GALATIA 2 - ALLAH NIHYET MEM TUNGWATU NYA

Yo di igya kui Yesus nindigsi nya ijoi sut Paulus

¹ Ari bingwam simnaibrimigtai ngwig leu lene dani kin Barnabas ningkwei hanyen ug ei minu ndig Yerusalem binibuwak Titus bit nye.

² Dingkwei hanyen ug ei minu ndig Yerusalem lewo Allah bie tut da nok. Ba, dani kin nibou mbusyamei nya ninduk yam ei binyengkom leu api dipui sut Nihyet Di Kei gi ditri tut bak ngkiai nya. Dikrau dingon tut yok leu ma ijoi sut ditde midyai di nipou kin midyai di diyai kikep nya bi. Leu gi nok ne bindo bipia diyai midyai mikuisi he.

³ Mbro nok gino Titus di bit da ne timiei Yunani rin lo, hi wit huk noni tut midut sunat bi.

⁴ Mbro nok gima lo, bihi ibidip huk noni tut. Yo dima iluei itta tereu nok yo di Kresten ba, ibipis yo di mbusyameisi leu binhyepo iba itta sien kep yo di mbusyamei binggok tut nyende niyati kwes di tug hon ide ninok gom kin Kristus Yesusti. Yoni ipi biyuubon nyeni bininok awak mem puig timiei hanyen.

⁵ Noro nicut biyok binice tut ighyet poi mien cem bi. Lewo ninyohou Nihyet Di Kei di kwes-kwau kikau mem je.

⁶ Mbro nok gima lo, nibou di ibou cut biyok dima iwit huk da nhyema dikiek-kiek nyen Nihyet Di Kei di ditri tut bi. Nibou dima yok igyai inyeng e, he bi e, gima bon ninyeng mem da bi. Lewo Allah bibon tungwatu nya bit leu nok itta di hiter ingat bou igyai him bi.

⁷ Noro jo nibreisi mem nibou dima yok bipia Allah kes midyai nitri tut Nihyet Di Kei bak mben ngkiai ei dinghat dip noyam kin gino Noni kes midyai nitri tut Nihyet Di Kei bak mben Yahudi ei Petrus ninghat dip.

⁸ Lewo Allah di sindem tut Petrus di tri tut Nihyet Di Kei bak mben Yahudi sindem tut dani cem mem gima ditri tut Nihyet Di Kei bak ngkiai nya.

⁹ Jo nibreisi mem Yakobus kin Petrus kin Yohanes bipia Allah ndo midyai di bon ninyeng dini bida. Gima rino ibou ningai dini di tereu nok ninyohou mbusyamei cig iba inda com bikrau Barnabas nyeni ninda nok bindo bipia ninjei bit yam. Nahagom nice tut yam hyet bipai bipia nyeni niyai midyai ei ngkiai nya ikieti lene yoni igyai midyai ei mben Yahudi ikieti.

¹⁰ Mun nyeng gom ngat di ipingok nye tut rino ma ningondut nuhui mbum nya. Tut gima ne diba dingon di llei bita dibou eisi kwei su.

Paulus pingok Petrus ningonti ei minu ndig Antiokhia-Siria

¹¹ Noro tirigi Petrus kwei ei minu ndig Antiokhia lene ditte tut noni bou yo di ingon jo kep nya igyai him drek dip nide niyai mun tunggweisi.

¹² Leu nipou ne noni yem njita bit ngkiai di ingon jo kep nya noro mpe dino yo di Yakobus cuk yok kwei ikwei krau lene Petrus mbres nonti leu yo di ingon jo kep dima yok leu api yem njita bit yok bu bi. Lewo noni digit tut yo di iwit huk ngkiai nya tut gima igyai midut sunat.

¹³ Lene mben Yahudi di ingon jo kep nindigsi nya cem sindi iba ingon di mang bisinggre bibit Petrus niyai kepti. Lene yahak mun di kinei dima ei Barnabasti bibindei ba, noni cem tti kin yok.

¹⁴ Tirigi dingat lo, igyai kepti srep tut Nihyet Di Kei di nijit lene dipingok Petrus bou yo di idem yam ei yahagom yoho bei bidipai bak “Nani ne mben Yahudi rin noro ayai munti nya tereu nok ngkiai nya. Nggon rino awit huk ngkiai di ingon jo kep nya leu binhyepo ibit mben Yahudi ide midut dima hanyen bu i?”

Igyai niteu leu sisarti tug hon ide niba ningon com Yesusti

¹⁵ Mbro nok gino nyeni ne mben Yahudi bibit leu ide nisrekti rin ba, intun him “ngkiai di ibon kikep sisar nya” bi lo,

¹⁶ ikan tut bipia tungwatu nya igyai ingon di kwes kin Allah tug hon gi ibit Puig Yahudi niggai serti bi noro tug hon ide niba ningon com Kristusti he. Gima rino nyeni cem ingon jo kep Yesus Kristus leu binhyepo ibiyai ingon di kwes kin Allah tug hon ide niba ningon com Noniti lene tug hon nibit Puig Yahudi niggai serti nya bi. Lewo bit bon hi yai ningon kwes kin Allah tug hon gi bit Puig Yahudi niggai serti kan bi.

¹⁷ Ibimbeu sut gi igyai ingon di kwes kin Allah tug hon ide ninok gom kin Kristusti. Gino igyai ingon di kwes tu lo, hiter ibibon nye tereu nok yo ibon kep sisar tereu nok ngkiai di ibon kep sisar ne gini bindo bipia Kristus ribindei dino ibon kep sisar e? E bi!

¹⁸ Gino dingkwei kep puig timiei di dinggek tut nipou su bidahati tut hanyen bu lene gima bindo pia dindo danti nok no di pigau hanjop.

¹⁹ Puig Yahudi niggai serti pai sut da bipia dimai su. Pui Yahudi niggai serti dima hwen da bidimai su. Nok leu binhyepo diyaijo mem Allah. Dimai ei biei salibti bit Kristus tu ba,

²⁰ diyaijo bu bi. Noro Kristus niyaijo ei dingonti. Nogindini diyaijo tug hon ditde niba ningon com Allah Nipmot di ningon ngakei da bikes niyaisi ei biya luei da.

²¹ Dingwes om kep Allah nisingat tut tungwatuti bi. Noro gino tungwatu nya igyai ingon di kwes kin Allah hanyen tug hon gi ibit Puig Yahudi niggai serti ne gima bindo bipia Kristus mai mikuisi!