2 TIMOTIUS GI NICAN 3 - ALLAH NIHYET MEM TUNGWATU NYA

Ningginausi tut njap gi ningwigsi nya

¹ Ma ayok ngon kep bipia son dideu njap ningwig honti nya lene mun di buhun bibor micut igkep tungwatu nya.

² Mpe dima lene tungwatu nya idrui bou ngwak cem ingat ingwes ei mitieiti cem inggei-nggwang cem illei-lau cem ighyet tigut yam cem isrep tut icig bat-ipmem bat nya ighyet cem ipai sigyo kan bi cem isingat bi cem,

³ ingondut yam cem bi ikos ser mun di igyai tunggwei sut yam biyam cem bi ikkin kep yam nghapti cem yoom kep ingonti kan bi cem iten-pos cem ingon mpo tut mun di kei hagom cem,

⁴ ibakilak yam cem ibon mun kindi-kindok cem ingon jei bibor cem ikes Allah ei leu ba, yuhuk bram mun di ingat ingwes eisi nya cem.

⁵ Mbro nok gino ipai sut yonti bipia ingon jo kep tu lo, igyai munti nya srep tut ba, ide ningon jo kepti dima ne ningon jo kepti di nitrowai he ri. Ma ambres nanti leu yo dima.

⁶ Lewo yo dima ibou poi ihwou ningnai bibrim ingkek kep sop di ingon nddong bi nya biyahak ide mun di kinei ei yoti. Sop dini yok ingon mien mui su ba, ibit-bit nyen ingut kanti ninyeng hagom.

⁷ Sop dima yok yuhuk bram ningginausi buug ninno noro ingon gi jo kep nihyet di nijit kan bi sren.

⁸ Bit leu nok Yanes kin Yambres di isrep tut Musa nipou su ba, yo dini cem isrep tut nihyet di nijit lewo intin kiek ba, ide niba ningon comti srawir tu.

⁹ Yo dini mimbut sindem biyuug bipek nipekti bi. Lewo ide ningon tindurti jo nibreisi bou tungwatu nya igyai him noyam kin mun di pek kep mem Yanes kin Yambres.

Ningginausi mem Timotius

¹⁰ Noro tut nani ne abit ditde ningginausi kin diyai munti nya kin dingon kanti tu ba, angig ayai kep ditde niba ningon com Kristusti kin dingon di jo nyahan kin dingon ngakei tungwatu nyati kin dingon di nddong,

¹¹ kin tungwatu nya di ihwen bit da kin ninghuisi wei di hwen da hagom tu. Akan tut mun di cut igkep da ei minu ndig Antiokhia kin Ikonium kin Listra tug hon tungwatu nya di ihwen bit da bibor! Noro Allah teu da bidingwes ngun leu hagom tu.

¹² Jo nibreisi bipia yo di ijoi sut gima igyai mun bit leu Allah ningon kanti mem yok ba, inok gom kin Kristus Yesus cem migyai ninghuisi wei leu yo di ihwen bit yok lo,

¹³ yo di isibut kin yo di iris mun ei hiterti nya mibikum ei ide mun di kineiti ba, ibiris bak tungwatu nya kikau lo, yonti cem micut bak yo di iris mun biyok nya ri.

¹⁴ Noro tut na di Timotius e, ma akrau kep ningginausi di nijit di guru nya ingginau na tut ba, angon huk niti lene ma aba angon com guru di ingginau na tut nya.

¹⁵ Ma ayok ngon kep bipia tirigi amien kikau kwei bipek ammani kep ne akrau kep Allah nihyet. Ba, nihyet dima sindem mem gima biyai angon di dorti leu binhyepo ayai niteu leu sisarti kin niyaijo nijep tug hon ade niba ningon com Kristus Yesusti.

¹⁶ Allah nihyet titut yam tibim kwei leu Allah niji him ba, bon ninyeng mem gima bingginau tungwatu nya tut nijit-jausi kin nisok kep tungwatu nya tut sisarti kin nimbus tungwatu ingonti tut igyai munti di tunggwei nya kin nipingok tungwatu nya ingonti tut igyai munti di kei bibor nya.

¹⁷ Allah nihyet bindei ba, Nide awak yai mun di noni suar leu binhyepo noni dem mem gima yai kep midyai di kei bibor nya hagom.