HOSEA 14 - ALLAH NIHYET MEM TUNGWATU NYA

¹ Midikes hukum ei mben Samaria dip drek dip gi ikiek imig jou tut Da. Timiei minu dima ikon pran noro mitug ndei nimai. Ide siceu nye minjei ningwoi-ngwoi nya hagom ug ei pimbien behei bimai leu lene iriu sop di inghop tu nya yahagom ba, inghop tigwau bitau ug.”

Hosea bidip huk mben Israel leu binhyepo ittin ser ide sisar

² Je di mben Israel e, ma jingkwei hanyen ndam tuhan di nok jide Allah. Jide sisar bindei ba, jicut tu.

³ Ma jingkwei hanyen ndam tuhan lene ma jingat nadi “tuhan e, ma akos ser nyende sisar hagom ba, angig atingou mem nyende nadi leu api mininggei sut Na bit leu nok gi nipreu ei mem Na tu.

⁴ Bit bon tentara Asyur iteu nye biningwes ngun kan bi. Bit bon kuda pran cem mpu nye kan bi. Nipai bak kwar di nibon bou ninda him nya bipia inok nyende Allah rin bu bi sren. Na di tuhan e, angondut yo dino tungwatu hiter impu yok bi nya.”

tuhan preu kep mben Israel tut niyaijo nijep

⁵ tuhan pai “Midinduk Ditde limwa di israwir tu nya hanyen kwei ndam Da leu api midiba dingon titut yam bingondut yok. Dingon misibui sut yok bu bi.

⁶ Midibon Danti bidinok biget di but mem mben Israel ei iggum ndigsi di kinei bibor. Yoni midigek kep mpia noyam kin mitou ba, icom igau ei dihyei jou noyam kin buom Libanon cem.

⁷ Yoni migyaijo bikieng kep dihyei nisurti-nipekti noyam kin njita di nnum kei kin biei zaitun di nggrou kei kin buom Libanon di ui-gwang kei cem.

⁸ Yoni mikwei hanyen ndam Da bigwam coi Da. Yoni midigek kep mpia haninyai dem kep nok trem di hei ei ninnumti kin miai ba anggur. Tungwatu nya mikon inyeng noyam kin gi ikon ba anggur ngei Libanon ninyenga.

⁹ Mben Israel micom ide kwar di ikuk yok bak nya bingwig leu yok leu api dinyohou yok bidibuhup ide nadi. Midiya srak ko hagau yok noyam kin biai mbrei di bon nimbrinap di nggrou kei lewo Dani ne nibousi mem ide mun di kei nya hagom. Da di tuhan disimbot dat tu.”

Ninggrupti

¹⁰ Handei kon ba, yo di ingon ki nya ingon dorti tut mun di dipas ei srat diniti bipwoi hagom ei ingonti. tuhan nipingok nyeti nya hagom igbit. Yo di ingon sren nya ide niyaijoti tug hon nipingok nyeti dima. Noro nibon kep sisar cig nya indrat tuhan nipingokti apino icut bihigom drek dip ingkek di ndok.