GALATIA 6 - ALLAH NIHYET MEM TUNGWATU NYA

Ma yo di ingon jo kep nya impu yam

¹ Disut bat jen, gino jigom ttau kep tungwagom tirigi sisar sindi srou noni lene ma je di jibit Allah Ninnei nibie tut jeti jiba jingon di nggriu bibrim no dima hanyen kwei ei puig di nijitti. Lene ma jingon sok kep jenti ser nhyema jisindui sut ba, sisar dima srou jeni au.

² Ma jahati tut yam bijikon hiter de mun di buhun tut. Tug hon nisinati dima ne jibit Kristus nicuk nyeti nya.

³ Gino tungwagom kan bipia ninyeng jei lo, ningat ne ninyeng jei haigtu bi ba, noni krau tunggwei ningonti.

⁴ Ma bikwop tungwagom-gom ba ningon srip huk nide niyai munti nya. Gino niyai munti nya kei bibor ne bon ningon jei sut. Noro ma ba niyai munti nya bibinai yo di hiter igyai munti nya au.

⁵ Lewo suar bikwop tungwagom-gom buhup hanyen bak Allah tut niyai munti nya.

⁶ Ma no di pikor leu Kristus ningginausi kwas nide nimati di kei bibor nya ndrim hi tut guru di pikor noni tut.

⁷ Ma jikrau tunggwei jingonti au. Bit bon hi ris mun bak Allah kan bi. Jibiang njita kwei leu beisi bit leu ningan di jindim ei beisi.

⁸ Gino tungwagom ndim ningan bit leu ningut kanti di ntun dihyeisi dini him lene noni mitug ndei nimai drek dip niyai munti dima ri. Ne gino noni ndim ningan bit leu Allah Ninnei nibie tut noti lene noni miyai niyaijo nijep di jo kikau leu Allah Ninnei ri.

⁹ Gima rino ma ingon cut leu ide niyai munti di kei bibor nya au. Leu gino ingon cut leu bi lene mpe di gom mingat ningat leu igyai munti dima yo.

¹⁰ Gima rino biken tiri bon nituti ne ma impu tungwatu yahagom lo, impu isut bat yo di iba ingon com Kristus nya nipou ug e.

Paulus sok kep yok bipas kep srat ningwigsi

¹¹ Ma jiyok ngon kep srat bokti di diba dinda ceti di nindig bibor bipas kep mem je.

¹² Yo di ikipon jeti di iwit huk je tut midut sunat nya ingon jei sut yonti ibrim ighyet eisi tut mun di bitut tungwatu nya itta. Gino ibrim ighyet ei Yesus nimai ei biei salibti ne mben Yahudi ihwen bit yok. Noro iwit huk je tut midut sunat leu binhyepo hi hwen bit yok bi.

¹³ Yo di ibrim ighyet eisi tut midut sunat ingkek ndok tut Puig Yahudi niggai serti. Iwit huk je tut midut sunat leu binhyepo inggei sut gi jikuk je bak midut dima.

¹⁴ Noro tut dani ne dibrim dihyet ei ide Tuhan Yesus Kristus nimai ei biei salibti he. Lewo Yesus nimai ei biei salibti bindei ba, dihyeisi dini bon ninyeng mem da bu bi. Ba, dindo dimai eisi bak mun di ntun dihyeisi dini him.

¹⁵ Niyai midut sunat kin niyai midut sunat bi hacem bon ninyeng bi. Noro gino Allah luei hi nitta binijep-jau bu ne gini bon ninyeng a.

¹⁶ Handei kon ba, Allah singat tut Allah de limwa nya di ice tut bibit dicuk jeti dini yahagom ba, ingon jo nyahan.

¹⁷ Dipas gi ningwigsi nok gini. Ma hi bindin da bu au. Lewo ditug ndei nimuhweisi ei dingkek dip di bindo bipia dani ne Yesus de awak ri.

¹⁸ Disut bat jen, handei kon ba, Tuhan Yesus Kristus singat tut jahagom ninyen. Igbit ri. Nipigo leu dani, Paulus