KORINTUS GI NICAN 10 - ALLAH NIHYET MEM TUNGWATU NYA

Paulus mbrap gau niyai munti nya

¹ Nogindini da di Paulus dipai dingon kanti gom bije. Hi pai dinghapti bipia tirigi dingat rin kin je lene diba dibou coi mem tungwatu nya lo, tirigi dingat rin ei minu ting lene dibrim dingkek kep je. Noro diba ningon nggriu sutti kin nisingat tutti di ntun Kristus him,

² bitigtai je leu binhyema jibindei bidingwak mbriu sut je tirigi dihwou ngat je hanyen bu au. Lewo dikos tut bipia dingwak mbriu sut yo di ipai bipia niyai mun tug hon nisinati di ntun dihyeisi dini him.

³ Mbro nok gino ingat rin ei dihyeisi dini lo, nikon pran tug hon nisinati di ntun dihyeisi dini him bi.

⁴ Niba minggwen di ntun dihyeisi dini him bikon pran bi. Noro niba Allah de minggwen di sindem bikon pran binibindei timek tentara nibousi di igya coi nya. Nibindei timek niba nihyet dahat yamti di nijit-jau bi nya ba,

⁵ ninggek nisindem nibousi nya di yo di ingon jei nya ingot bisrin ser puig di bie ndam Allah. Nikat ningon kanti nya di ntun dihyeisi dini him binikuk hagom bibit Kristus nihyet cem.

⁶ Niabiati jo nibreisi bipia jiba jingon di gom bibit Kristus nicuk jeti nya lene minikes hukum ei yo di nindigsi di ibit nihyet bi nya dip.

⁷ Jimian ser mun di jingat bou jiyai him he. Gino tungwagom di srig jikieti jem niceu bit Kristus ne ma noni nggok ningonti hanyen bu leu api noni mikan tut bipia nyeni cem nijem niceu bit Kristus noyam kin noni.

⁸ Mbro nok gino suar dingon jei sut nisindemti di Tuhan yai bida lo, dimmai sut bi. Lewo Noni yai nisindemti dima bida mem dibinjei je ningwig bi noro mem dibiwin kep jingonti.

⁹ Gino jikan bipia dibingon mem gima diba ditde srat nya biyai jingon di ttin ne gini kei mem bi.

¹⁰ Bihi ipai “Paulus ba nihyet di buhun kin nihyet di ten bipas srat binye. Noro tirigi ningat rin kin nye lene noni ba nibou coi mem nye ba, kimut nuhui hak.”

¹¹ Ma no di pai nok gima yok ngon kep bipia mun di dipas ei srat nyati hwou leu minu ting dini kin diyai munti nya tirigi dingat rin kin je minoyam cem.

¹² Ningat ne dibinai danti kin yo di ingon jei nya ba, dikon dinyeng bijo anai sur inyeng bi. Mbenjen! Ingon mbum bibor! Iba igyai kepti di ntun dihyeisi dini him nya bibinai yonti ingonti.

¹³ Noro niyai nok gima bi. Gino ningon jei ne nipigau hanjop hi bi. Noro ningon jei sut nyende midyai nya di niyai ei hanjop nsi di Allah pek binye nipou su he. Ba, hanjop nsi dima bitut jeni cem.

¹⁴ Gino hanjop nsi di Allah pek binye bitut jeni cem ne jo nibreisi bipia tirigi nihwou sut Nihyet Di Kei tut Kristus ne nibipigau hanjop hi bi.

¹⁵ Gima rino ningon jei sut yo di hiter ide midyai di igyai ei nisai leu hanjop nsi di Allah pek binye nya bi. Noro dem tut gima niyai kep midyai ei hanjop nsi di Allah pek binye. Niba ningon com bipia jibikum ei jide niba ningon com Kristusti leu binhyepo jibon nituti mem niyai midyai di nindig bibor dor njiriek bu ei jikieti.

¹⁶ Gi nok gima ne nitri tut Nihyet Di Kei kikau ug ei ngkiai nya ikieti. Tug hon nisinati dima ne ningon jei sut midyai di hiter yai ei hanjop nsi dima bi.

¹⁷ Bit leu nok gi ipas ei Allah nihyetti “Tungwa tou rino ningon jei lene ma ningon jei sut midyai nya di Tuhan yai.”

¹⁸ Lewo Tuhan ningon kwes kin no di nggei-nggwang tut nonti bi. Noro ningon kwes kin no di Nonti nggei sut a.