yai tunggwei ne bitut dani cem ba, dikos ser tu. Lewo tut mun di dikos ser tu (gino ningat ne suar dikos ser mun nyeng hi) ne dikos ser ei Kristus niyai him lewo disingat tut je.

¹¹ Diyai nok gima leu binhyepo bon nituti mem Bilis om kep nye bi. Lewo Bilis ningon kanti nya jo nibreisi mem nye.

Paulus pui sut nikrau ningon tut Titusti ei minu ndig Troas

¹² Tirigi duug krau minu ndig Troas biditin ei mem ditri tut Nihyet Di Kei tut Kristus lene dingat lo, Tuhan bon nikwesti mem diyai kep Nide midyai nya ei mpia dima.

¹³ Noro dikrau dingon tut isut Titus lewo dingat ningat bi. Gima rino dipigo Allah de limwa nya bidikes yok ei leu api dimbut kikau ug ei hanjop Makedonia.

Ibindei timek sisar nisindemti tug hon Kristus

¹⁴ Noro nipai sigyo bak Allah di bindei ba, nicoi bit nimpung yo di ibindei timek sisar nisindemti tug hon nyende niyaijo nok gom kin Kristusti. Allah ba nyeni bitri tut Kristus ningginausi leu api nihyet dima ntek gimahap nok ninghap di ui-gwang kei di nuui kieng kep mpia.

¹⁵ Lewo inoyam kin biei nggrai di ui-gwang kei di Kristus ndig ei Allah Noho bei. Ninghap di ui-gwang kei dima kieng kep yo di ikak puig ug ei niyaijo kikauti kin yo di israwir nya di yuug dor humti.

¹⁶ Mem yo di israwir nya ne inoyam kin ninghap di hwen yok ba, imai. Mem yo di ikak puig ug ei niyaijo kikauti ne inoyam kin ninghap di ui-gwang kei di biyai niyaijo nijep. Tou ridem mem midyai dini i?

¹⁷ Nyeni ninoyam kin yo di hiter di iba Allah nihyet bikek noyam kin ndigban di nitri-binibipek ndiyok bi. Niba ningon srenti kin ningon gomti biyai kep Allah de midyai nya bou Noni niyai him lewo Noni cuk nye. Noni ngat bipia ninok awak di tri tut nihyet.