KORINTUS GI NICAN 11 - ALLAH NIHYET MEM TUNGWATU NYA

Paulus pai kep nibou nitrowai nya

¹ Mbro nok gino diba dintin di kiek bimbrap bit je noyam kin no di ningon jei lo, ma jisindui sut da mbigom ug e.

² Dingon ya mem je nindig bibor noyam kin gi Allah Nonti cem ningon ya mem je. Lewo jinok dikwohop nigwam nitta pilei. Diyok wab kep je mem tungwagom ba, No dima ne Kristus ri.

³ Noro dikrau dingon tut je leu ma hi muhum jinsi leu ba, jingon gom tut Kristus bu bi. Gima noyam kin mun di cut igkep Hawa mpe di wou di ningon mang hum ninsi ba, ris noni.

⁴ Ningat ne jiba jingon di llei biya um yo di itri tut Yesus nitrowai bije. Ba, Yesus dima ne Yesus nijit di nitri tut bije rin bi. Ba, jiya um ninnei nitrowai kin nihyet di kei nitrowai di noyam kin Allah Ninnei kin Nihyet Di Kei di nitri tut bije nipou su cem.

⁵ Dikan tut bipia dani ei bijehei leu nibou di mipbor ngat nya di itri tut nihyet bije bi!

⁶ Mbro nok gino dikimut duhui lo, dingon ki tut mun di nijit nok gi dem. Dindo gini brei bije tug hon mun nyeng hagom tu.

⁷ Tirigi ditri tut Nihyet Di Kei leu Allah bije lene dahara je mem gima jimpu da poi mien cem bi. Tug hon nisinati dima lene doom da ei bijehei leu binhyepo dibikon jinyeng. Diba nisinati dima biyai mun tunggwei sut jeni e?

⁸ Tirigi diyai midyai ei jikieti ne mbusyamei hiter nya iba munkwas bahati tut da. Gima tereu nok dibrim mun leu yok leu binhyepo dibimpu je.

⁹ Tirigi dingat rin bit je ne disuar mun di bahati tut da noro ditindei kep jindati tut munkwas hi bi sren. Disut bat yo di ingon jo kep nya di ikwei leu hanjop Makedonia ipwoi mun di disuar nya hagom kwei bida. Ditindei kep jindati tut munkwas ei nimbie him dima bi lene nogindini ditindei jindati tut munkwas bi sren. Lene nok gima kikau.

¹⁰ Deheng bitug hon Kristus ningginau nyeti di jo nyahan ei dingonti bipia dingon jei sut ditde nisimbot datti dima lene bit bon timiei gom ei hanjop Akhaya nisurti-nipekti dip tut kan bi.

¹¹ Nggon rino dipai nok i? Drek dip gi dingon ngakei je bi e? Noro Allah kan tut bipia dingon ngakei je!

¹² Dinda jo kep midyai di diyai kep nya nogindini kikau ser nhyema “nibou di mipbor ngat nya” igyai nituti mem ingon jei ba, itri tut bipia igyai bram nyende niyai kepti au.

¹³ Yo dima ne nibou di nitrowai nya rin bibicum tut ide midyai nya ba, iluei itta bindo yonti tereu nok yo di igya kui Kristus.

¹⁴ Ma jinga leu tut yok au! Lewo Bilis cem sindem mem gima luei nitta bindo nonti nok malaikat nipigati.

¹⁵ Gima rino ma jinga leu tut Bilis de awak nya di iluei itta bindo yonti nok awak mem Allah di ningon sren au. Allah mikes hukum ningwig honti ei yok dip dem igbit igyai munti di kinei bibor nya.

Paulus ninghuisi wei drek dip ninyeng no di ya kui Kristus

¹⁶ Dipai mbigom kin bu bipia ma tungwa hi kan bipia dimbrap tereu nok no di nintin kiek au. Ne gino jibisrip huk bipia dintin kiek tu ne ma jisindui sut da bidiba dintin di kiek bibon nituti mem dingon jei lai-lai de.

¹⁷ Gi dibinut bu tut dingon di jei ne Tuhan nicuk dati rin bi. Noro dibon danti tereu nok no di nintin kiek.

¹⁸ Jo nibreisi bipia nibou nya imang bibor ingon jei sut yonti ide ningon kiti di ntun dihyeisi dini him. Gima rino dani cem diyai bram igyaisi dima.

¹⁹ Jingon llei ba, jiba jibou coi mem yo di intin kiek nya lewo jikan bigya jingon ki!

²⁰ Jiba jibou coi mem yo di ibibon je tereu nok awak kin yo di ico kep je kin yo di igyem jimuhup kin yo di ingwes om kep je kin yo di ittem jijap.

²¹ Dimmai sut danti lewo dingwes mien tut gi diyai bram igyai kepti dima. Gino hiter ingon jei sut mun di bon ninyeng mem yonti ne dani cem! (Dipai-pai wai nok no di nintin kiek hak ug.)

²² Apo yoni ne timiei Ibrani rin e? Dani cem timiei Ibrani. Apo yoni ne timiei mben Israel rin e? Dani cem timiei mben Israel. Apo yoni intun Abraham him e? Dani cem dintun Abraham him.

²³ Apo yoni inok awak mem Kristus e? Mbro nok gino dimbrap tereu nok no di nintin kiek lo, disimbot dat bipia dinok awak di kei bibor dor njiriek yo dima yahagom! Dita dibou ei midyai nyati bibor cem disima-sima nyen ei ig bui nsi cem tungwatu nya imbas da kinei bibor cem dingon tai-tai bou mbirimang bibor cem dor njiriek yo dima yahagom.

²⁴ Nibou mben Yahudi nya imem inghat tut kuk di nggwen mbiningot ningai ba, muhwindatai ba, ibimbas da mbimuhwi bibikwop nok.

²⁵ Mben Roma di igya ser da iba tom bibui da mbiningai cem mben Yahudi iba tig bihwen da bidinem-nnai mbigom cem kibar minyei sar minyei mbiningai sut da cem dipiar ei minyei ngwa dip mem mmmun-njap nitindur gom cem.

²⁶ Dum kep mun di bindei ba, nahanok dimai nimbiam kak dimbutti nya mang bibor. Minyei su bibor bihwen da cem yo di imbuk nya icuug da cem mben Yahudi kin ngkiai nya igyok ingon gom mem da cem dum kep mun di bindei ba, nahanok dimai nimbiam ei biyati cem ei ha ngunti cem ei minyei ngwa dip cem ba, yo di Kresten nitrowai ihwen bit da cem.

²⁷ Diyai midyai sindem bidicom dahanggwap tut cem diyai kep midyai kikau mmun jei cem dinggum bibor cem dinggobiau cem hi kwas njita tut da bi cem. Dimai didigok lewo sinsun dem mem da bi cem hi cigit da kui ig bi cem.

²⁸ Lene mun di buhun dima yok he bi. Lewo dikrau dingon tut mbusyamei nya hagom ba, gini buhun tak da bikwop njap.

²⁹ Mpe dino hi ningon nddong bi lene bitut dani cem ba, dingon nddong bi drek dip. Mpe dino hi cut ei sisarti ne gima biyai dingon buhun drek dip.

³⁰ Gino suar dingon jei sut ndiyok ne midingon jei sut mun di bindo bipia disindem bi.

³¹ Allah dino Tuhan Yesus Nicig kan tut bipia dibicum tut gima bi. Ma tungwatu nya ikon Allah ninyeng bijo ninno bijo kikau!

³² Tirigi dingat rin ei minu ndig Damsyik lene nibou ndig Aretas sok nihyet bak tentara nya leu binhyepo igya ngkiem ser dimbou heisi nya leu binhyepo ikat da bidisima.

³³ Noro yo di igya kui da iba kuk bikri bansi biyuhuk tut da leu ngug tig mihyeti di anai bibor ug ei dihyeisi mu bidingwes ngun leu nibou ndig nindati.