KORINTUS GI NICAN 1 - ALLAH NIHYET MEM TUNGWATU NYA

Paulus pigo yo di inggre kin mbusyamei nya ei minu ndig Korintus

¹ Srat dini leu da di Paulus ba, diya kui Kristus Yesus tug hon Allah ningon kanti mem da. Dipas srat dini bak Allah de mbusyamei ei minu ndig Korintus kin Nide limwa nya yahagom ei hanjop Akhaya nisurti-nipekti. Da di Paulus kin isut Timotius ningat nadi leu binhyepo,

² Icig Allah kin Tuhan Yesus Kristus isingat tut je bigyai jingon jo nyahan.

Paulus pai sigyo bak Allah

³ Jikwei ba, inggei sut Allah dino ide Tuhan Yesus Kristus nicigya. Noni ne Arig di ningon nggriu sut nye kin Allah di biwin kep nye di tungwatu nya ingonti ri.

⁴ Noni sindem tut ingonti mpe dino mun di buhun ninyeng hagom cut igkep nye leu binhyepo iba nisindemti di igyai leu Noni bisindem tut yo di hiter ingonti mpe dino mun di buhun ninyeng hagom cut igkep yok bu.

⁵ Nyeni ipriet kin ninghuisi wei di cut igkep Kristus mang bibor. Allah sindem tut Kristus ningonti bisindem tut nyeni cem ingonti tug hon Kristus.

⁶ Gino mun di buhun cut igkep nye ne gima bindei sindem jingonti bibie ndam niteu leu sisarti kin niyaijo nijep mem je. Gino Allah sindem tut nyeni ningonti ne bitut jeni cem bibindei ba, jeni kin nyeni ingon nddong tut mun di cut igkep nye.

⁷ Ningon nddong tut je. Nihig ningon ei jeti bi sren. Lewo nikan tut bipia jicoi bit ninghuisi wei di cut igkep nye. Gima rino jicoi bit nisindemti di Allah yai bije noyam kin nyeni.

⁸ Disut bat jen, nipus jingonti leu binhyepo jikan tut mun di buhun bibor di cut igkep nye ei hanjop Asia. Ninghuisi wei di cut igkep nye buhun bibor lene tak kep nye biyai ningon cut leusi binye apino nikan bipia bit bon niyaijo bu kan bi.

⁹ Nikan bigya nicoi bit yo di itug ndei hukum nimai. Noro mun dima cut igkep nye leu binhyepo bindei ba, niba ningon com nyende nisindemti bi. Noro niba ningon com Allah di sindem mem gima win yo di imai bikiju hanyen.

¹⁰ Noni teu nye biningwes ngun leu mun di nahanok mibie ndam nimai mem nye tu. Noni miteu nye ei nidipti bu cem lewo niba ningon com Noni.

¹¹ Ba, ningon nddong tut bipia Allah miba jide nadi di jingat mem nye biteu nye biningwes ngun leu mun di cut igkep nye. Allah buhup jide nadi di juhuk bijo ninno mem nye binjei mun di kei binye apino tungwatu nya imang bibor ipai sigyo bak Noni.

Paulus luei ningonti tut nimbutti

¹² Ningon llei bibor lewo ningon mien ngkiem tut bipia niyai munti nya ei dihyeisi dini cem ei jiyai him hagom tug hon ningon di gom kin ningon di pimbai kei di Allah yai binye. Niyai munti nya hagom tug hon Nide nisingat tut nyeti di sindem tut nye lene tug hon ningon di ki di ntun dihyeisi dini him bi.

¹³ Krop kei mem jikwop srat nya di nipas tut bije ba, krop kei mem jingon dor srat dima yokti cem. Mbro nok gino nogindini jingon wer kiowi tut nye lo,

¹⁴ diba dingon com bipia jingon dorti tut nye ei nidipti bu. Tug hon nisinati dima lene jinggei sut nye bit leu nok ninggei sut je mem njap dino ide Tuhan Yesus kwei hanyen.

¹⁵ Dingon ngkiem tut mun dini yok hagom. Gima rino ei nimbie him ne ditin ei mem dihwou ngat je leu binhyepo jiyai mun di kei mbican bram yam.

¹⁶ Dikos tut bije bipia dihwou ngat je sindam tirigi duug ei hanjop Makedonia lene tirigi dingkwei hanyen leu hanjop dima cem. Mpe dima lene jibon nituti mem jimpu da tut dimbutti ug ei hanjop Yudea.

¹⁷ Noro diluei dingonti tut dimbutti. Gima ndo bindo bije bipia dingon can tut dimbutti nya e? Jikan bipia diba dingon di nddong bi bikos tut dimbutti nya e? Diba dipaisi “I” kin dipaisi “Bi” biluei-luei nyen dingonti nok e?

¹⁸ Deheng bitug hon Allah di ningon gom bipia tirigi dipreu mun ei mem je lene diba dipaisi “I” kin dipaisi “Bi” biluei-luei nyen dingonti bi.

¹⁹ Lewo Allah Nipmot Yesus Kristus di dani kin Silas kin Timotius nitri tut bije nipaisi “I” kin nipaisi “Bi” biluei-luei nyen ningonti bi. Noro noni ne Allah nibuhupti “I” nongkom ri.

²⁰ Lewo Allah pai “I” nongkom tug hon Yesus Kristus tut mun di Noni preu ei mem nye hagom tu. Gima rino nyeni ibuhup “Igbit ri” bak Noni drek dip Yesus Kristus. Iba ide nibuhupti dima binggei sut Allah.

²¹ Allah Nongkom yai ningon kin jingon ngkiem tut ide ninok gom kin Kristusti. Allah Nongkom dimig nye ei mem Nonti,

²² bitak buk kep nye cem. Noni mbun nye bikes Ninnei ei ingonti cem. Ba, Allah Ninnei dima nok wa di yok ser di bindo bipia Nide nipreu ei mem nyeti hagom mipek kep mem nye.

²³ Dikos tutti nya hagom jo nibreisi bou Allah niyai him. Noni kan tut dingon kanti nya hagom bikan tut bipia dihwou ngat je ei minu ndig Korintus bi leu binhyepo dibiyai jingon di buhun bi.

²⁴ Diwit huk je tut mun di suar jingon jo kep nya bi. Lewo nikan tut bipia jingon nddong kei sut jide niba ningon com Kristusti. Noro diyai midyai ei jikieti leu binhyepo dibiyai jingon llei bibor.